മുതിര്‍ന്ന കോണ്‍ഗ്രസ് നേതാവും അന്തരിച്ച മുന്‍ മുഖ്യമന്ത്രി കെ കരുണാകരന്റെ മകളുമായ പത്മജ വേണുഗോപാല്‍ പാർട്ടി വിടുന്നു. പത്മജ ഇന്ന് ബിജെപി അംഗത്വം(BJP membership) സ്വീകരിച്ചേക്കും. കഴിഞ്ഞ ദിവസം ഡൽഹിയിലെത്തിയ പത്മജ ബിജെപി ദേശീയനേതൃത്വവുമായി ചര്‍ച്ച നടത്തിയെന്നാണ് വിവരം. കോൺഗ്രസ് നേതാവ് എകെ ആന്റണിയുടെ മകനായ അനില്‍ ആന്റണിക്ക് പിന്നാലെ കെ കരുണാകരന്റെ മകളും ബിജെപിയിലേക്ക് പോകുന്നതിന്റെ ഞെട്ടലിലാണ് പാർട്ടി നേതൃത്വം.
പത്മജ ബിജെപിയിൽ ചേരുമെന്ന് ഇന്നലെയാണ് വാർത്ത പ്രചരിച്ചത്. ഇതിനിടെ താനൊരു തമാശ പറഞ്ഞതാണെന്നും അത് ഇങ്ങിനെ വരും എന്ന് വിചാരിച്ചില്ലെന്നും അവർ പ്രതികരിച്ചു. ഇക്കാര്യം വിശദീകരിച്ച് പത്മജ ഫേസ്ബുക്കിലും ഒരു പോസ്റ്റ് പങ്കുവെച്ചിരുന്നു.
‘ഞാൻ ബിജെപി യിൽ പോകുന്നു എന്നൊരു വാർത്ത ഏതോ മാധ്യമത്തിൽ വന്നു എന്ന് കേട്ടു . എവിടെ നിന്നാണ ഇത് വന്നത് എന്ന് എനിക്കറിയില്ല .എന്നോട് ഒരു ചാനൽ ചോദിച്ചപ്പോൾ ഈ വാർത്ത ഞാൻ നിഷേധിച്ചതാണ് ,ഇപ്പോഴും ഞാൻ അത് ശക്തമായി നിഷേധിക്കുന്നു .
അവർ എന്നോട് ചോദിച്ചു ഭാവിയിൽ പോകുമോ എന്ന് , ഞാൻ പറഞ്ഞു ഇന്നത്തെ കാര്യമല്ലേ പറയാൻ പറ്റു നാളെ കാര്യം എനിക്ക് എങ്ങിനെ പറയാൻ പറ്റും എന്ന് തമാശ ആയി പറഞ്ഞു .അത് ഇങ്ങിനെ വരും എന്ന് വിചാരിച്ചില്ല’, പത്മജ ഫേസ്ബുക്കിൽ കുറിച്ചു. എന്നാല്‍, പിന്നീട് ഈ ഫേസ്ബുക്ക് പോസ്റ്റ് പത്മജ വേണുഗോപാല്‍ പിന്‍വലിച്ചു. ഇതിനിടെ പത്മജ തന്റെ ഫേസ്ബുക്ക് ബയോയും മാറ്റി.
ഇന്ത്യന്‍ പൊളിറ്റിഷന്‍ ഫ്രം കേരള എന്നാണ് പത്മജ ഫേസ്ബുക്ക് ബയോ മാറ്റിയത്.ലോക്‌സഭാ തിരഞ്ഞെടുപ്പിൽ 2004ല്‍ കോണ്‍ഗ്രസ് സ്ഥാനാര്‍ത്ഥിയായി പത്മജ മുകുന്ദപുരത്ത് നിന്ന് മത്സരിച്ചിരുന്നു. പിന്നീട് തൃശൂരിൽ നിന്ന് 2021 ല്‍ നിയമസഭയിലേക്കും മത്സരിച്ചും. രണ്ടിടത്തും പത്മജ വേണുഗോപാല്‍ പരാജയപ്പെട്ടിരുന്നു. ഇതിനിടെ താൻ പാർട്ടി വിടുമെന്ന സാധ്യത തള്ളിക്കളയുന്നില്ലെന്ന് പത്മജ പറഞ്ഞു.
മാറ്റം ഈ തിരഞ്ഞെടുപ്പിനു ശേഷമാകുമെന്ന് കോണ്‍ഗ്രസുമായി ഗുരുതര പ്രശ്നങ്ങളുണ്ടെന്നും പത്മജ കൂട്ടിച്ചേർത്തു. എന്നാൽ വാർത്ത വന്ന ശേഷം അവര്‍ ഇക്കാര്യം തള്ളിക്കളയുകയാണ് ചെയ്തത്. നിലവിൽ സംസ്ഥാന കോൺഗ്രസിന്റെ ജനറൽ സെക്രട്ടറിമാരിൽ ഒരാളായ പത്മജ.
