‘സമാധാനപരമായി പ്രതിഷേധിക്കുന്നത് കുറ്റമല്ല, ഭരണകൂടത്തോട് ചോദ്യങ്ങൾ ചോദിക്കുന്നത് രാജ്യദ്രോഹവുമല്ല!’ ജനാധിപത്യത്തെയും പൗരന്മാരുടെ പ്രതിഷേധിക്കാനുള്ള അവകാശത്തെയും കുറിച്ച് ശക്തമായ നിലപാടുമായി ബോളിവുഡ് നടി ഹുമ ഖുറേഷി. ലോകത്തിലെ ഏറ്റവും വലിയ ജനാധിപത്യ രാജ്യമായ ഇന്ത്യയിൽ സമാധാനപരമായി പ്രതിഷേധിക്കാനും ഭരണകൂടത്തോട് ഉത്തരവാദിത്തം ആവശ്യപ്പെടാനുമുള്ള അവകാശം അധികാരികൾ നൽകുന്ന ഔദാര്യമല്ല, മറിച്ച് ഓരോ പൗരന്റെയും മൗലികമായ ജനാധിപത്യ അവകാശമാണെന്ന് താരം വ്യക്തമാക്കി. പ്രതിഷേധിക്കുന്നവരെ ഭീഷണിപ്പെടുത്തുന്നതും അടിച്ചമർത്തുന്നതും ജനാധിപത്യത്തിന്റെ അടിസ്ഥാന മൂല്യങ്ങൾക്ക് വിരുദ്ധമാണെന്നും അവർ ചൂണ്ടിക്കാട്ടി.
‘രാജ്യസ്നേഹമെന്നാൽ അന്ധമായ മൗനമല്ല, ജനാധിപത്യമെന്നാൽ അന്ധമായ അനുസരണയുമല്ല. വിയോജിപ്പ് പ്രകടിപ്പിക്കുന്നത് രാജ്യവിരുദ്ധതയല്ല!’ താൻ ഒരു രാഷ്ട്രീയ പാർട്ടിയുടെയോ വ്യക്തിയുടെയോ പക്ഷത്തല്ലെന്നും നീതിയും ഉത്തരവാദിത്തവും ആവശ്യപ്പെടുന്ന സാധാരണ പൗരന്മാർക്കൊപ്പമാണെന്നും ഹുമ ഖുറേഷി വ്യക്തമാക്കി. രാജ്യത്തോടുള്ള സ്നേഹമാണ് അനീതികൾക്കെതിരെ നിശബ്ദത പാലിക്കാതിരിക്കാൻ തന്നെ പ്രേരിപ്പിക്കുന്നത്. അഭിപ്രായം തുറന്നുപറയുന്നതിന്റെ പേരിൽ വ്യക്തിപരമായ ആക്രമണങ്ങളും തൊഴിൽപരമായ പ്രത്യാഘാതങ്ങളും നേരിടേണ്ടിവന്നാലും നിലപാടിൽനിന്ന് പിന്നോട്ടില്ലെന്നും ദേശസ്നേഹം ആരുടെ മുന്നിലും തെളിയിക്കേണ്ട ആവശ്യമില്ലെന്നും താരം വ്യക്തമാക്കി. ‘ലോകം നമ്മെ ഉറ്റുനോക്കുകയാണ്. നമ്മൾ കൂടുതൽ മെച്ചപ്പെടേണ്ടതുണ്ട്. ജയ് ഹിന്ദ്!’ എന്ന വാക്കുകളോടെയാണ് കുറിപ്പ് അവസാനിക്കുന്നത്.
