ലണ്ടന്‍: ഇംഗ്ലണ്ടിനെതിരായ ടി20 പരമ്പരക്ക് പിന്നാലെ ഏകദിന പരമ്പരക്ക് നാളെ തുടക്കം. ഓവലിലാണ് ഒന്നാം മത്സരം നടക്കുന്നത്. ഇംഗ്ലണ്ടിനെതിരായ ടി20 പരമ്പര 2-1ന് ഇന്ത്യയാണ് സ്വന്തമാക്കിയത്. അതുകൊണ്ട് തന്നെ മൂന്ന് മത്സര ഏകദിന പരമ്പര സ്വന്തമാക്കി ശക്തമായ തിരിച്ചുവരവ് നടത്തേണ്ടത് ആതിഥേയരെ സംബന്ധിച്ച് അഭിമാന പ്രശ്‌നമാണ്. ഇന്ത്യന്‍ സമയം വൈകീട്ട് 5.30നാണ് മത്സരം. സോണി ചാനലുകളില്‍ മത്സരം തത്സമയം കാണാനാവും.
ശക്തമായ താരനിരയോടെയാണ് ഇന്ത്യ ഇംഗ്ലണ്ടിനെതിരേ ഇറങ്ങുന്നത്. രോഹിത് ശര്‍മയുടെ ക്യാപ്റ്റന്‍സിക്ക് കീഴിലിറങ്ങുന്ന ടീമില്‍ ഓപ്പണറായി ശിഖര്‍ ധവാനുമുണ്ട്. ഇന്ത്യയെ സംബന്ധിച്ച് വലിയ ആത്മവിശ്വാസത്തോടെയാണ് ഏകദിന പരമ്പരക്കിറങ്ങുന്നത്. ടി20 പരമ്പര നേടിയതിന് പിന്നാലെ ഇന്ത്യന്‍ താരങ്ങളുടെ പ്രകടനവും പ്രതീക്ഷ നല്‍കുന്നതാണ്.
അതേ സമയം ഇംഗ്ലണ്ട് നിസാരക്കാരുടെ നിരയല്ല. ജോസ് ബട്‌ലര്‍ക്ക് കീഴിലിറങ്ങുന്ന ഇംഗ്ലണ്ടില്‍ മികച്ച താരങ്ങള്‍ ഏറെയാണ്. ജോണി ബെയര്സ്റ്റോ, ജോ റൂട്ട്, ബെന്‍ സ്‌റ്റോക്‌സ് എന്നീ മൂന്ന് വമ്പന്മാരും ഏകദിന ടീമിലേക്ക് തിരിച്ചെത്തിയിട്ടുണ്ട്. ഇന്ത്യയെ ടെസ്റ്റില്‍ കണ്ണീരണിയിച്ച ഈ മൂന്ന് പേരും ഏകദിന ടീമിലേക്കെത്തുമ്പോള്‍ ഇന്ത്യക്ക് കാര്യങ്ങള്‍ എളുപ്പമാവില്ലെന്നുറപ്പ്.
സാധ്യതാ 11: ഇന്ത്യ- രോഹിത് ശര്‍മ, ശിഖര്‍ ധവാന്‍, വിരാട് കോലി, സൂര്യകുമാര്‍ യാദവ്, ഹര്‍ദിക് പാണ്ഡ്യ, റിഷഭ് പന്ത്, രവീന്ദ്ര ജഡേജ, ശര്‍ദുല്‍ ഠാക്കൂര്‍, മുഹമ്മദ് ഷമി, ജസ്പ്രീത് ബുംറ, യുസ് വേന്ദ്ര ചഹാല്‍.
ഇംഗ്ലണ്ട്- ജോസ് ബട്‌ലര്‍, ജോണി ബെയര്സ്റ്റോ, ജോ റൂട്ട്, ലിയാം ലിവിങ്‌സ്റ്റണ്‍, ബെന്‍ സ്‌റ്റോക്‌സ്, മോയിന്‍ അലി, സാം കറെന്‍, ക്രെയ്ഗ് ഓവര്‍ട്ടന്‍, ഡേവിഡ് വില്ലി, മാറ്റ് പാര്‍ക്കിന്‍സണ്‍, റീസി ടോപ്ലി
