നടി, കവയിത്രി, എഴുത്തുകാരി, നർത്തകി എന്നീ നിലകളിൽ അറിയപ്പെടുന്ന താരമാണ് ഊർമ്മിള ഉണ്ണി.1988 ലെ മാറാട്ടം എന്ന സിനിമയിലൂടെ മലയാള സിനിമ രംഗത്തെത്തി. 1992 ലെ സർഗം എന്ന സിനിമയിലൂടെ ശ്രദ്ധേയയായി. ഇപ്പോഴും മലയാള സീരിയൽ സിനിമ രംഗത്ത് സജീവമായി തുടരുന്നു.
കഴിഞ്ഞ ദിവസമാണ് ഊർമ്മിള ഉണ്ണി ബിജെപിയിൽ ചേരുന്നത്. കൊച്ചിയിൽ നടന്ന ചടങ്ങിലാണ് നടി അംഗത്വം സ്വീകരിച്ചത്. ചടങ്ങിൽ ബിജെപി നേതാവ് എ.എൻ. രാധാകൃഷ്ണൻ ഊർമിള ഉണ്ണിയെ ഷാളണിയിച്ച് സ്വീകരിച്ചു. ലച്ചിത്ര നിർമ്മാതാവ് ജി. സുരേഷ് കുമാറും ചടങ്ങിൽ പങ്കെടുത്തിരുന്നു. പാർട്ടി അംഗത്വം സ്വീകരിച്ചതിന് ശേഷമുള്ള താരത്തിന്റെ വാക്കുകൾ ഇപ്പോൾ ശ്രദ്ധനേടുകയാണ്.താനൊരു നരേന്ദ്ര മോദി ഫാനാണെന്ന് ഊർമ്മിള ഉണ്ണി മാദ്ധ്യമ പ്രവർത്തകരോട് പറഞ്ഞു. “കഴിഞ്ഞ 35 വർഷമായി മനസ്സുകൊണ്ട് ഞാൻ എപ്പോഴും ബിജെപിയായിരുന്നു, എന്നാൽ ഇതുവരെ സജീവമായി പ്രവർത്തിച്ചിരുന്നില്ല.” അവർ പറഞ്ഞു. സംസ്ഥാനത്ത് തദ്ദേശ തെരഞ്ഞെടുപ്പ് നടക്കാനിരിക്കെയാണ് ഊർമ്മിള ഉണ്ണിയുടെ ബിജെപി പ്രവേശം.
ഊർമ്മിള ഉണ്ണി
കോട്ടയ്ക്കൽ കോവിലകം കെ സി അനുജൻ രാജയുടേയും മനോരമയുടേയും മകളായി 1962 ജൂൺ 14ന് തിരുവല്ലയിലെ നെടുമ്പുറം കൊട്ടാരത്തിൽ ജനിച്ചു. തൃശൂർ ഇൻഫൻ്റ് ജീസസ് കോൺവെൻറിൽ നിന്ന് പ്രാഥമിക വിദ്യാഭ്യാസം പൂർത്തിയാക്കിയതിനു ശേഷം തൃശൂർ കേരളവർമ്മ കോളേജിൽ ചേർന്നു. മോഹിനിയാട്ടം, ഭരതനാട്യം, കഥകളി, വീണ എന്നീ കലകൾ അഭ്യസിച്ച ഊർമ്മിള ഉണ്ണി ഒരു ചിത്രകല രചയിതാവ് കൂടിയാണ്.
മാറാട്ടം 1988, ഉത്സവപ്പിറ്റേന്ന് 1989, സർഗം 1992, കഥാപുരുഷൻ 1996, ഇരട്ടക്കുട്ടികളുടെ അച്ഛൻ 1997, പഞ്ചലോഹം 1998, സൂസന്ന 2000, പുരസ്കാരം 2000, മഴ 2000, കൊച്ചു കൊച്ചു സന്തോഷങ്ങൾ 2000, സായവർ തിരുമേനി 2001, ദുബായ് 2001, ദോസ്ത് 2001, മേഘസന്ദേശം 2001 എന്നിവയാണ് പ്രധാന സിനിമകൾ. രാമനുണ്ണിയാണ് ഭർത്താവ്. നടി ഉത്തര ഉണ്ണി എക മകൾ ആണ്. ചലച്ചിത്ര താരമായ സംയുക്ത വർമ്മ ബന്ധുവാണ്. അംഗോപാധ്യ എന്ന പേരിൽ ഒരു നാട്യകലാ സ്കൂൾ ബഹ്റൈനിൽ ഇവർ ആരംഭിച്ചു. എണാകുളം ജില്ലയിലെ കടവന്ത്രയിൽ ആണ് താമസിക്കുന്നത്.
