അടുത്ത 20 വർഷത്തിനുള്ളിൽ ഇന്ത്യയുടെ മൊത്ത ആഭ്യന്തര ഉത്പാദനം (GDP) നിലവിലെ 4.015 ട്രില്യൺ ഡോളറിൽ നിന്ന് 38 ട്രില്യൺ ഡോളറിലേക്ക് കുതിച്ചുയരുമെന്ന് ദേശീയ സുരക്ഷാ ഉപദേഷ്ടാവ് (NSA) അജിത് ഡോവൽ വ്യക്തമാക്കി. ഐഐടി റൂർക്കിയിൽ (IIT Roorkee) നടന്ന ബിരുദദാന ചടങ്ങിൽ മുഖ്യാതിഥിയായി സംസാരിക്കവെയാണ് അദ്ദേഹം രാജ്യത്തിന്റെ സാമ്പത്തിക വളർച്ചയെക്കുറിച്ചുള്ള ഈ സുപ്രധാന വിലയിരുത്തൽ നടത്തിയത്. രാജ്യം വൻതോതിലുള്ള സാമ്പത്തിക-സാമൂഹിക പരിവർത്തനത്തിന്റെ പാതയിലാണെന്നും അദ്ദേഹം ചൂണ്ടിക്കാട്ടി.
2047 വരെയുള്ള ‘അമൃതകാല’ ഘട്ടത്തിലൂടെ രാജ്യം മുന്നേറുമ്പോൾ യുവാക്കൾക്കും പുതിയ ബിരുദധാരികൾക്കും മുന്നിൽ സമാനതകളില്ലാത്ത അവസരങ്ങളാണ് തുറക്കപ്പെടുന്നതെന്ന് അദ്ദേഹം പറഞ്ഞു. സാങ്കേതികവിദ്യയും എൻജിനീയറിങ്ങും നവീകരണവുമാണ് ഈ വളർച്ചയുടെ പ്രധാന ചാലകശക്തികളെന്നും, ധൈര്യത്തോടും വ്യക്തമായ ലക്ഷ്യബോധത്തോടും കൂടി രാജ്യപുരോഗതിക്കായി സംഭാവനകൾ നൽകാൻ വിദ്യാർത്ഥികൾ തയ്യാറാകണമെന്നും അദ്ദേഹം ആഹ്വാനം ചെയ്തു.
