കൊച്ചി: ജീവന് ഭീഷണിയുണ്ടെന്ന് സ്വര്‍ണക്കടത്ത് കേസ് പ്രതി സ്വപ്ന സുരേഷ് കോടതിയില്‍. പൊലീസ് ഉദ്യോഗസ്ഥരെന്ന് കരുതുന്ന ചിലര്‍ തന്നെ ജയിലില്‍ വന്നു കണ്ടു. കേസുമായി ബന്ധപ്പെട്ട ഉന്നതരുടെ പേരുകള്‍ പറയരുതെന്ന് ആവശ്യപ്പെട്ടു.
അന്വേഷണ ഏജന്‍സിയുമായി സഹകരിക്കരുതെന്നും പറഞ്ഞുവെന്നും സ്വപ്ന കോടതിയില്‍ പറഞ്ഞു. തന്നെയും കുടുംബത്തേയും അപകടപ്പെടുത്തുമെന്ന് ഭീഷണിപ്പെടുത്തി. നവംബര്‍ 25ന് മുന്‍പ് പലതവണ ഭീഷണയുണ്ടായെന്നും സ്വപ്ന. ഡോളര്‍ കടത്തുകേസില്‍ രഹസ്യമൊഴി രേഖപ്പെടുത്തും മുന്‍പാണ് വെളിപ്പെടുത്തല്‍.
തിരുവനന്തപുരം അട്ടക്കുളങ്ങര ജയിലില്‍ ആയിരുന്ന സമയത്താണ് തന്നെ ചിലര്‍ വന്ന് കണ്ടത്.അവര്‍ കാഴ്ചയില്‍ ജയില്‍ പൊലീസ് ഉദ്യോഗസ്ഥരെന്ന് തോന്നുന്നവരാണ്. കസ്റ്റംസിന്റെ കസ്റ്റഡി കാലാവധി കഴിഞ്ഞാല്‍ താന്‍ പോകേണ്ടത് അട്ടക്കുളങ്ങര ജയിലിലേക്ക് തന്നെയാണ്. അവിടെ വച്ച്‌ തന്നെ അപായപ്പെടുത്താന്‍ സാധ്യതയുണ്ട്. അതിനാല്‍ സംരക്ഷണം വേണമെന്നാണ് സ്വപ്ന ആവശ്യപ്പെട്ടിരിക്കുന്നത്.
