മകരവിളക്ക് സ്പെഷ്യല്‍ ട്രെയിനുകൾ; കൊല്ലത്തു നിന്നും തിരുവനന്തപുരത്തു നിന്നും സർവീസ്

മകരവിളക്ക് തീർത്ഥാടനത്തോടനുബന്ധിച്ച് ദക്ഷിണ റെയിൽവേ പ്രത്യേക ട്രെയിനുകൾ പ്രഖ്യാപിച്ചു. കൊല്ലം – കാക്കിനട, തിരുവനന്തപുരം സെൻട്രൽ – ചർളപ്പള്ളി എന്നിവിടങ്ങളിലേക്കാണ് ട്രെയിനുകൾ. ജനുവരി 15, 16 തീയതികളിൽ ഈ ട്രെയിനുകൾ സർവീസ് നടത്തും.

കൊച്ചി: മകരവിളക്കിന് തീർത്ഥാടകർക്കായി പ്രത്യേക ട്രെയിനുകൾ പ്രഖ്യാപിച്ച് ദക്ഷിണ റെയിൽവേ. രണ്ട് ട്രെയിനുകളാണ് പ്രഖ്യാപിച്ചിരിക്കുന്നത്. ഈ ട്രെയിനുകൾ ആവശ്യാനുസരണം സര്‍വീസ് നടത്തുമെന്നും റെയിൽവേ അറിയിച്ചു. കാക്കിനടയിൽ നിന്ന് 16 അൺറിസർവ്ഡ് സ്ലീപ്പർ കോച്ചുകളും, ചരളപ്പള്ളിയിൽ നിന്ന് 14 അൺറിസർവ്ഡ് സ്ലീപ്പർ കോച്ചുകളുമുള്ള പ്രത്യേക ട്രെയിനുകളാണ് പ്രഖ്യാപിച്ചിരിക്കുന്നത്.

കൊല്ലം കാക്കിനട – എറണാകുളം ജങ്ഷൻ (ട്രെയിൻ നമ്പർ 06065/06066)

കൊല്ലത്തിനും ആന്ധ്രയിലെ കാക്കിനട ടൗണിനും ഇടയിൽ ജനുവരി 15ന് ഒരു സ്പെഷ്യൽ ട്രെയിൻ ഓടും. കൊല്ലത്തു നിന്ന് ഈ ട്രെയിൻ വ്യാഴാഴ്ച രാവിലെ 3.30ന് എടുക്കും. ഈ ട്രെയിൻ അടുത്തദിവസം രാത്രി 12 മണിക്ക് കാക്കിനടയിൽ എത്തും. ഇതേ ട്രെയിൻ കാക്കിനട – എറണാകുളം ജങ്ഷൻ എക്സ്പ്രസ് ആയി ജനുവരി 16ന് തിരിച്ച് കേരളത്തിലേക്ക് ഓടും. എറണാകുളം ജങ്ഷൻ വരെയാണ് സര്‍വീസ്. 16ാം തിയതി (വെള്ളി) വൈകീട്ട് ആറുമണിക്ക് കാക്കിനടയിൽ നിന്ന് എടുക്കും. എറണാകുളത്ത് ഈ ട്രെയിൻ അടുത്ത ദിവസം രാത്രി 10.30ന് എത്തിച്ചേരും. ഈ രണ്ട് ട്രെയിനുകളും ഓരോ സർവീസാണ് നിലവിൽ പ്രഖ്യാപിച്ചിട്ടുള്ളത്.

കൊല്ലം – കാക്കിനട എക്സ്പ്രസിലെ കോച്ചുകൾ: 2 – എസി ത്രീ ടയർ കോച്ച്, 18- സ്ലീപ്പർ ക്ലാസ് കോച്ച്, 2- ജനറൽ സെക്കൻഡ് ക്ലാസ് കോച്ച്, 2- സെക്കൻഡ് ക്ലാസ് കോച്ചുകൾ (ഭിന്നശേഷി സൗഹൃദം). ഈ ട്രെയിനിൽ റിസർവ് ചെയ്യാത്ത യാത്രക്കാർക്കായി 14 സ്ലീപ്പർ ക്ലാസ് കോച്ചുകൾ നീക്കിവച്ചിട്ടുണ്ട്. ഇതിൽ സാധാരണ സെക്കൻഡ് ക്ലാസ് ടിക്കറ്റുമായി കയറാം. ആദ്യം വരുന്നവർക്ക് എന്ന നിലയിലാണ് ബർത്തുകൾ ലഭിക്കുക.

