ദില്ലി: പശ്ചിമഘട്ട മലനിരകള്‍ വന്‍ അപകടത്തിലെന്നു മുന്നറിയിപ്പു നല്‍കി യുനെസ്കോ. കേരളം ഉള്‍പ്പെടെ ആറു സംസ്ഥാനങ്ങളുടെ ജീവനാഡിയായ പശ്ചിമഘട്ടം അപായ മുനമ്ബിലെന്ന് യുനെസ്കോയുടെ പരിസ്ഥിതി റിപ്പോര്‍ട്ട് വ്യക്തമാക്കുന്നു. അടിയന്തര സംരക്ഷണ നടപടികളുണ്ടായില്ലെങ്കില്‍ ജൈവവൈവിധ്യങ്ങള്‍ക്കൊപ്പം പശ്ചിമഘട്ടത്തെ ആശ്രയിക്കുന്ന ജനതയുടെ ജീവിതം ദുരിതപൂര്‍ണമാകുമെന്നും ചൂണ്ടിക്കാട്ടുന്നു. പ്രകൃതിസംരക്ഷണത്തില്‍ യുനെസ്കോയുടെ ഔദ്യോഗിക ഉപദേശകസമിതിയായ ഇന്റര്‍നാഷണല്‍ യൂണിയന്‍ ഫോര്‍ കണ്‍സര്‍വേഷന്‍ ഓഫ് നേച്ചര്‍ (ഐ.യു.സി.എന്‍.) ആണ് അവലോകന റിപ്പോര്‍ട്ട് തയ്യാറാക്കിയിരിക്കുന്നത്.
ആദ്യമായാണ് പശ്ചിമഘട്ടമെന്ന അപൂര്‍വ ജൈവവൈവിധ്യ മണ്ഡലത്തിന്റെ സംരക്ഷണത്തില്‍ യുനെസ്കോ ആശങ്ക അറിയിക്കുന്നത്.റിപ്പോര്‍ട്ട് പ്രകാരം ‘ഗൗരവതരമായ ഉത്കണ്ഠ’ വേണ്ട ഇടമായാണ് പശ്ചിമഘട്ടത്തെ അടയാളപ്പെടുത്തിയിരിക്കുന്നത്. ഇന്ത്യയില്‍നിന്ന് ഈ പട്ടികയിലുള്ള മറ്റൊരിടം അസമിലെ മനാസ് വന്യജീവിസങ്കേതമാണ്. പശ്ചിമഘട്ടത്തിന്റെ ജൈവമണ്ഡലം തന്നെ അതിരുകടന്ന ചൂഷണംമൂലം ഭീഷണിയിലാണെന്നു ചൂണ്ടിക്കാണിക്കപ്പെടുന്നു. കാലാവസ്ഥാ വ്യതിയാനം, അതിതീവ്ര മഴ-വേനല്‍, ജല-വായു മലിനീകരണം, വിനോദസഞ്ചാര പ്രവൃത്തികള്‍, വനനശീകരണം, വേട്ടയാടല്‍, വനത്തിനുള്ളിലെ റോഡ്-റെയില്‍ പദ്ധതികള്‍, ഡാമുകള്‍, ഖനി-ക്വാറി വ്യവസായങ്ങള്‍, കാട്ടുതീ തുടങ്ങിയവയാണ് പശ്ചിമഘട്ടത്തെ നാശോന്മുഖമാക്കുന്നതെന്ന് റിപ്പോര്‍ട്ട് ചൂണ്ടിക്കാട്ടുന്നു. ഇതിനെ മറികടക്കാന്‍ പ്രകൃതിസംരക്ഷണത്തിന് മധ്യ-ദീര്‍ഘകാല പദ്ധതികള്‍ വേണമെന്നാണ് ഐ.യു.സി.എന്നിന്റെ വിലയിരുത്തല്‍.
എന്തുകൊണ്ട്‌ പശ്ചിമഘട്ടം സംരക്ഷിക്കണം?
