നിഖാബ് ധരിച്ച് വാഹനമോടിച്ചാൽ പിഴ; പുതിയ പ്രഖ്യാപനവുമായി കുവൈറ്റ് ആഭ്യന്തര മന്ത്രാലയം

അതിനു പുറമെ, നിഖാബ് ധരിക്കുമ്പോൾ ഡ്രൈവറുടെ കണ്ണ് ഒഴികെയുള്ള മുഖഭാഗങ്ങൾ മറയുന്നതിനാൽ നിരീക്ഷണ കാമറകളിലൂടെ ഡ്രൈവർമാരെ തിരിച്ചറിയുക പ്രയാസമാണെന്നതും ഇത്തരമൊരു തീരുമാനത്തിന് കാരണമായതായി മന്ത്രാലയം അറിയിച്ചു. രാജ്യത്തെ സുരക്ഷാ ഉദ്യോഗസ്ഥർ ഏറെ കാലമായി നേരിടുന്ന ഒരു വെല്ലുവിളിയായിരുന്നു ഇത്. പുതിയ നിയന്ത്രണം നിലവിൽ വന്നതോടെ ഗതാഗത നിയമ നിർവഹണവും ഗതാഗത നിരീക്ഷണവും സുരക്ഷാ ഉദ്യോഗസ്ഥർക്ക് കൂടുതൽ എളുപ്പമാവും.

1984 മുതൽ കുവൈറ്റിൽ വാഹനമോടിക്കുമ്പോൾ നിഖാബ് അല്ലെങ്കിൽ ബുർഖ ധരിക്കുന്നത് നിരോധിച്ചിട്ടുണ്ടെന്ന് മന്ത്രാലയം അറിയിച്ചു. എന്നാൽ ഇത് പൂർണമായ രീതിയിൽ പാലിക്കപ്പെടാറില്ല. ഈ രീതി ഗതാഗത നിയമലംഘനമാണോ എന്നതുമായി ബന്ധപ്പെട്ട് സമൂഹമാധ്യമങ്ങളിൽ ഉയർന്നുവന്ന ചർച്ചകൾക്ക് മറുപടിയായാണ് ആഭ്യന്തര മന്ത്രാലയം ഇക്കാര്യം വ്യക്തമാക്കിയിരിക്കുന്നത്

മുഖം മറയ്ക്കുന്നത് ഡ്രൈവർമാരെ തിരിച്ചറിയുന്നത് പോലീസിന് ബുദ്ധിമുട്ടാക്കുന്നതിനാൽ, സുരക്ഷാ കാരണങ്ങളാലാണ് ഈ നടപടി ആദ്യം നടപ്പിലാക്കിയതെന്ന് മന്ത്രാലയം വിശദീകരിച്ചു. എന്നിരുന്നാലും, ആവശ്യമായ സന്ദർഭങ്ങളിൽ വനിതാ പോലീസിന്റെ സാന്നിധ്യത്തിൽ ഡ്രൈവറുടെ ഐഡന്റിറ്റി പരിശോധിക്കുകയാണ് നിലവിൽ സ്വീകരിക്കുന്ന രീതി. ഇത് പലപ്പോഴും നിയമപാലനത്തിൽ തടസ്സം സൃഷ്ടിക്കുന്നുണ്ടെന്ന് അധികൃതർ വിലയിരുത്തി. ഇതേത്തുടർന്നാണ് വാഹനം ഓടിക്കുന്നവർക്ക് നിഖാബ് വിലക്കുന്ന നിയമം കർശനമായി നടപ്പിലാക്കാൻ അധികൃതർ മുന്നോട്ടുവന്നിരിക്കുന്നത്. ചില കുറ്റവാളികൾ സുരക്ഷാ ഉദ്യോഗസ്ഥരുടെ കണ്ണുവെട്ടിക്കാൻ നിഖാബ് ധരിക്കാനുള്ള സാധ്യതയും പുതിയ തീരുമാനത്തിനു പിന്നിലുണ്ട്.