പതിനെട്ട് പടികളിൽ പട്ടും പൂക്കളും ദീപാലങ്കാരവും; ശബരിമല പടിപൂജ ഇന്നുമുതൽ

ശബരിമല മകരവിളക്ക് തീർത്ഥാടനകാലത്തെ പടിപൂജ ജനുവരി 16ന് ആരംഭിക്കും. ദീപാരാധനയ്ക്ക് ശേഷം നടക്കുന്ന ഒരു മണിക്കൂർ നീളുന്ന പൂജയിൽ ഭക്തർക്ക് പ്രവേശനമില്ല. ജനുവരി 19 വരെ സ്പോട്ട് ബുക്കിംഗ് സൗകര്യവും വെർച്വൽ ക്യൂ ബുക്കിംഗും ലഭ്യമായിരിക്കും. ജനുവരി 20ന് നട അടയ്ക്കുന്നതോടെ മഹോത്സവത്തിന് സമാപനമാകും

ശബരിമല: മകരവിളക്ക് തീര്‍ത്ഥാടനകാലത്തെ പടിപൂജയ്ക്ക് ജനുവരി 16ന് തുടക്കമാകും. വ്രതാനുഷ്ഠാനങ്ങളോടെ ഇരുമുടിക്കെട്ടേന്തി ദര്‍ശനത്തിനായി ഭക്തര്‍ കയറുന്ന പതിനെട്ടു പടികളിലും പൂക്കളും പട്ടുവസ്ത്രങ്ങളും ദീപങ്ങളും അര്‍പ്പിച്ചാണ് പടിപൂജ നടത്തുക. ദീപാരാധനയ്ക്ക് ശേഷം 6.45 മണിയോടെ പൂജ നടക്കും. തന്ത്രി കണ്ഠരര് മഹേഷ് മോഹനരുടെയും മേല്‍ശാന്തി ഇ.ഡി പ്രസാദ് നമ്പൂതിരിയുടെയും കാര്‍മികത്വത്തിലാണ് ഒരു മണിക്കൂറോളം നീളുന്ന പൂജ. ഈ സമയം ഭക്തര്‍ക്ക് പ്രവേശനമില്ല. ഓരോ പടിയിലും ദേവചൈതന്യം ആവാഹിച്ചിട്ടുണ്ടെന്നാണ് വിശ്വാസം.

ജനുവരി 19 വരെ സ്പോട്ട് ബുക്കിംഗ്

ശബരിമല ദര്‍ശനത്തിനായുള്ള സ്പോട്ട് ബുക്കിംഗ് കൗണ്ടറുകള്‍ മകരവിളക്ക് മഹോത്സവത്തിന്റെ ഭാഗമായി അയ്യപ്പഭക്തര്‍ക്ക് ദര്‍ശനം അനുവദിക്കുന്ന ജനുവരി 19 വരെ പ്രവര്‍ത്തിക്കും. പമ്പ, നിലയ്ക്കല്‍, എരുമേലി എന്നിവിടങ്ങളിലാണ് സ്പോട്ട് ബുക്കിംഗ് സൗകര്യമുള്ളത്. വെര്‍ച്വല്‍ ക്യൂ ബുക്കിംഗും ജനുവരി 19 വരെയുണ്ടാകും. ജനുവരി 17 വരെയാണ് തിരുവാഭരണം ചാര്‍ത്തിയുള്ള അയ്യപ്പദര്‍ശനം. ജനുവരി 18 വരെയാണ് നെയ്യഭിഷേകം. ജനുവരി 19 രാത്രി വരെ ഭക്തര്‍ക്ക് ദര്‍ശന സൗകര്യമുണ്ട്. ജനുവരി 18 വരെ ഓരോ ദിവസവും വെര്‍ച്വല്‍ ക്യൂ വഴി 50,000 പേരെയും സ്പോട്ട് ബുക്കിംഗ് വഴി 5,000 പേരെയും പ്രവേശിപ്പിക്കും. ജനുവരി 19ന് വെര്‍ച്വല്‍ ക്യൂ വഴി 30,000 പേരെയും സ്പോട്ട് ബുക്കിംഗ് വഴി 5,000 പേരെയും കടത്തിവിടും. ജനുവരി 19 ന് മാളികപ്പുറത്ത് ഗുരുതി നടക്കും. ജനുവരി 20ന് പന്തളം രാജപ്രതിനിധി ദര്‍ശനം നടത്തിയതിന് ശേഷം മണ്ഡല, മകരവിളക്ക് മഹോത്സവത്തിന് സമാപനം കുറിച്ച് നടഅടയ്ക്കും.

ശബരിമലയില്‍ നാളത്തെ ചടങ്ങുകള്‍ (16.01.2026)

നട തുറക്കുന്നത്- പുലര്‍ച്ചെ 3
നിര്‍മ്മാല്യം, അഭിഷേകം- 3 മുതല്‍ 3.30 വരെ
ഗണപതിഹോമം- 3.20 മുതല്‍
നെയ്യഭിഷേകം- 3.30 മുതല്‍ 11വരെ
ഉഷ:പൂജ- 7.30 മുതല്‍ 8 വരെ
ഉദയാസ്തമന പൂജ – 8 മുതല്‍ 9 വരെ
കലശം, കളഭം- 11.30 മുതല്‍ 12 വരെ
ഉച്ചപൂജ- 12.00
നട അടയ്ക്കല്‍- ഉച്ച 1.00
ഉച്ചകഴിഞ്ഞ് നട തുറക്കല്‍-3.00
ദീപാരാധന- വൈകിട്ട് 6.30
6.45 മുതല്‍ പടി പൂജ
അത്താഴ പൂജ- രാത്രി 8.30
9 മുതല്‍ എഴുന്നള്ളത്ത്
ഹരിവരാസനം- 10.50
നട അടയ്ക്കല്‍- 11.00