മുഖ്യമന്ത്രി പദത്തെച്ചൊല്ലി കോൺഗ്രസിൽ പോര് മുറുകുന്നു

കേരള നിയമസഭാ തിരഞ്ഞെടുപ്പിന്‍റെ വോട്ടെണ്ണൽ നടക്കാൻ ആഴ്ചകൾ ബാക്കി നിൽക്കെ, കോൺഗ്രസിനുള്ളിൽ മുഖ്യമന്ത്രി പദത്തെച്ചൊല്ലി തർക്കം രൂക്ഷമാകുന്നു. എഐസിസി ജനറൽ സെക്രട്ടറി കെ സി വേണുഗോപാലിനെ മുഖ്യമന്ത്രി സ്ഥാനത്തേക്ക് പരോക്ഷമായി പിന്തുണച്ചുകൊണ്ട് മുതിർന്ന നേതാവ് കെ സുധാകരൻ രംഗത്തെത്തിയതാണ് പുതിയ വിവാദങ്ങൾക്ക് വഴിതെളിച്ചത്. കെ സിയുടെ നേതൃപാടവത്തെ പ്രശംസിച്ച സുധാകരൻ, കേരളത്തിലെ പരമോന്നത പദവി അലങ്കരിക്കാൻ അദ്ദേഹത്തേക്കാൾ മികച്ച മറ്റൊരാളില്ലെന്ന സൂചനയാണ് നൽകിയത്.

ഏപ്രിൽ 9-ന് നടന്ന വോട്ടെടുപ്പിൽ 77.7 ശതമാനം പോളിംഗ് രേഖപ്പെടുത്തിയതോടെ ഭരണമാറ്റമുണ്ടാകുമെന്ന പ്രതീക്ഷയിലാണ് യുഡിഎഫ്. മെയ് 4-ന് ഫലം വരാനിരിക്കെ, വി ഡി സതീശനും ചെന്നിത്തലയും ഉൾപ്പെടെയുള്ള നേതാക്കളെ മറികടന്ന് കെ സി വേണുഗോപാലിനെ മുൻനിരയിലേക്ക് കൊണ്ടുവരാനാണ് സുധാകരൻ പക്ഷത്തിൻ്റെ നീക്കം. കെപിസിസി പ്രസിഡന്റായിരുന്ന കാലം മുതൽ വി ഡി സതീശനുമായി സുധാകരൻ അത്ര നല്ല ബന്ധത്തിലല്ലായിരുന്നു എന്നതും ഈ നീക്കത്തിന് പിന്നിലുണ്ടെന്ന് വിലയിരുത്തപ്പെടുന്നു.

കെ സി വേണുഗോപാൽ കോൺഗ്രസിന്റെ അനിഷേധ്യനായ സംഘാടകനാണെന്ന് സുധാകരൻ തന്റെ ലേഖനത്തിൽ കുറിച്ചു. “ദേശീയ തലത്തിൽ രാഹുൽ ഗാന്ധിയുടെ കരങ്ങൾക്ക് കരുത്തുപകരുന്ന അദ്ദേഹം കേരള രാഷ്ട്രീയത്തിലും അനിവാര്യനാണ്. കെ കരുണാകരൻ, എ കെ ആന്റണി, ഉമ്മൻ ചാണ്ടി തുടങ്ങിയ മഹാരഥന്മാരായ നേതാക്കളുടെ പാത പിന്തുടരാൻ കെ സിക്ക് സാധിക്കും. കേരളത്തിലെ പ്രവർത്തകരെ ഏകോപിപ്പിക്കുന്നതിൽ അദ്ദേഹം വലിയ പങ്കുവഹിച്ചു. ദീർഘവീക്ഷണമുള്ള ഒരു നേതൃത്വമാണ് ഇന്ന് കേരളത്തിന് ആവശ്യം,” സുധാകരൻ വ്യക്തമാക്കി.