കേരളത്തിന്റെ ഭൂമിശാസ്ത്രത്തില്‍ പ്രഥമ പങ്ക് വഹിക്കുന്ന മലനിരകളാണ് പശ്ചിമഘട്ട മലനിരകള്‍. കേരളം പുഴകളാല്‍ സമൃദ്ധമാകുന്നതിനു കാരണം തന്നെ പശ്ചിമഘട്ടമാണ്. ഇന്ത്യയിലെ മറ്റ് ഭാഗങ്ങളില്‍ നിന്ന് ഒരു കോട്ട പോലെ കേരളത്തെ വേര്‍തിരിച്ച്‌ നിറുത്തുന്ന ഈ മല ലോകത്തിലെ ജൈവവൈവിദ്ധ്യ പ്രദാനമായ 10 കേന്ദ്രങ്ങളിലൊന്നാണ് പശ്ചിമഘട്ടം.സഹ്യാദ്രി, സഹ്യപര്‍വതം എന്നീ പേരുകളിലും അറിയപ്പെടുന്ന പശ്ചിമഘട്ടം ഇടതൂര്‍ന്ന നിത്യഹരിത വനങ്ങള്‍ കൊണ്ട് ആവരണം ചെയ്യപ്പെട്ടിരിക്കുന്നു.ഗുജറാത്ത്, മഹാരാഷ്ട്ര, ഗോവ, കര്‍ണാടക, കേരളം, തമിഴ്നാട് എന്നീ പ്രദേശങ്ങളിലായി വ്യാപിച്ചുകിടക്കുന്ന 1600 കി.മീറ്ററാണ് ഇതിന്റെ ദൈര്‍ഘ്യം. ദക്ഷിണേന്ത്യയുടെ ജലസ്രോതസ്സും, ജൈവവൈവിധ്യകലവറയുമാണ്‌ പശ്ചിമഘട്ടം. അറബിക്കടലില്‍ നിന്ന് വരുന്ന നീരാവി നിറഞ്ഞ കാറ്റിനെ തടഞ്ഞുനിര്‍ത്തി വര്‍ഷാവര്‍ഷം മഴപെയ്യിക്കുന്നത്‌ ഈ മലനിരകളാണ്. മഴ വളരെയേറെ ലഭിക്കുന്ന ഈ പ്രദേശം മെച്ചപ്പെട്ട പരിസ്ഥിതിയും ജൈവവൈവിധ്യവുമുള്ളതാണ്‌. ലോകത്തിലെ 35 ജൈവവൈവിധ്യ സമ്ബന്നമായ സ്ഥാനങ്ങളില്‍ ഒന്നാണ്‌ പശ്ചിമഘട്ടം. അതില്‍ത്തന്നെ, അപൂര്‍വമായ എട്ട്‌ സ്ഥാനങ്ങള്‍ തെരഞ്ഞെടുത്തതിലൊന്ന്‌ പശ്ചിമഘട്ടമാണ്. ഈ മലനിരകള്‍ ഓരോ പ്രദേശത്തും (നിത്യഹരിത ഉഷ്‌ണമേഖലാ വനങ്ങള്‍, ചോലമഴക്കാടുകള്‍ എന്നിങ്ങനെ) വിവിധ സസ്യ-ജന്തു വൈവിധ്യത്തിന്റെ ആവാസകേന്ദ്രമാണ്‌. സസ്യങ്ങളില്‍, രാജ്യത്തെ ആകെ പുഷ്‌പിക്കുന്ന ചെടികളില്‍ 27%, അതായത്‌ 4000 ത്തോളം ഇനങ്ങള്‍, 56.6% വരുന്ന (645 തരം) നിത്യഹരിതപുഷ്‌പങ്ങള്‍, 682 ഇനം പായലുകള്‍, 280 ഇനം വര്‍ണലതകള്‍ എന്നിവയൊക്കെ ഇവിടെ ഉണ്ട്‌. ജന്തുക്കളില്‍ 350 തരം ഉറുമ്ബുകള്‍, 1000ത്തില്‍ പരമെങ്കിലും പ്രാണികള്‍, 320 തരം ചിത്രശലഭ ങ്ങള്‍, 174 തരം തുമ്ബികള്‍, 269 തരം ഒച്ചുകള്‍, 288 തരം മത്സ്യങ്ങള്‍, 500ലേറെ പക്ഷി ഇനങ്ങള്‍, 120 തരം സസ്‌തനികള്‍ എന്നിവയെയും കാണുന്നു.
