പശ്ചിമ ബംഗാൾ നിയമസഭാ തിരഞ്ഞെടുപ്പിന്റെ ഒന്നാം ഘട്ടത്തിൽ റെക്കോർഡ് പോളിംഗ് രേഖപ്പെടുത്തിയതിന് പിന്നാലെ, ബിജെപിയുടെ വിജയമുറപ്പാണെന്ന് കേന്ദ്ര ആഭ്യന്തര മന്ത്രി അമിത് ഷാ. മമത ബാനർജി ഭരണത്തിൽ നിന്ന് പുറത്തുപോകുകയാണെന്നും ബിജെപി അധികാരം പിടിച്ചെടുക്കുമെന്നും വെള്ളിയാഴ്ച കൊൽക്കത്തയിൽ നടത്തിയ വാർത്താ സമ്മേളനത്തിൽ അദ്ദേഹം പറഞ്ഞു. ഒന്നാം ഘട്ടത്തിൽ വോട്ടെടുപ്പ് നടന്ന 152 സീറ്റുകളിൽ 110 എണ്ണത്തിലും ബിജെപി വിജയിക്കുമെന്ന് അമിത് ഷാ ആത്മവിശ്വാസം പ്രകടിപ്പിച്ചു.
“ഞങ്ങൾക്ക് ലഭിച്ച വിവരങ്ങൾ അനുസരിച്ച്, ബംഗാളിലെ ജനങ്ങൾ തങ്ങളുടെ ഭാവി ഒന്നാം ഘട്ടത്തിൽ തന്നെ തീരുമാനിച്ചു കഴിഞ്ഞു. നരേന്ദ്ര മോദിയുടെ നേതൃത്വത്തിലുള്ള വികസനമാണ് ഈ മണ്ണ് തിരഞ്ഞെടുത്തത്. ഒന്നാം ഘട്ടത്തിലെ വോട്ടിംഗ് ശതമാനം വെളിപ്പെടുത്തുന്നത് ദീദി പടിയിറങ്ങുകയാണെന്നും ബിജെപി അധികാരത്തിൽ വരാൻ പോകുകയാണെന്നുമാണ്,” അദ്ദേഹം പറഞ്ഞു.തിരഞ്ഞെടുപ്പ് ഫലം സംബന്ധിച്ച പാർട്ടിയുടെ വിലയിരുത്തൽ വിശദീകരിച്ചുകൊണ്ട് അമിത് ഷാ കൂട്ടിച്ചേർത്തു: “152 സീറ്റുകളിൽ 110-ലധികം സീറ്റുകൾ ബിജെപി നേടും. ഇതിനർത്ഥം രണ്ടാം ഘട്ടം കഴിയുന്നതോടെ പശ്ചിമ ബംഗാളിൽ ബിജെപി സർക്കാർ രൂപീകരിക്കാൻ കഴിയുന്ന നിലയിൽ ഞങ്ങൾ എത്തുമെന്നാണ്.”
ഭീകര ഭരണത്തിന് അന്ത്യം കുറിക്കും
ബംഗാളിലെ “ഭീകര ഭരണത്തിന്” അന്ത്യം കുറിക്കുമെന്നും ബിജെപി അധികാരത്തിൽ വന്നാൽ നിയമവാഴ്ച പുനഃസ്ഥാപിക്കുമെന്നും കേന്ദ്ര മന്ത്രി വാഗ്ദാനം ചെയ്തു. “മാറ്റം എന്നാൽ നുഴഞ്ഞുകയറ്റമില്ലാത്ത ബംഗാൾ എന്നാണ് അർത്ഥം. അഴിമതി, പ്രീണനം, പിടിച്ചുപറി എന്നിവയിൽ നിന്നുള്ള മോചനവും യുവാക്കൾക്ക് തൊഴിലുമാണ് ഇതിലൂടെ ലക്ഷ്യമിടുന്നത്.” പുതിയ സർക്കാരിന് കീഴിൽ സ്ത്രീ സുരക്ഷയ്ക്കായിരിക്കും പ്രഥമ പരിഗണനയെന്നും അദ്ദേഹം ഊന്നിപ്പറഞ്ഞു.