“ഇന്ത്യൻ നാഷണൽ കോൺഗ്രസിന്റെ അനിഷേധ്യനായ സംഘാടകനും കരുത്തുറ്റ നേതാവുമായ കെ. സി. വേണുഗോപാൽ ദേശീയ തലത്തിൽ രാഹുൽ ഗാന്ധിയുടെ കരങ്ങൾക്ക് കരുത്തുപകരുമ്പോഴും കേരള രാഷ്ട്രീയത്തിൽ അദ്ദേഹത്തിന്റെ സാന്നിധ്യം എത്രത്തോളം അനിവാര്യമാണെന്ന് ഈ തിരഞ്ഞെടുപ്പ് തെളിയിച്ചു. എല്ലാ സ്ഥാനാർത്ഥികൾക്കും ആത്മവിശ്വാസം പകരുകയും പ്രവർത്തകരെ ആവേശം കൊള്ളിക്കുകയും ചെയ്ത അദ്ദേഹം വിജയത്തിന്റെ ചാലകശക്തിയായി മാറി.

“ഇത് അദ്ദേഹത്തിന്റെ സംഘടനാ മികവിന്റെ തെളിവാണ്. കേരളത്തിന് ഇന്ന് അത്തരമൊരു ദീർഘവീക്ഷണമുള്ള നേതൃത്വത്തെ ആവശ്യമുണ്ട്. കെ. കരുണാകരൻ, എ. കെ. ആന്റണി, ഉമ്മൻ ചാണ്ടി തുടങ്ങിയ മഹാന്മാരായ നേതാക്കൾ കാട്ടിത്തന്ന വഴിയിലൂടെ കേരള രാഷ്ട്രീയത്തെ നയിക്കാൻ കെ. സിക്ക് സാധിക്കുമെന്ന് കോൺഗ്രസ് പ്രവർത്തകർ വിശ്വസിക്കുന്നു.”

“ഒരു നേതാവിന്റെ മഹത്വം സ്ഥാനങ്ങളിലല്ല, മറിച്ച് പ്രവർത്തന പാരമ്പര്യത്തിലാണ്. താഴെത്തട്ടിൽ നിന്ന് വളർന്നുവന്ന ഒരു നേതാവിന് മാത്രമേ പ്രവർത്തകരുടെ മനസ്സ് അറിയാൻ സാധിക്കൂ. പാർട്ടിയോടുള്ള കൂറും പ്രതിസന്ധികളിൽ തളരാത്ത നിലപാടും പ്രവർത്തകരോടുള്ള വിനയവുമാണ് കെ. സി. വേണുഗോപാലിനെ വ്യത്യസ്തനാക്കുന്നത്. അദ്ദേഹം പ്രവർത്തകർക്ക് നേതാവ് മാത്രമല്ല, ഒരു സഹയാത്രികൻ കൂടിയാണ്.”

വി ഡി സതീശൻ്റെ നിലപാട്:

സോഷ്യൽ മീഡിയയിലെ പ്രചാരണങ്ങളോട് പ്രതികരിക്കാനില്ലെന്നാണ് പ്രതിപക്ഷ നേതാവ് വി ഡി സതീശൻ വ്യക്തമാക്കിയത്. കഴിഞ്ഞ ആഴ്ച വരെ ചെന്നിത്തലയെ പിന്തുണച്ച സുധാകരൻ ഇപ്പോൾ വേണുഗോപാലിനായി രംഗത്തെത്തിയത് പാർട്ടിയിൽ അമ്പരപ്പുണ്ടാക്കിയിട്ടുണ്ട്. ഗ്രൂപ്പ് താത്പര്യങ്ങളല്ല, മറിച്ച് ജനവിധി അംഗീകരിച്ച് ഹൈക്കമാൻഡ് എടുക്കുന്ന തീരുമാനത്തിന് എല്ലാവരും വിധേയരാകണമെന്നാണ് സതീശൻ പക്ഷത്തിന്റെ നിലപാട്. ഇത്തരം അനാവശ്യ വിവാദങ്ങൾ തിരഞ്ഞെടുപ്പ് വിജയത്തിന് മങ്ങലേൽപ്പിക്കുമെന്നും സതീശനോട് അടുത്ത വൃത്തങ്ങൾ സൂചിപ്പിച്ചു.

