കൊല്ലം: വിവാഹത്തില്‍ നിന്നും കാമുകന്‍ പിന്മാറിയതില്‍ മനംനൊന്ത് കൊട്ടിയത്ത് യുവതി ജീവനൊടുക്കിയ സംഭവത്തില്‍ സീരിയല്‍ നടി ലക്ഷ്മി പ്രമോദിന് മുന്‍കൂര്‍ ജാമ്യം. കൊല്ലം പ്രിന്‍സിപ്പല്‍ സെഷന്‍സ് കോടതിയാണ് ലക്ഷ്മി പ്രമോദിനും ഭര്‍ത്താവ് അസ്ഹറുദീനും മുന്‍കൂര്‍ ജാമ്യം അനുവദിച്ചത്.
കേസിലെ പ്രധാനപ്രതി ഹാരിസിന്‍റെ സഹോദരനും ഭാര്യയുമാണ് ലക്ഷ്മി പ്രമോദും ഭര്‍ത്താവും. ഹാരീസിന്‍റെ അമ്മയ്ക്കും കോടതി ജാമ്യം അനുവദിച്ചു.
കേസിലെ പ്രതികളെ രക്ഷിക്കാന്‍ ശ്രമം നടക്കുന്നുണ്ടെന്ന് റംസിയുടെ കുടുംബം ആരോപിച്ചിരുന്നു.ഇതേതുടര്‍ന്ന് കേസ് പത്തനംതിട്ട എസ്പി കെ.ജി. സൈമണിന്‍റെ നേതൃത്വത്തിലുള്ള സംസ്ഥാന ക്രൈംബ്രാഞ്ച് സംഘത്തിന് കൈമാറിയിരുന്നു.
ഹാരീസും റംസിയും പ്രണയത്തിലായിരുന്നു. ഇരുവരും തമ്മിലുള്ള വിവാഹനിശ്ചയവും കഴിഞ്ഞിരുന്നു. എന്നാല്‍ സാമ്ബത്തികമായി മെച്ചപ്പെട്ട മറ്റൊരു ആലോചന വന്നപ്പോള്‍ ഹാരീസ് റംസിയെ ഒഴിവാക്കിയെന്നും ഇതില്‍ മനംനൊന്ത് റംസി ജീവനൊടുക്കിയെന്നുമാണ് പരാതി.
