തിരുവനന്തപുരം: കോണ്‍ഗ്രസിലെ കാര്യങ്ങള്‍ സംബന്ധിച്ചുള്ള തന്റെ അഭിപ്രായങ്ങളില്‍ ഉറച്ചുനില്‍ക്കുന്നതായി കെ മുരളീധരന്. സര്‍ക്കാരിനെതിരായ സമരം കോണ്‍ഗ്രസ് നിര്‍ത്തിവച്ചെന്ന പ്രതീതി തന്നെയാണുണ്ടായത്. രാഷ്ട്രിയകാര്യ സമിതി അംഗങ്ങളെ ഫോണില്‍ ചര്‍ച്ച നടത്താമായിരുന്നു. കെപിസിസി പ്രസിഡന്റെന്ന നിലയില്‍ മുല്ലപ്പള്ളി രാമചന്ദ്രനോട് വിയോജിപ്പുണ്ട്. എന്നാല്‍, പാര്‍ട്ടിയിലേക്ക് മടങ്ങി വരാന്‍ തന്നെ സഹായിച്ചതില്‍ അദ്ദേഹത്തിനോട് കടപ്പാടുണ്ടെന്നും മുരളീധരന് പറഞ്ഞു.
തെരഞ്ഞെടുപ്പ് പ്രചാരണ സമിതി സ്ഥിരം സംവിധാനമെന്നാണ് അറിയിച്ചിരുന്നത്. തെരഞ്ഞെടുപ്പ് കഴിഞ്ഞതുകൊണ്ട് അതിന് പ്രസക്തിയില്ലെന്ന് ഇപ്പോള്‍ മുല്ലപ്പള്ളി പറയുന്നതെന്താണെന്നറിയില്ല. തനിക്ക് പരാതിയില്ല. കെപിസിസി പ്രസിഡണ്ടുമായി ഇതു സംബന്ധിച്ച്‌ ഇനി ചര്‍ച്ചയ്ക്കില്ല. അദ്ദേഹത്തെ മോശക്കാരനാക്കാനില്ല.
നിയമസഭാ തെരഞ്ഞെടുപ്പില്‍ 2001 ആവര്‍ത്തിക്കാന്‍ മികച്ച സ്ഥാനാര്‍ത്ഥികളെ നിര്‍ത്തണം. തന്റെ രാജി സംബന്ധിച്ച്‌ പറയേണ്ട കാര്യങ്ങള്‍ മാത്രമാണ് താന്‍ പറഞ്ഞത്. ഇനി വിവാദങ്ങള്‍ക്കില്ല. ഇരട്ട പദവി വഹിക്കുന്നവര്‍ സ്ഥാനം ഒഴിയുന്ന കാര്യം സ്വയം തീരുമാനിക്കണം. ഒരാള്‍ക്ക് ഒരു പദവി എന്നതില്‍ ഉറച്ചു നില്‍ക്കുന്നെന്നും മുരളീധരന് പറഞ്ഞു.
സര്‍ക്കാരിനെതിരായ പ്രതിഷേധ സമരം നിര്‍ത്തി വച്ച കോണ്‍ഗ്രസ് തീരുമാനത്തെ വിമര്‍ശിച്ച കെ മുരളീധരന് മറുപടിയുമായി കെപിസിസി അധ്യക്ഷന്‍ മുല്ലപ്പള്ളി രാമചന്ദ്രന്‍ രംഗത്തെത്തിയിരുന്നു. സമരം അവസാനിപ്പിച്ചതില്‍ തെറ്റില്ല എന്നായിരുന്നു മുല്ലപ്പള്ളിയുടെ പ്രതികരണം. സംസ്ഥാനത്തിന്‍്റെ പൊതുതാത്പര്യം മാനിച്ചായിരുന്നു തീരുമാനം. ആരെയും ഭയപ്പെടുന്നില്ല. അങ്ങിനെ കരുതുന്നവര്‍ക്ക് തെറ്റി. സംഘടനാപരമായ വിവാദങ്ങള്‍ക്കില്ല. എം പിമാര്‍ നിഴല്‍ യുദ്ധം നടത്തരുത്. സംയമനവും അച്ചടക്കവും പാലിക്കണമെന്നും മുല്ലപ്പള്ളി പറഞ്ഞിരുന്നു. ഇതിനു പിന്നാലെയാണ് വീണ്ടും മുരളീധരന് രംഗത്തെത്തിയത്.
