സോഷ്യൽ മീഡിയാ ഇൻഫ്ലുവൻസർ ജുനൈദ്(32) മഞ്ചേരി മരത്താണിയിൽ അപകടത്തിൽ മരിച്ചു. വഴിക്കടവ് പഞ്ചായത്തങ്ങാടി സ്വദേശിയാണ്. സോഷ്യൽമീഡിയയിൽ ശ്രദ്ധേയനാണ് ഇയാൾ. വെള്ളിയാഴ്ച വൈകിട്ട് 6.20ന് കാരക്കുന്ന് മരത്താണി വളവിൽ റോഡരികിൽ അപകടത്തിൽപ്പെട്ട് രക്തം വാർന്ന് കിടക്കുന്ന ജുനൈദിനെ നാട്ടുകാരാണ് ആശുപത്രിയിലെത്തിച്ചത്.
അപകടം നടന്നത് എപ്പോൾ എന്നത് വ്യക്തമല്ല. ജുനൈദ് മഞ്ചേരി ഭാഗത്ത് നിന്നും വഴിക്കടവിലേക്ക് ബൈക്കിൽ വരുന്നതിനിടെയാണ് അപകടം സംഭവിച്ചതെന്ന് കരുതുന്നു. മരത്താണി വളവിൽ റോഡരികിലെ മൺകൂനയിൽ തട്ടി ബൈക്ക് മറിഞ്ഞാണ് അപകടമെന്നാണ് പോലീസിൻ്റെ പ്രാഥമിക നിഗമനം.
തലയുടെ പിൻഭാഗത്താണ് ഗുരുതര പരിക്കേറ്റത്. ഉടൻ തന്നെ നാട്ടുകാർ സ്വകാര്യ കാറിൽ മഞ്ചേരി മെഡിക്കൽ കോളജ് ആശുപത്രിയിൽ പ്രവേശിപ്പിച്ചെങ്കിലും മരണപ്പെട്ടു. പിതാവ്: ഹംസ. മാതാവ്: ഷഹർബാൻ. മകൻ: മുഹമ്മദ് റസൽ.
