കുവൈത്ത് സിറ്റി: കുവൈത്ത് പ്രധാനമന്ത്രിയായി ശൈഖ് സബാഹ് ഖാലിദ് അല്‍ ഹമദ് അസ്സബാഹ് തുടരും. 37ാമത് കുവൈത്ത് മന്ത്രിസഭയുടെ പ്രധാനമന്ത്രിയായി അദ്ദേഹത്തെ അമീര്‍ ശൈഖ് നവാഫ് അല്‍ അഹ്മദ് അല്‍ ജാബിര്‍ അസ്സബാഹ് നിയമിച്ചു. പാര്‍ലമെന്‍റ് തെരഞ്ഞെടുപ്പ് ഫലം പുറത്തുവന്നതിന് പിന്നാലെ മന്ത്രിസഭ രാജി സമര്‍പ്പിച്ചിരുന്നു. ഡിസംബര്‍ 15നാണ് പുതിയ പാര്‍ലമെന്‍റിെന്‍റ ആദ്യ സമ്മേളനം. ഡിസംബര്‍ 15ന് നടക്കും. അതിന് മുമ്ബ് മന്ത്രിസഭ രൂപവത്കരണം നടക്കും. ശൈഖ് സബാഹ് ഖാലിദ് അല്‍ ഹമദ് അസ്സബാഹ് 2019 ഡിസംബര്‍ 17നാണ് ആദ്യമായി പ്രധാനമന്ത്രിയാവുന്നത്.
നേരത്തെ ശൈഖ് ജാബിര്‍ മുബാറക് അസ്സബാഹിെന്‍റ നേതൃത്വത്തിലുള്ള മന്ത്രിസഭ രാജിവെക്കുകയും വീണ്ടും പ്രധാനമന്ത്രിയാവാന്‍ അദ്ദേഹം വിസമ്മതിക്കുകയും ചെയ്തതിനെ തുടര്‍ന്നാണ് വിദേശകാര്യ മന്ത്രിയായിരുന്ന ശൈഖ് സബാഹ് ഖാലിദ് അസ്സബാഹ് പ്രധാനമന്ത്രി സ്ഥാനത്തേക്ക് നറുക്ക് വീണത്..പ്രധാനമന്ത്രിയുടെ ശിപാര്‍ശയുടെ അടിസ്ഥാനത്തില്‍ അമീര്‍ മറ്റു മന്ത്രിമാരെയും നിയമിക്കും.
പാര്‍ലമെന്‍റ് അംഗങ്ങളില്‍നിന്നും അല്ലാതെയും മന്ത്രിമാരെ നിശ്ചയിക്കാം. അധികവും സബാഹ് കുടുംബത്തില്‍നിന്നാണ് നിശ്ചയിക്കാറുള്ളത്. പാര്‍ലമെന്‍റില്‍നിന്ന് ഒന്നോ രണ്ടോ പ്രതിനിധികള്‍ ഉണ്ടാവാറുണ്ട്. എം.പിമാരുടെ മൂന്നില്‍ ഒന്നില്‍ കൂടാന്‍ പാടില്ല മന്ത്രിമാരുടെ എണ്ണം. നിലവിലെ കെയര്‍ ടേക്കര്‍ മന്ത്രിസഭയിലെ നിരവധി പേര്‍ പുതിയ മന്ത്രിസഭയിലും ഇടം പിടിച്ചേക്കും. കഴിഞ്ഞ മന്ത്രിസഭയുടെ പ്രകടനത്തെ കുറിച്ച്‌ പൊതുവെ നല്ല അഭിപ്രായമാണുള്ളത്. ആഭ്യന്തര മന്ത്രി അനസ് അല്‍ സാലിഹ്, വിദേശകാര്യ മന്ത്രി ശൈഖ് അഹ്മദ് നാസര്‍ അല്‍ മുഹമ്മദ് അസ്സബാഹ്, ആരോഗ്യ മന്ത്രി ഡോ. ബാസില്‍ അസ്സബാഹ് എന്നിവര്‍ക്ക് സ്ഥാനം ഉറപ്പാണ്.
