ഇന്ന് ലോക പ്രകൃതി സംരക്ഷണ ദിനം (World Nature Conservation Day). ‘പുനഃസ്ഥാപനം, പ്രതിരോധം, ഉത്തരവാദിത്തം’ എന്നതാണ് ഇത്തവണത്തെ ദിനാചരണത്തിന്റെ പ്രമേയം (Theme 2026). പ്രകൃതിവിഭവങ്ങൾ, കാടുകൾ, വന്യജീവികൾ, മണ്ണ്, ജലം എന്നിവ സംരക്ഷിക്കേണ്ടതിന്റെ പ്രാധാന്യം ഓർമ്മിപ്പിക്കുന്നതിനായാണ് എല്ലാ വർഷവും ഈ ദിനം ആചരിക്കുന്നത്. പരിസ്ഥിതി നാശത്തിനെതിരെ പ്രതിരോധം വളർത്തുക എന്നതാണ് ലക്ഷ്യം.
കുടിവെള്ളം, ശുദ്ധവായു, വനങ്ങൾ, ധാതുക്കൾ തുടങ്ങിയ പ്രകൃതി വിഭവങ്ങളുടെ ചൂഷണത്തെ ചോദ്യം ചെയ്യുകയും തടയുകയും ചെയ്യുക എന്നത് ലോക പ്രകൃതി സംരക്ഷണ ദിനാചരണത്തിന്റെ പ്രധാന ലക്ഷ്യമാണ്. ജൈവവൈവിധ്യ സംരക്ഷണവും ലക്ഷ്യങ്ങളിലൊന്നാണ്. അപൂർവ്വ ജീവിവർഗ്ഗങ്ങളുടെയും സസ്യങ്ങളുടെയും വംശനാശം തടയാനുള്ള ശ്രമങ്ങൾ നടത്തുന്നതിന് ഈ ദിനത്തിൽ തുടക്കമിടുന്നു.
വനനശീകരണവും മലിനീകരണവും കുറച്ച് ആഗോളതാപനത്തെ ചെറുക്കുക എന്ന ലക്ഷ്യവും ഈ ദിനാചരണത്തിനുണ്ട്. വീട്ടുമുറ്റത്തും പരിസരങ്ങളിലും വൃക്ഷത്തൈകൾ നട്ടും ഈ ദിനം ആളുകൾ ആചരിക്കാറുണ്ട്. അതത് സ്ഥലങ്ങളിലെ ആവാസവ്യവസ്ഥയ്ക്ക് അനുയോജ്യമായ പ്രാദേശികമായി ലഭ്യമായ തൈകളാണ് നടേണ്ടത്.
ഇതിനെല്ലാം പുറമെയാണ് ആവശ്യത്തിനനുസരിച്ച് മാത്രം വെള്ളവും വൈദ്യുതിയും ഉപയോഗിക്കുക എന്നത്. ഊർജ്ജപരമായ മിതവ്യയം ജനങ്ങളിൽ ശീലമാക്കുക എന്ന ലക്ഷ്യവും ലോക പ്രകൃതി സംരക്ഷണ ദിനാചരണത്തിന് പിന്നിലുണ്ട്. വലിയ തോതിൽ പ്രകൃതി വിഭവങ്ങളെ ആശ്രയിച്ചാണ് ഇന്നും വൈദ്യുതോൽപ്പാദനം നടക്കുന്നത്. ഇക്കാരണത്താൽ തന്നെ വൈദ്യുതിയുടെ മിതമായ ഉപയോഗം പ്രകൃതി സംരക്ഷണത്തിന് ഒഴിച്ചുകൂടാത്തതാണ്.
പ്രകൃതി സംരക്ഷണത്തിനായി വീട്ടിൽ ചെയ്യാവുന്ന 5 കാര്യങ്ങൾ
ജല ഉപയോഗം നിയന്ത്രിക്കുക എന്നതാണ് ഒന്നാമത്തെ കാര്യം. ബ്രഷ് ചെയ്യുമ്പോഴും മറ്റും വെറുതേ ടാപ്പ് തുറന്നിടുന്ന ശീലം പലർക്കുമുണ്ട്. ഇത്തരം ദുശ്ശീലങ്ങൾ ഒഴിവാക്കിയാൽ തന്നെ ജലത്തിന്റെ അമിതമായ ഉപഭോഗം നിയന്ത്രിക്കാൻ കഴിയും. ഉപയോഗ ശേഷം ഫാൻ, ലൈറ്റ് തുടങ്ങിയവയുടെ സ്വിച്ച് ഓഫ് ചെയ്തിടേണ്ടത് പ്രധാനമാണ്. ഇങ്ങനെ ഊർജ്ജപരമായ അമിതവ്യയം നിയന്ത്രിക്കാം . പ്രകൃതിയോട് ഇണങ്ങിയുള്ള ജീവിതത്തിന് പ്ലാസ്റ്റിക് പൂർണ്ണമായും ഒഴിവാക്കുക. വെള്ളം കരുതുന്നതിനും മറ്റും സ്റ്റീൽ/ഗ്ലാസ് കുപ്പികൾ ഉപയോഗിക്കുക.
അടുക്കളയിലെ ജൈവമാലിന്യങ്ങൾ വീട്ടിൽ തന്നെ നന്നായി സംസ്കരിക്കാൻ കഴിയും. ഇനോക്കുലം ഉഫയോഗിച്ചുള്ള സംസ്കരണ രീതി വളരെ എളുപ്പമാണ്. കാര്യമായ ചെലവില്ലാത്തതുമാണ്. മുതിർന്നവരുമായി സംസാരിച്ച് ജൈവമാലിന്യ സംസ്കരണം തുടങ്ങുക. മാലിന്യം വെറുതെ വലിച്ചെറിയുന്നത് മൂലം വീട്ടിലുണ്ടാകുന്ന എലിശല്യവും പാമ്പിന്റെ ശല്യവുമെല്ലാം ഒഴിവാക്കുകയുമാകാം. ചെടികളും പച്ചക്കറിത്തോട്ടവും പരിപാലിക്കുക എന്നതാണ് പ്രകൃതി സംരക്ഷണത്തിനായി വീട്ടിൽ ചെയ്യാവുന്ന മറ്റൊരു കാര്യം. ഇതിലും മികച്ചൊരു പ്രകൃതി സംരക്ഷണ മാർഗ്ഗമില്ല.