മമത ബാനർജിക്കെതിരെ രൂക്ഷവിമർശനം ഉന്നയിച്ച അമിത് ഷാ, ബിജെപി അധികാരത്തിൽ വന്നാൽ പുറത്തുനിന്നുള്ളവരായിരിക്കും ഭരിക്കുക എന്ന കിംവദന്തിയാണ് മുഖ്യമന്ത്രി പ്രചരിപ്പിക്കുന്നതെന്ന് ആരോപിച്ചു. “ദീദിയോട് എനിക്ക് പറയാനുള്ളത് ഇതാണ്, ബംഗാളിൽ ജനിച്ച, ബംഗാളി മീഡിയത്തിൽ വിദ്യാഭ്യാസം നേടിയ, ബംഗാളി സംസാരിക്കാൻ കഴിയുന്ന ഒരാളായിരിക്കും ബംഗാളിന്റെ അടുത്ത മുഖ്യമന്ത്രി. ഒന്ന് മാത്രം ഉറപ്പാണ്, നിങ്ങളുടെ അനന്തരവൻ അവിടെ ഉണ്ടാകില്ല; ഒരു ബിജെപി പ്രവർത്തകനായിരിക്കും മുഖ്യമന്ത്രി,” അദ്ദേഹം കൂട്ടിച്ചേർത്തു.
പശ്ചിമ ബംഗാൾ നിയമസഭാ തിരഞ്ഞെടുപ്പിന്റെ വരാനിരിക്കുന്ന ഘട്ടങ്ങളിൽ വോട്ടർമാരുടെ ആവേശം ഇനിയും വർദ്ധിക്കുമെന്ന് കേന്ദ്ര ആഭ്യന്തര മന്ത്രി അമിത് ഷാ. കിഴക്കൻ ഇന്ത്യയിൽ വലിയൊരു രാഷ്ട്രീയ മാറ്റമാണ് സംഭവിക്കാൻ പോകുന്നതെന്നും മെയ് 5-ന് ശേഷം ‘അങ്ക, ബംഗ, കലിംഗ’ (ബീഹാർ, ബംഗാൾ, ഒഡീഷ) പ്രദേശങ്ങൾ ബിജെപിയും താമരയും ഭരിക്കുമെന്നും അദ്ദേഹം പ്രസ്താവിച്ചു. ഇത് കിഴക്കൻ ഇന്ത്യയുടെ വികസനത്തിന് ശുഭസൂചനയാണെന്നും അദ്ദേഹം കൂട്ടിച്ചേർത്തു.
സ്വാതന്ത്ര്യത്തിന് ശേഷമുള്ള ഏറ്റവും ഉയർന്ന പോളിംഗ്
വ്യാഴാഴ്ച നടന്ന പശ്ചിമ ബംഗാൾ നിയമസഭാ തിരഞ്ഞെടുപ്പിന്റെ ഒന്നാം ഘട്ടത്തിൽ 91.88 ശതമാനം പോളിംഗ് രേഖപ്പെടുത്തി. സ്വാതന്ത്ര്യത്തിന് ശേഷം സംസ്ഥാനം കണ്ട ഏറ്റവും ഉയർന്ന പോളിംഗ് ശതമാനമാണിത്. ബിജെപിയും തൃണമൂൽ കോൺഗ്രസും നേരിട്ട് ഏറ്റുമുട്ടിയ ആദ്യ ഘട്ടത്തിലെ ഈ ഉയർന്ന പങ്കാളിത്തം വലിയ രാഷ്ട്രീയ മാറ്റത്തിന്റെ സൂചനയായാണ് വിലയിരുത്തപ്പെടുന്നത്. ഏപ്രിൽ 29-നാണ് രണ്ടാം ഘട്ട വോട്ടെടുപ്പ് നടക്കുക. മെയ് 4-നാണ് തിരഞ്ഞെടുപ്പ് ഫലം പ്രഖ്യാപിക്കുന്നത്.