കൊല്ലത്തു നിന്ന് കാക്കിനടയിലേക്കുള്ള ട്രെയിനിൽ കായംകുളം, ചെങ്ങന്നൂർ, തിരുവല്ല, ചങ്ങനാശ്ശേരി, കോട്ടയം എന്നിവിടങ്ങളിലും എറണാകുളം ജങ്ഷൻ, എറണാകുളം ടൗൺ, ആലുവ, തൃശ്ശൂർ, പാലക്കാട് എന്നിവിടങ്ങളിൽ സ്റ്റോപ്പുണ്ടാകും. ഈ ട്രെയിൻ പോഡനൂർ വഴിയാണ് പോകുന്നത്. എറണാകുളം ടൗണിലാണ് നിർത്തുക. രാവിലെ 7.20 എത്തിച്ചേരും, 7.25ന് പുറപ്പെടും. തിരിച്ചുള്ള യാത്രയിൽ ട്രെയിൻ കേരളത്തിൽ പാലക്കാട് സ്റ്റേഷനിൽ രാവിലെ 11.05ന് എത്തും, 11.15ന് എടുക്കും.

തിരുവനന്തപുരം സെൻട്രൽ – ചർളപ്പള്ളി – തിരുവനന്തപുരം സെൻട്രൽ എക്‌സ്പ്രസ് (ട്രെയിൻ നമ്പർ 06067/06068)

ആന്ധ്രയിലെ ചർളപ്പള്ളിയിലേക്ക് തിരുവനന്തപുരം സെൻട്രലിൽ നിന്ന് എടുക്കുന്ന മറ്റൊരു ട്രെയിൻ കൂടി സതേൺ റെയിൽവേ മകരവിളക്ക് യാത്രക്കാർക്കായി പ്രഖ്യാപിച്ചിട്ടുണ്ട്. ഈ ട്രെയിൻ ജനുവരി 15ന് രാവിലെ 04.10ന് തിരുവനന്തപുരം സെൻട്രലിൽ നിന്ന് എടുക്കും. അടുത്ത ദിവസം ഉച്ചതിരിഞ്ഞ് 3 മണിക്ക് ചർളപ്പള്ളി സ്റ്റേഷനിലെത്തും.

തിരിച്ച് ഈ ട്രെയിൻ ജനുവരി 16ന് ചർളപ്പള്ളി സ്റ്റേഷനിൽ നിന്ന് രാത്രി 9.45ന് എടുക്കും. തിരുവനന്തപുരം സെൻട്രൽ സ്റ്റേഷനിൽ മൂന്നാം ദിവസം രാവിലെ 8 മണിക്ക് എത്തിച്ചേരും. ഈ രണ്ട് ട്രെയിനുകളും ഓരോ സർവീസ് വീതമാണുള്ളത്.

കോച്ചുകൾ: കോച്ച് കോമ്പോസിഷൻ: 2- എസി ത്രീ ടയർ കോച്ചുകൾ, 16-സ്ലീപ്പർ ക്ലാസ് കോച്ചുകൾ, 2- ജനറൽ സെക്കൻഡ് ക്ലാസ് കോച്ചുകൾ, 2- സെക്കൻഡ് ക്ലാസ് കോച്ചുകൾ (ഭിന്നശേഷി സൗഹൃദം). കേരളത്തിൽ ട്രെയിനിന് കൊല്ലം, ചെങ്ങന്നൂർ, തിരുവല്ല, ചങ്ങനാശ്ശേരി, കോട്ടയം, എറണാകുളം ടൗൺ, ആലുവ, തൃശ്ശൂർ, പാലക്കാട് എന്നിവിടങ്ങളിൽ സ്റ്റോപ്പുണ്ട്. പോഡനൂർ വഴിയാണ് യാത്ര.

ഈ ട്രെയിനിലും റിസർവ് ചെയ്യാത്ത യാത്രക്കാർക്കായി സ്ലീപ്പർ ക്ലാസ് കോച്ചുകൾ നീക്കിവച്ചിട്ടുണ്ട്. 16 കോച്ചുകളാണ് ട്രെയിനിലുള്ളത്.