മൈസൂരു: ഭര്‍ത്താവിനും ഭര്‍തൃപിതാവിനുമെതിരെ പരാതിയുമായി കന്നഡ നടി. തന്റെ ബാങ്ക് അക്കൗണ്ട് ദുരുപയോഗം ചെയ്‌തെന്ന് ആരോപിച്ച് കന്നഡ നടി ചൈത്ര ഹല്ലികെരിയാണ് പരാതിയുമായി രംഗത്തെത്തിയിരിക്കുന്നത്.
ഭര്‍ത്താവിനും ഭര്‍ത്തൃപിതാവിനുമെതിരെ ഇവര്‍ പോലീസില്‍ പരാതി നല്‍കി. സംഭവത്തില്‍ മൈസൂരുവിലെ ജയലക്ഷ്മിപുരം പോലീസ് കേസ് എടുത്തിട്ടുണ്ട് അന്വേഷണമാരംഭിച്ചതായും പോലീസ് അറിയിച്ചു.
തന്റെ അറിവില്ലാതെ ബാങ്ക് അക്കൗണ്ട് വഴി ഭര്‍ത്താവ് ബാലാജിയും അദ്ദേഹത്തിന്റെ പിതാവും ചേര്‍ന്ന് സ്വര്‍ണവായ്പ എടുത്തുവെന്ന് നടി പരാതിയില്‍ പറയുന്നു. വായ്പ എടുത്തിരിക്കുന്ന പൊതുമേഖലാ ബാങ്കിന്റെ ശാഖാ മാനേജര്‍ക്ക് സംഭവത്തില്‍ പങ്കുണ്ടെന്നും പരാതിയില്‍ ആരോപിക്കുന്നു. 2006ലാണ് ചൈത്ര വിവാഹിതയായത്. 2014 വരെ മൈസൂരുവിലായിരുന്നു ചൈത്ര താമസിച്ചിരുന്നത്. പിന്നീട് ബെംഗളൂരുവിലേക്ക് താമസം മാറ്റി. മൈസൂരുവില്‍ താമസിച്ചിരുന്നപ്പോഴാണ് ഭര്‍ത്താവിന്റെ നിര്‍ദേശപ്രകാരം ബാങ്കിന്റെ ജയലക്ഷ്മിപുരം ശാഖയില്‍ അക്കൗണ്ട് ആരംഭിച്ചത്.
ബെംഗളൂരുവിലേക്ക് താമസം മാറിയശേഷം അക്കൗണ്ടില്‍ താന്‍ ഇടപാടൊന്നും നടത്തിയിട്ടില്ലെന്നും തന്റെ ഒപ്പ് വ്യാജമായി ഇട്ട് ഭര്‍ത്താവും ഭര്‍ത്താവിന്റെ പിതാവും വായ്പ എടുക്കുകയായിരുന്നെന്നും ചൈത്ര പരാതിയില്‍ പറയുന്നു.പോലീസില്‍ പരാതി നല്‍കിയതിന് പിന്നാലെ ഭര്‍ത്താവില്‍നിന്ന് തനിക്ക് വധഭീഷണി ലഭിച്ചിട്ടുണ്ടെന്നും ചൈത്ര പറഞ്ഞു. നേരത്തെയും ഭര്‍ത്താവിന് എതിരെ പരാതിയുമായി നടി രംഗത്തെത്തിയിരുന്നു.ഭര്‍ത്താവ് ശാരീരികമായി അക്രമിച്ചുവെന്ന് ചൂണ്ടിക്കാണിച്ചുകൊണ്ടായിരുന്നു ഇവര്‍ പോലീസില്‍ പരാതി നല്‍കിയത്.’ഗുരുശിഷ്യ’, ‘ശ്രീധാനമ്മ ദേവി’ എന്നീ ചിത്രങ്ങളില്‍ ചൈത്ര അഭിനയിച്ചിട്ടുണ്ട്.
