കിഴക്കമ്പലത്ത് ട്വൻ്റി 20 ആരംഭിച്ച മെഡിക്കൽ സ്റ്റോർ അടച്ചുപൂട്ടാൻ നിർദേശം നൽകി ജില്ലാ ഭരണകൂടം. തെരഞ്ഞെടുപ്പ് പെരുമാറ്റച്ചട്ടത്തിൻ്റെ ലംഘനമാണെന്ന് ചൂണ്ടിക്കാട്ടി കിഴക്കമ്പലം സ്വദേശികൾ നൽകിയ പരാതിയിൽ ജില്ലാ തെരഞ്ഞെടുപ്പ് റിട്ടേണിങ് ഓഫീസർ കൂടിയായ ജില്ലാ കളക്ടർ എൻഎസ്കെ ഉമേഷ് ആണ് നിർദേശം നൽകിയത്. മാർച്ച് 21നാണ് കിഴക്കമ്പലത്ത് ട്വൻ്റി 20 സൂപ്പർ മാർക്കറ്റിൻ്റെ മാതൃകയിൽ മെഡിക്കൽ സ്റ്റോർ ആരംഭിച്ചത്.
80 ശതമാനം വിലക്കുറവിലാണ് മരുന്നുകൾ ലഭ്യമാക്കിയിരുന്നത്.കിഴക്കമ്പലം സ്വദേശികളായ സുധീർ സിഎസ്, അൽത്താഫ് എംഎം എന്നിവരാണ് പരാതിയുമായി ജില്ലാ കളക്ടറെ സമീപിച്ചത്. 80 ശതമാനം വിലക്കുറവിൽ മരുന്നുകൾ ലഭ്യമാക്കുന്നത് വോട്ടർമാരെ സ്വാധീനിക്കാനുള്ള നീക്കമാണെന്നായിരുന്നു പരാതിയിൽ ആരോപിച്ചത്. ഇത്തരത്തിൽ സൗജന്യങ്ങളോ മറ്റ് വാഗ്ദാനങ്ങളോ നൽകി വോട്ടു പിടിക്കുന്നത് ചട്ടലംഘമാണെന്നും പരാതിയിൽ ചൂണ്ടിക്കാട്ടിയിരുന്നു.ഇരു വിഭാഗങ്ങളുടെ വിശദീകരണം കേട്ട ശേഷമാണ് മെഡിക്കൽ സ്റ്റോർ അടച്ചുപൂട്ടാൻ ജില്ലാ കളക്ടർ നിർദേശം നൽകിയത്.
പ്രഥമദൃഷ്ട്യാ പെരുമാറ്റച്ചട്ട ലംഘനം കണ്ടെത്തിയാണ് കളക്ടറുടെ ഉത്തരവിൽ വ്യക്തമാക്കുന്നു. ട്വൻ്റി 20 കൺവീന‍ർ സാബു എം ജേക്കബും പാ‍ർട്ടിയും തങ്ങളുടെ ഔദ്യോഗിക അക്കൗണ്ടുകലിൽ മെഡിക്കൽ സ്റ്റോർ ഉദ്ഘാടനം സംബന്ധിച്ചു പങ്കുവെച്ചിട്ടുള്ള വീഡിയോ നീക്കം ചെയ്യാനും കളക്ടർ നിർദേശിച്ചു.അതേസമയം മെഡിക്കൽ സ്റ്റോറിന് ട്വൻ്റി 20യുമായി ബന്ധമില്ലെന്ന് പാർട്ടി പ്രതിനിധികൾ വാദിച്ചു.
മെഡിക്കൽ സ്റ്റോർ കിഴക്കമ്പലത്ത് പ്രവർത്തിക്കുന്ന ഭക്ഷ്യസുരക്ഷാ മാ‍ർക്കറ്റിന്റെ ഭാഗമാണെന്നായിരുന്നു വാദം. എന്നാൽ ട്വൻ്റി 20 കൺവീന‍ർ സാബു എം ജേക്കബും മെഡിക്കൽ സ്റ്റോറും തമ്മിൽ നേരിട്ടു ബന്ധമുണ്ടെന്ന് വ്യക്തമാണെന്ന് കളക്ടറുടെ റിപ്പോർട്ടിൽ പറയുന്നു. മെഡിക്കൽ സ്റ്റോർ ഉദ്ഘാടനത്തിലെ സാബു എം ജേക്കബിൻ്റെ സാന്നിധ്യം വോട്ടർമാർക്ക് പാർട്ടിക്ക് അനുകൂലമായി വോട്ട് ചെയ്യാനുള്ള പ്രേരണയാകാമെന്നും റിപ്പോർട്ടിലുണ്ട്.
മാർച്ച് 21നാണ് 80 ശതമാനം വരെ വിലക്കുറവുമായി കിഴക്കമ്പലത്ത് പ്രവർത്തനം ട്വന്റി20 മെഡിക്കൽ സ്റ്റോർ പ്രവർത്തനം ആരംഭിച്ചത്. സാബു എം ജേക്കബ് ആണ് ഉദ്ഘാടനം ചെയ്തത്. ഭക്ഷ്യസുരക്ഷാ മാർക്കറ്റിന് ശേഷം, രാജ്യത്തിനുതന്നെ മാതൃകയാകുന്ന ട്വന്റി20യുടെ സ്വപ്നപദ്ധതിയാണിതെന്നായിരുന്നു സാബു എം ജേക്കബ് ഫേസ്ബുക്കിൽ കുറിച്ചത്.
