കളിക്കളത്തിലെ വിസ്മയങ്ങൾക്കപ്പുറം കാരുണ്യ പ്രവർത്തനങ്ങളിലും ലോകത്തിന് മാതൃകയായി ഫുട്ബോൾ ഇതിഹാസം ലയണൽ മെസ്സി. സ്പെയിനിലെ ബാഴ്സലോണയിൽ കുട്ടികൾക്കായുള്ള അത്യാധുനിക കാൻസർ ചികിത്സാ കേന്ദ്രം നിർമിക്കുന്നതിനായി മെസ്സി 26 ലക്ഷം യൂറോ(ഏകദേശം 23 കോടിയോളം രൂപ) സംഭാവന നൽകി. സാന്ത്വാൻ ഡി ഡ്യൂ ഹോസ്പിറ്റലിന്റെ കീഴിൽ യൂറോപ്പിലെ തന്നെ ഏറ്റവും വലിയ പീഡിയാട്രിക് ഓങ്കോളജി സെന്ററുകളിലൊന്നായി മാറുന്ന ‘എസ്ജെഡി പീഡിയാട്രിക് കാൻസർ സെന്റർ ബാഴ്സലോണ’ എന്ന പദ്ധതി പൂർത്തിയാക്കാനാണ് ലിയോ മെസ്സി ഫൗണ്ടേഷൻ വഴി താരം ഈ സഹായം എത്തിച്ചത്.
കാൻസർ ബാധിതരായ കുരുന്നുകൾക്ക് സാന്ത്വനമായി പീഡിയാട്രിക് സെന്റർ
വർഷങ്ങളായി നിർമാണ പ്രവർത്തനങ്ങൾ പുരോഗമിക്കുന്ന ഈ സ്വപ്ന പദ്ധതിക്ക് ആവശ്യമായ ആകെ തുകയായ മൂന്ന് കോടി യൂറോ സമാഹരിക്കുന്നതിൽ അവസാന ഘട്ടത്തിലെ വലിയ തടസ്സങ്ങൾ നീക്കാനാണ് മെസ്സിയുടെ ഇടപെടൽ തുണയായത്. പദ്ധതി പൂർത്തിയാക്കാൻ പണം തികയാതെ വന്ന നിർണായക ഘട്ടത്തിലാണ് ശേഷിച്ച തുക പൂർണമായി ഏറ്റെടുക്കാൻ ലിയോ മെസ്സി ഫൗണ്ടേഷനും സ്റ്റാവ്റോസ് നിയാർക്കോസ് ഫൗണ്ടേഷനും തീരുമാനിച്ചത്. കുട്ടികളിലെ കാൻസർ രോഗനിർണയത്തിനും നൂതന ചികിത്സകൾക്കും ഗവേഷണങ്ങൾക്കും അന്താരാഷ്ട്ര നിലവാരമുള്ള സൗകര്യങ്ങളാണ് ഈ ആശുപത്രിയിൽ ഒരുങ്ങുന്നത്. വർഷം തോറും അർബുദബാധിതരായ നൂറുകണക്കിന് കുട്ടികൾക്ക് ആശ്വാസമേകാൻ ഈ കേന്ദ്രത്തിന് സാധിക്കും.
