ഡൊണാൾഡ് ട്രംപിൻ്റെ മകൾ ഇവാങ്കയെ വധിക്കാൻ ശ്രമം

ഇറാന്റെ ഔദ്യോഗിക സൈനിക വിഭാഗമായ ഇസ്ലാമിക് റെവല്യൂഷണറി ഗാർഡ് കോർപ്സ് (IRGC) പ്രത്യേക പരിശീലനം നൽകിയ ഭീകരൻ, അമേരിക്കൻ പ്രസിഡന്റ് ഡൊണാൾഡ് ട്രംപിൻ്റെ മകൾ ഇവാങ്ക ട്രംപിനെ വധിക്കാൻ വൻ ഗൂഢാലോചന നടത്തിയതായി റിപ്പോർട്ട്. ഇറാനെതിരെ അമേരിക്ക ശക്തമായ സൈനിക ആക്രമണം ആരംഭിച്ച പശ്ചാത്തലത്തിൽ, വാഷിംഗ്ടണിൽ വെച്ചാണ് രാജ്യത്തെ ഞെട്ടിച്ച ഈ വധശ്രമത്തിന്റെ വിവരങ്ങൾ പുറത്തുവന്നത്.

ട്രംപിന്റെ ആദ്യ ഭരണകാലത്ത് അദ്ദേഹത്തിന്റെ പ്രധാന ഉപദേശകയായി സേവനമനുഷ്ഠിച്ചിരുന്ന ഇവാങ്കയെ വധിക്കാൻ ശ്രമിച്ച ഭീകരനെക്കുറിച്ചുള്ള വിവരങ്ങൾ പ്രമുഖ അന്താരാഷ്ട്ര മാധ്യമമായ ‘ദി ന്യൂയോർക്ക് പോസ്റ്റ്’ ആണ് പുറത്തുവിട്ടത്. മുൻപ് അമേരിക്ക നടത്തിയ സൈനിക ആക്രമണത്തിൽ കൊല്ലപ്പെട്ട തന്റെ ഗുരുവോടുള്ള പ്രതികാരം വീട്ടാനാണ് ഇയാൾ ഈ ആക്രമണത്തിന് പദ്ധതിയിട്ടത്. അടുത്തിടെ മെയ് 15-ന് തുർക്കിയിൽ വെച്ച് അറസ്റ്റിലായതിന് ശേഷം അമേരിക്കയിലേക്ക് നാടുകടത്തപ്പെട്ട മുഹമ്മദ് ബാഖിർ സാദ് ദാവൂദ് അൽ സാദി എന്ന ഭീകരനാണ് ഇവാങ്കയെ ലക്ഷ്യമിട്ടത്.32-കാരനായ ഈ ഇറാഖി പൗരൻ, ഡൊണാൾഡ് ട്രംപ് തന്റെ ആദ്യ ഭരണകാലത്ത് 2020-ൽ ഇറാന്റെ പ്രമുഖ സൈനിക തലവൻ ഖാസിം സുലൈമാനിയെ ഡ്രോൺ ആക്രമണത്തിലൂടെ വധിച്ചതിന് പകരമായി ട്രംപിന്റെ കുടുംബത്തോട് പ്രതികാരം ചെയ്യുമെന്ന് ശപഥം ചെയ്തിരുന്നു. ഇറാന്റെ കരുത്തുറ്റ സൈന്യമായ ഐആർജിസിയുടെ കീഴിലുള്ള പ്രത്യേക വിഭാഗമായ ഖുദ്‌സ് ഫോഴ്സിന്റെ (Quds Force) തലവനായിരുന്ന സുലൈമാനി 2020 ജനുവരി 3-ന് ബാഗ്ദാദ് എയർപോർട്ടിന് സമീപം വെച്ചുണ്ടായ യുഎസ് ഡ്രോൺ ആക്രമണത്തിലാണ് കൊല്ലപ്പെട്ടത്. അൽ സാദി ഫ്ലോറിഡയിലെ വീടിന്റെ ബ്ലൂപ്രിന്റുമായാണ് പിടിയിലായത്.

ഇവാങ്ക ട്രംപിനെ വധിക്കാനുള്ള ഗൂഢാലോചന

അൽ സാദി നടത്തിയ ഈ വധഭീഷണി വെറുമൊരു വാക്കല്ലായിരുന്നു എന്ന് അന്വേഷണ ഉദ്യോഗസ്ഥർ സ്ഥിരീകരിക്കുന്നു. തുർക്കിയിൽ വെച്ച് ഇയാളെ അറസ്റ്റ് ചെയ്യുന്ന സമയത്ത്, ഇവാങ്ക ട്രംപിന്റെ ഫ്ലോറിഡയിലുള്ള വസതിയുടെ കൃത്യമായ ബ്ലൂപ്രിന്റും (കെട്ടിടത്തിന്റെ ഘടന വ്യക്തമാക്കുന്ന ഭൂപടം) മറ്റ് പ്രധാന സുരക്ഷാ വിവരങ്ങളും ഇയാളുടെ കൈവശം ഉണ്ടായിരുന്നതായി ന്യൂയോർക്ക് പോസ്റ്റിന്റെ വൃത്തങ്ങൾ വെളിപ്പെടുത്തി.

