കർണാടക മുൻ ഡയറക്ടർ ജനറൽ ഓഫ് പോലീസ് (ഡിജിപി) ഓം പ്രകാശിനെ ദുരൂഹ സാഹചര്യത്തിൽ മരിച്ച നിലയിൽ കണ്ടെത്തി. ഞായറാഴ്ച ബെംഗളൂരുവിലെ വസതിയിലാണ് കുത്തേറ്റ നിലയിൽ മൃതദേഹം കണ്ടെത്തിയത്.
മൂർച്ചയുള്ള ആയുധം ഉപയോഗിച്ച് ആക്രമിച്ചുള്ള കൊലപാതകമെന്ന് പോലീസ് സംശയിക്കുന്നതായും ഇക്കാര്യത്തിൽ ചോദ്യം ചെയ്യുന്നതിനായി ഭാര്യയെയും മകളെയും കസ്റ്റഡിയിലെടുത്തതായും ഉദ്യോഗസ്ഥർ അറിയിച്ചു.
പ്രാഥമിക വിവരം അനുസരിച്ച്, ഓം പ്രകാശിന്റെ ഭാര്യ കൊലപാതകത്തിൽ പ്രതിയാണ്. ഓം പ്രകാശിന്റെ വയറിലും കഴുത്തിലും കുത്തേറ്റ മുറിവുകൾ കണ്ടെത്തിയിട്ടുണ്ട്. ചോദ്യം ചെയ്യലിന് ശേഷം ഭാര്യയെയും മകളെയും അറസ്റ്റ് ചെയ്യുന്നതിൽ പോലീസ് തീരുമാനമെടുക്കുമെന്ന് വൃത്തങ്ങൾ അറിയിച്ചു.
രക്തത്തിൽ കുളിച്ച നിലയിലാണ് മൃതദേഹം കണ്ടെത്തിയതെന്നും മൂർച്ചയുള്ള ആയുധം ഉപയോഗിച്ചതാകാം മരണകാരണമെന്നും ബെംഗളൂരു പോലീസ് കമ്മീഷണർ ബി ദയാനന്ദ് പറഞ്ഞു.
“ഇന്ന്, വൈകുന്നേരം 4-4.30 ഓടെ, ഞങ്ങളുടെ മുൻ ഡിജിപിയും ഐജിപിയുമായ ഓം പ്രകാശിന്റെ മരണത്തെക്കുറിച്ചുള്ള വിവരം ലഭിച്ചു. അദ്ദേഹത്തിന്റെ മകനെ ബന്ധപ്പെട്ടിട്ടുണ്ട്, അദ്ദേഹം സംഭവത്തെക്കുറിച്ച് പരാതി നൽകിയിട്ടുണ്ട്. അതിന്റെ അടിസ്ഥാനത്തിൽ എഫ്‌ഐആർ രജിസ്റ്റർ ചെയ്യും. കേസ് രജിസ്റ്റർ ചെയ്ത ശേഷം വിശദമായ അന്വേഷണം നടത്തും. ഇപ്പോൾ ആരെയും അറസ്റ്റ് ചെയ്തിട്ടില്ല,” അദ്ദേഹം പറഞ്ഞു.
“പ്രാഥമിക അന്വേഷണത്തിൽ കാര്യങ്ങൾ ആന്തരിക സ്വഭാവമുള്ളതാകാമെന്ന് സൂചനയുണ്ട്. മൂർച്ചയുള്ള ഏതോ ആയുധം ഉപയോഗിച്ചിട്ടുണ്ടെന്ന് തോന്നുന്നു, അത് വളരെയധികം രക്തം നഷ്ടപ്പെട്ട് മരണത്തിലേക്ക് നയിച്ചു,” അദ്ദേഹം പറഞ്ഞു.
ഓം പ്രകാശിന്റെ മൃതദേഹം പോസ്റ്റ്‌മോർട്ടം പരിശോധനയ്ക്കായി ആശുപത്രിയിലേക്ക് കൊണ്ടുപോയി.
കർണാടക കേഡറിൽ നിന്നുള്ള 1981 ബാച്ച് ഐപിഎസ് ഉദ്യോഗസ്ഥനായ ഓം പ്രകാശ് 2015 മുതൽ 2017 ൽ വിരമിക്കുന്നതുവരെ ഡിജിപിയും ഇൻസ്പെക്ടർ ജനറൽ ഓഫ് പോലീസ് (ഐജിപി) ആയും സേവനമനുഷ്ഠിച്ചു.
ബീഹാറിലെ ചമ്പാരൻ സ്വദേശിയായ ഓം പ്രകാശ് എംഎസ്‌സി (ജിയോളജി) ബിരുദധാരിയായിരുന്നു.
