ശരീരത്തിലെ ഏതെങ്കിലും ഒരു ഞരമ്പിന് (Nerve) കേടുപാടുകൾ സംഭവിക്കുകയോ പ്രകോപനം ഉണ്ടാകുകയോ ചെയ്യുമ്പോൾ ആ ഞരമ്പ് കടന്നുപോകുന്ന വഴിയിൽ അനുഭവപ്പെടുന്ന അതിശക്തമായ വേദനയെയാണ് ന്യൂറൽജിയ (Neuralgia) എന്ന് വിളിക്കുന്നത്. ഒരു നാഡിയുടെയോ നാഡികളുടെയോ വിതരണത്തിലുള്ള വേദനയാണ് ന്യൂറൽജിയ. ഇതിനെ മലയാളത്തിൽ ‘ഞരമ്പുവലി’, ‘ഞരമ്പുനോവ്’, അല്ലെങ്കിൽ ‘സിരാവേദന’ എന്നൊക്കെയാണ് പറയുന്നത്. സൂചികൊണ്ടു കുത്തുന്നതുപോലെയോ, ഷോക്കടിക്കുന്നതുപോലെയോ, കത്തുന്നതുപോലെയോ ഉള്ള വേദന ഇതിന്റെ പ്രധാന ലക്ഷണങ്ങളാണ്.
ന്യൂറൽജിയയുടെ പൊതുവായ തലക്കെട്ടിന് കീഴിൽ ട്രൈജമിനൽ ന്യൂറൽജിയ (TN), ആറ്റിപിക്കൽ ട്രൈജമിനൽ ന്യൂറൽജിയ (ATN), ആക്സിപിറ്റൽ ന്യൂറൽജിയ , ഗ്ലോസോഫാരിൻജിയൽ ന്യൂറൽജിയ, പോസ്റ്റ്ഹെർപെറ്റിക് ന്യൂറൽജിയ ( ഷിംഗിൾസ് അല്ലെങ്കിൽ ഹെർപ്പസ് മൂലമുണ്ടാകുന്നത് ) എന്നിവ ഉൾപ്പെടുന്നു. സയാറ്റിക്ക , ബ്രാച്ചിയൽ പ്ലെക്സോപതി എന്നിവയുമായി ബന്ധപ്പെട്ട വേദനയെ സൂചിപ്പിക്കാനും ന്യൂറൽജിയ എന്ന പദം ഉപയോഗിക്കുന്നു.
പ്രധാന ലക്ഷണങ്ങൾ:
- ശരീരത്തിന്റെ ഏതെങ്കിലും ഭാഗത്ത് സൂചി കൊണ്ട് കുത്തുന്നതുപോലെയോ, ഷോക്ക് അടിക്കുന്നതുപോലെയോ ഉള്ള അതിശക്തമായ വേദന.
- സാധാരണയായി മുഖം, കഴുത്ത്, തലയുടെ പിൻഭാഗം, കാലുകൾ എന്നിവടങ്ങളിലാണ് ഇത്തരം വേദനകൾ കണ്ടുവരുന്നത്.
പ്രധാന കാരണങ്ങൾ:
- നാഡീ ക്ഷതം (Nerve damage)
- പ്രമേഹം
- പ്രായം കൂടുമ്പോഴുണ്ടാകുന്ന മാറ്റങ്ങൾ
- അണുബാധകൾ (ഹെർപ്പസ്, ഷിംഗിൾസ് വൈറസ് മുതലായവ).