ഇതിനുപുറമെ, 2021-ൽ ഇവാങ്കയും ഭർത്താവ് ജാരെഡ് കുഷ്‌നറും താമസിക്കുന്ന ഫ്ലോറിഡയിലെ 24 മില്യൺ ഡോളർ മൂല്യമുള്ള ആഡംബര വസതി ഉൾപ്പെടുന്ന പ്രദേശത്തിന്റെ മാപ്പ് അൽ സാദി തന്റെ എക്സ് (ട്വിറ്റർ) അക്കൗണ്ടിൽ പങ്കുവെച്ചിരുന്നു. ഈ ചിത്രത്തോടൊപ്പം “പ്രതികാരം എന്നത് സമയത്തിന്റെ മാത്രം പ്രശ്നമാണ്” എന്ന ഭയപ്പെടുത്തുന്ന ഭീഷണിയും ഇയാൾ കുറിച്ചിരുന്നു.

“ഞാൻ അമേരിക്കക്കാരോട് പറയുന്നു, ഈ ചിത്രം നോക്കൂ, നിങ്ങളുടെ കൊട്ടാരങ്ങൾക്കോ ​​രഹസ്യ സുരക്ഷാ വിഭാഗങ്ങൾക്കോ ​​(Secret Service) നിങ്ങളെ സംരക്ഷിക്കാൻ കഴിയില്ലെന്ന് മനസ്സിലാക്കുക. ഞങ്ങൾ നിലവിൽ നിരീക്ഷണത്തിന്റെയും വിശകലനത്തിന്റെയും ഘട്ടത്തിലാണ്,” എന്ന് അറബിയിൽ എഴുതിയ സന്ദേശമാണ് ഇയാൾ അന്ന് പോസ്റ്റ് ചെയ്തിരുന്നത്.

യഥാർത്ഥത്തിൽ, തന്റെ ഗുരുവായി കണ്ടിരുന്ന സുലൈമാനി കൊല്ലപ്പെട്ടതിന് ശേഷം അൽ സാദി തന്റെ കൂട്ടാളികളോട് “ഞാൻ ട്രംപിന്റെ വീട് മുഴുവനായി കത്തിച്ചു കളയും” എന്ന് പറഞ്ഞിരുന്നു.

“അവൻ ഞങ്ങളുടെ വീട് തകർത്തതുപോലെ ട്രംപിന്റെ വീട് ഇല്ലാതാക്കാൻ നമ്മൾ ഇവാങ്കയെ കൊല്ലണം എന്ന് അൽ സാദി ആളുകളോട് പറഞ്ഞു നടന്നിരുന്നു,” എന്ന് വാഷിംഗ്ടണിലെ ഇറാഖി എംബസിയിലെ മുൻ സൈനിക ഉദ്യോഗസ്ഥനായ ഇന്തിഫാദ് ഖൻബർ ദി പോസ്റ്റിനോട് വ്യക്തമാക്കി.

എന്നിരുന്നാലും, അൽ സാദി എന്തുകൊണ്ടാണ് ഇവാങ്കയെത്തന്നെ കൃത്യമായി ലക്ഷ്യം വെക്കാൻ പദ്ധതിയിട്ടത് എന്നതിന്റെ വ്യക്തമായ കാരണം ഇനിയും വ്യക്തമല്ല. ട്രംപിന്റെ മൂത്ത മകളായ 44-കാരി ഇവാങ്ക, പ്രമുഖ റിയൽ എസ്റ്റേറ്റ് വ്യവസായിയായ കുഷ്‌നറുമായുള്ള വിവാഹത്തിന് മുൻപ് 2009-ൽ ഓർത്തഡോക്സ് ജൂതമതത്തിലേക്ക് (Orthodox Judaism) മാറിയിരുന്നു. ഈ ദമ്പതികൾക്ക് മൂന്ന് കുട്ടികളുണ്ട്. നിലവിൽ ട്രംപ് 2.0 ഭരണകൂടത്തിൽ പ്രത്യേക പ്രതിനിധിയായി സേവനമനുഷ്ഠിക്കുന്ന കുഷ്‌നർ, ഇറാനുമായുള്ള സമാധാന ചർച്ചകളിൽ സജീവമായി ഇടപെടുന്ന വ്യക്തി കൂടിയാണ്.