തന്റെ ഫുട്ബോൾ കരിയറിന്റെ സുവർണ കാലഘട്ടം ചെലവഴിച്ച ബാഴ്സലോണ നഗരത്തോടുള്ള ആഴത്തിലുള്ള കടപ്പാടും സ്നേഹവുമാണ് ഈ കാരുണ്യപ്രവർത്തനത്തിലൂടെ വീണ്ടും തെളിയുന്നത്. കരിയറിൽ എവിടെയെത്തിയാലും ബാഴ്സലോണയിലെ ജനങ്ങളോടും തന്നെ വളർത്തിയ നാടിനോടുമുള്ള പ്രതിബദ്ധത താരം കാത്തുസൂക്ഷിക്കുന്നു. ഈ പദ്ധതിയുടെ പ്രചാരണ പരിപാടികൾ ആരംഭിച്ച കാലം മുതൽ അതിന്റെ മുഖമായി പ്രവർത്തിച്ചതും മെസ്സിയായിരുന്നു. ക്യാൻസർ ബാധിതരായ കുട്ടികളുടെ മുഖത്ത് പുഞ്ചിരി വിടർത്താനും അവരുടെ ജീവൻ രക്ഷിക്കാനുള്ള സംവിധാനങ്ങൾ ഒരുക്കാനും സാധിച്ചതിൽ വലിയ ചാരിതാർഥ്യമുണ്ടെന്ന് താരം അറിയിച്ചു. ഓരോ കുട്ടിക്കും ഏറ്റവും മികച്ച ചികിത്സ ഉറപ്പാക്കുക എന്നത് ഒരു സമൂഹത്തിന്റെ കടമയാണെന്നും മെസ്സി വ്യക്തമാക്കി.
2007ൽ സ്ഥാപിതമായ ലിയോ മെസ്സി ഫൗണ്ടേഷൻ ലോകമെമ്പാടുമുള്ള പിന്നാക്കാവസ്ഥയിലുള്ള കുട്ടികളുടെ ആരോഗ്യം, വിദ്യാഭ്യാസം, കായിക വികസനം എന്നിവ ലക്ഷ്യമിട്ട് നിരന്തരം പ്രവർത്തിച്ചുവരികയാണ്. നേരത്തെയും അർജന്റീനയിലും സ്പെയിനിലും അടക്കം ഒട്ടേറെ ആരോഗ്യ കേന്ദ്രങ്ങൾക്കും സ്കൂളുകൾക്കും ഫൗണ്ടേഷൻ ധനസഹായം നൽകിയിട്ടുണ്ട്. കോവിഡ് കാലത്തും മറ്റ് പ്രകൃതിദുരന്ത ഘട്ടങ്ങളിലും മെസ്സി നടത്തിയ ഇടപെടലുകൾ അന്താരാഷ്ട്ര ശ്രദ്ധ നേടിയിരുന്നു. ഇപ്പോൾ അമേരിക്കൻ മേജർ ലീഗ് സോക്കർ ക്ലബ്ബായ ഇന്റർ മയാമിക്ക് വേണ്ടി കളിക്കുമ്പോഴും യൂറോപ്പിലെയും ലാറ്റിനമേരിക്കയിലെയും സാമൂഹിക പ്രവർത്തനങ്ങളിൽ സജീവ സാന്നിധ്യമായി താരം തുടരുന്നു.
മെസ്സിയുടെ ഉദാത്തമായ കാരുണ്യപ്രവർത്തനത്തെ അന്താരാഷ്ട്ര കായികലോകവും ആരോഗ്യപ്രവർത്തകരും വലിയ തോതിൽ പ്രശംസിച്ചു. മൈതാനത്തെ കിരീടനേട്ടങ്ങളേക്കാൾ ഇത്തരം ജീവൻരക്ഷാ പദ്ധതികളിൽ പങ്കാളിയാകുന്നത് താരത്തിന്റെ സാമൂഹിക ഉത്തരവാദിത്തത്തെ ഉയർത്തിക്കാട്ടുന്നുവെന്ന് ആശുപത്രി അധികൃതർ ചൂണ്ടിക്കാട്ടി. ആശുപത്രി സമുച്ചയത്തിന്റെ നിർമാണം പൂർത്തിയായതോടെ സാമ്പത്തികമായി പിന്നാക്കം നിൽക്കുന്ന കുടുംബങ്ങളിലെ കുട്ടികൾക്കും സൗജന്യവും കാര്യക്ഷമവുമായ ചികിത്സ ഉറപ്പാക്കാൻ സാധിക്കും.