രമേശ് ചെന്നിത്തലയുടെ പ്രതികരണം:

മുഖ്യമന്ത്രി സ്ഥാനത്തെക്കുറിച്ചുള്ള ചർച്ചകൾ അനാവശ്യമാണെന്ന് രമേശ് ചെന്നിത്തല പറഞ്ഞു. “മുഖ്യമന്ത്രിയെ തീരുമാനിക്കാൻ കോൺഗ്രസ് പാർട്ടിക്ക് കൃത്യമായ കീഴ്വഴക്കങ്ങളുണ്ട്. ഹൈക്കമാൻഡ് ആണ് ഇക്കാര്യത്തിൽ അന്തിമ തീരുമാനമെടുക്കേണ്ടത്. വോട്ടെണ്ണലിന് മുൻപ് ഇത്തരത്തിലുള്ള ചർച്ചകൾ പ്രവർത്തകരുടെ മനോവീര്യം തകർക്കും. ആരും ഇത്തരം പ്രസ്താവനകൾ നടത്തരുത്. പാർട്ടിയുടെ പ്രഥമ പരിഗണന പിണറായി സർക്കാരിനെ താഴെയിറക്കുക എന്നതിനാണ്,” ചെന്നിത്തല വ്യക്തമാക്കി.

മത്സരിക്കാത്തവർ മുഖ്യമന്ത്രിയാകുന്നത് ആദ്യമല്ല: മുസ്ലീം ലീഗ്

അതേസമയം, കോൺഗ്രസിനുള്ളിൽ നടക്കുന്ന ഈ മുഖ്യമന്ത്രി ചർച്ചകളിൽ കടുത്ത അതൃപ്തിയുമായി മുസ്ലീം ലീഗ് രംഗത്തെത്തി. തിരഞ്ഞെടുപ്പ് ഫലം വരുന്നതിന് മുൻപ് ഇത്തരം ചർച്ചകൾ നടത്തുന്നത് ഉചിതമല്ലെന്ന് ലീഗ് സംസ്ഥാന ജനറൽ സെക്രട്ടറി പി എം എ സലാം പറഞ്ഞു. “പൊരിവെയിലത്ത് കഷ്ടപ്പെട്ട ലക്ഷക്കണക്കിന് യുഡിഎഫ് പ്രവർത്തകരുടെ ത്യാഗത്തെ വിസ്മരിക്കുന്നതാണ് ഇത്തരം ചർച്ചകൾ. ഭൂരിപക്ഷം കിട്ടിയ ശേഷമാണ് മുഖ്യമന്ത്രിയെ തീരുമാനിക്കേണ്ടത്. ഇത്തരം പരസ്യമായ വാദപ്രതിവാദങ്ങൾ പ്രവർത്തകർക്കിടയിൽ നൈരാശ്യം ഉണ്ടാക്കും,” അദ്ദേഹം മുന്നറിയിപ്പ് നൽകി.

തിരഞ്ഞെടുപ്പിൽ മത്സരിക്കാത്ത ഒരാളെ മുഖ്യമന്ത്രിയാക്കുന്നതിനെക്കുറിച്ചുള്ള ചോദ്യത്തിന്, കേരളത്തിൽ മുൻപും അത്തരം സംഭവങ്ങൾ ഉണ്ടായിട്ടുണ്ടെന്ന് സലാം ഓർമ്മിപ്പിച്ചു. താൻ അതിനെ ന്യായീകരിക്കുകയല്ലെന്നും എന്നാൽ നിലവിൽ അത്തരം ചർച്ചകൾ ലീഗ് നടത്തിയിട്ടില്ലെന്നും അദ്ദേഹം പറഞ്ഞു. മുഖ്യമന്ത്രിയുടെ കാര്യത്തിൽ കോൺഗ്രസ് ഹൈക്കമാൻഡ് എടുക്കുന്ന തീരുമാനത്തിനൊപ്പം ലീഗ് നിൽക്കുമെന്നും അദ്ദേഹം കൂട്ടിച്ചേർത്തു. ഫലം വരാൻ ദിവസങ്ങൾ മാത്രം ബാക്കി നിൽക്കെ യുഡിഎഫിലെ ഈ പടലപ്പിണക്കം രാഷ്ട്രീയ എതിരാളികൾ ആയുധമാക്കുകയാണ്.