സാമ്പത്തിക തട്ടിപ്പുകൾ വർദ്ധിച്ച് വരുന്നതിൽ ആശങ്ക പ്രകടിപ്പിച്ച് പ്രധാനമന്ത്രി

രാജ്യത്ത് സാമ്പത്തിക തട്ടിപ്പുകൾ വർദ്ധിച്ച് വരുന്നതിൽ ആശങ്ക പ്രകടിപ്പിച്ച് പ്രധാനമന്ത്രി നരേന്ദ്ര മോദി. ഇത്തരം തട്ടിപ്പുകളെ കുറിച്ച് അവബോധം വർധിക്കുന്നുണ്ടെങ്കിലും ആളുകൾ ഇപ്പോഴും ഇത്തരം ചതിക്കുഴികളിൽ വീഴുന്നുണ്ടെന്ന് അദ്ദേഹം പറഞ്ഞു. ‘മൻ കി ബാത്ത്’ റേഡിയോ പരിപാടിയുടെ 131-ാം പതിപ്പിലൂടെ രാജ്യത്തെ അഭിസംബോധന ചെയ്യുന്നതിനിടെയാണ് രാജ്യത്ത് വർദ്ധിച്ച് വരുന്ന ആശങ്കയെ കുറിച്ച് മുന്നറിയിപ്പ് നൽകിയത്.

‘അതീവ ജാഗ്രത പാലിക്കണം’

മുതിർന്ന പൗരന്മാർ ഉൾപ്പെടെയുള്ള നിഷ്കളങ്കരായ ജനങ്ങൾ ലക്ഷ്യം വെക്കപ്പെടുന്നുണ്ടെന്നും അവരുടെ സമ്പാദ്യം തട്ടിയെടുക്കപ്പെടുന്നുണ്ടെന്നും പ്രധാനമന്ത്രി പറഞ്ഞു. താൻ ഒരു വലിയ ഉദ്യോഗസ്ഥനാണെന്നും നിങ്ങൾ ചില വിവരങ്ങൾ പങ്കുവെക്കണമെന്നും ആവശ്യപ്പെട്ടായിരിക്കാം ഇത്തരം തട്ടിപ്പുകാർ വിളിക്കുന്നത്. ഇത്തരം കോളുകൾക്ക് പിന്നാലെ ആളുകൾ തങ്ങളുടെ വിവരങ്ങൾ പങ്കുവെക്കുന്നു. വിഷയത്തിൽ പൗരന്മാർ അതീവ ജാഗ്രത പാലിക്കണമെന്ന് പ്രധാനമന്ത്രി അഭ്യർത്ഥിച്ചു.

‘സുപ്രധാന വിവരങ്ങൾ പങ്കുവെക്കരുത്’

ഒ.ടി.പി, ആധാർ നമ്പർ, ബാങ്ക് അക്കൗണ്ട് വിവരങ്ങൾ തുടങ്ങിയ സുപ്രധാന വിവരങ്ങൾ ആരുമായും പങ്കുവെക്കരുത്. കെ.വൈ.സി അല്ലെങ്കിൽ റീ-കെവൈസി നടപടികൾ ഔദ്യോഗിക ബാങ്ക് ശാഖകൾ, അംഗീകൃത ആപ്പുകൾ അല്ലെങ്കിൽ വെരിഫൈഡ് ബാങ്കിംഗ് ചാനലുകൾ വഴി മാത്രമേ നടത്താവൂ എന്നും അദ്ദേഹം നിർദ്ദേശം നൽകി.

റീ-കെവൈസി നടത്തേണ്ടതിന്റെ ആവശ്യകത വിശദീകരിച്ച പ്രധാനമന്ത്രി, പെൻഷൻ, സബ്‌സിഡികൾ, ഇൻഷുറൻസ്, യുപിഐ തുടങ്ങിയ സേവനങ്ങൾ ബാങ്ക് അക്കൗണ്ടുകളുമായി ബന്ധിപ്പിച്ചിരിക്കുന്നതിനാൽ, ഉപഭോക്തൃ അക്കൗണ്ടുകളുടെ സുരക്ഷ ഉറപ്പാക്കാൻ ബാങ്കുകൾ ഇടയ്ക്കിടെ പരിശോധനകൾ നടത്താറുണ്ടെന്ന് പറഞ്ഞു. കുറ്റവാളികൾ വ്യാജ സന്ദേശങ്ങൾ, കോളുകൾ, ലിങ്കുകൾ എന്നിവ അയച്ച് ആളുകളെ തെറ്റിദ്ധരിപ്പിക്കുന്നുണ്ടെന്ന് അദ്ദേഹം മുന്നറിയിപ്പ് നൽകി.

പാസ്‌വേഡുകൾ മാറ്റണം

ഡിജിറ്റൽ സുരക്ഷ ശക്തമാക്കുന്നതിനായി പാസ്‌വേഡുകൾ കൃത്യമായ ഇടവേളകളിൽ മാറ്റണമെന്നും പ്രധാനമന്ത്രി നിർദ്ദേശിച്ചു. ഇത്തരം വിഷയങ്ങളിൽ റിസർവ് ബാങ്ക് ഓഫ് ഇന്ത്യ അടുത്തിടെ ‘ഫിനാൻഷ്യൽ ലിറ്ററസി വീക്ക്’ സംഘടിപ്പിച്ചിരുന്നു. ഈ ബോധവൽക്കരണ കാമ്പയിൻ വർഷം മുഴുവൻ തുടരുമെന്നും റിസർവ് ബാങ്കിന്റെ മാർഗ്ഗനിർദ്ദേശങ്ങൾ പാലിക്കണമെന്നും അദ്ദേഹം കൂട്ടിച്ചേർത്തു.

‘കൃത്യമായ കൈ.വൈ.സിയും സമയബന്ധിതമായ റീ-കെവൈസിയും നിങ്ങളുടെ അക്കൗണ്ടിനെ സുരക്ഷിതമാക്കുന്നു’ എന്ന സന്ദേശത്തോടെയാണ് അദ്ദേഹം പ്രസംഗം അവസാനിപ്പിച്ചത്. കരുത്തുറ്റതും സ്വയംപര്യാപ്തവുമായ രാജ്യം കെട്ടിപ്പടുക്കാൻ ശാക്തീകരിക്കപ്പെട്ട പൗരന്മാർ അനിവാര്യമാണെന്നും അദ്ദേഹം പറഞ്ഞു.