കെഎസ്ആർടിസി ജീവനക്കാരുടെ ശമ്പളം ഒറ്റ ഗഡുവായി നൽകുമെന്ന് ഗതാഗത വകുപ്പ് മന്ത്രി കെബി ഗണേഷ് കുമാർ. ജീവനക്കാരുടെ ശമ്പളം ഒരുമിച്ച് വിതരണം ചെയ്യാൻ മുഖ്യമന്ത്രി പിണറായി വിജയൻ നിർദേശം നൽകി.
മന്ത്രിയായി താൻ ചുമതലയേറ്റതിനു പിന്നാലെ ഒറ്റ ഗഡുവയി ശമ്പളം നൽകാനുള്ള സംവിധാനം ഒരുക്കാൻ പറ്റുമോ എന്ന് നോക്കാൻ മുഖ്യമന്ത്രി നിർദേശിച്ചിരുന്നു.
അതനുസരിച്ച് പദ്ധതികൾ തയ്യാറാക്കിയെന്നും ഗണേഷ് കുമാർ പറഞ്ഞു.കൊവിഡിന് ശേഷം കെഎസ്ആർടിസി ജീവനക്കാർക്ക് സർക്കാരാണ് ശമ്പളം നൽകുന്നത്. മുഖ്യമന്ത്രിയുടെ നേതൃത്വത്തിൽ നടന്ന യോഗത്തിൽ ഗതാഗത വകുപ്പ് ചില നിർദേശങ്ങൾ മുന്നോട്ടുവെച്ചു.
അത് ധനകാര്യ വകുപ്പ് അംഗീകരിച്ചു. ഏറ്റവും അടുത്ത ദിവസങ്ങളിൽ ജീവനക്കാർക്ക് ശമ്പളം ഒറ്റ ഗഡുവായി വിതരണം ചെയ്യുമെന്നും മുഖ്യമന്ത്രിക്ക് നന്ദിയുണ്ടെന്നും മന്ത്രി വ്യക്തമാക്കി.
