പത്ത് വർഷത്തെ ആം ആദ്മി പാർട്ടിയുടെ ഭരണകാലത്ത് മുതിർന്ന ബിജെപി നേതാവ് വിജേന്ദർ ഗുപ്തയെ ഡൽഹി നിയമസഭയിൽ നിന്ന് പുറത്താക്കുകയോ വലിച്ചിഴയ്ക്കുകയോ ചെയ്യുന്ന നാടകീയ ദൃശ്യങ്ങൾ ഒരു സാധാരണ കാഴ്ചയായിരുന്നു. ഇപ്പോൾ, കാര്യങ്ങൾ മാറിമറിഞ്ഞ് 27 വർഷത്തിന് ശേഷം ബിജെപി വീണ്ടും അധികാരത്തിൽ വരുമ്പോൾ കാലത്തിൻ്റെ കാവ്യനീതിയെന്നോണം അദ്ദേഹത്തെ സ്പീക്കറായി നിയമിച്ചു.
മുൻ സ്പീക്കർ രാം നിവാസ് ഗോയലും മുഖ്യമന്ത്രി അരവിന്ദ് കേജ്‌രിവാളും ഇപ്പോൾ നിയമസഭയുടെ ഭാഗമല്ല എന്നതും ശ്രദ്ദേയമാണ്. 2015 ലും 2020 ലും ഡൽഹിയിൽ ആം ആദ്മി പാർട്ടി വൻ ഭൂരിപക്ഷത്തോടെ വിജയിച്ച കെജ്‌രിവാൾ തരംഗത്തിനിടയിലും തിരഞ്ഞെടുക്കപ്പെട്ടയാളാണ് വിജേന്ദർ ഗുപ്ത. ഒരിക്കൽ അദ്ദേഹത്തെ വലിച്ചിഴച്ചിടത്ത് നിന്ന് ഇപ്പോൾ അദ്ദേഹം സഭയെ നിയന്ത്രിക്കാനൊരുങ്ങുകയാണ്.
ബനിയ സമുദായക്കാരനായ ഗുപ്ത, തുടർച്ചയായി മൂന്നാം തവണയും രോഹിണി നിയമസഭാ സീറ്റിൽ നിന്ന് വിജയിച്ചു, ആം ആദ്മി പാർട്ടിയുടെ പ്രദീപ് മിത്തലിനെ 37,000 വോട്ടുകൾക്ക് പരാജയപ്പെടുത്തി. നിയമസഭയിൽ പ്രതിപക്ഷ നേതാവായിരുന്ന മുതിർന്ന ബിജെപി നേതാവ് ഡൽഹി ബിജെപി യൂണിറ്റിന്റെ പ്രസിഡന്റായും സേവനമനുഷ്ഠിച്ചിട്ടുണ്ട്.
1963 ഓഗസ്റ്റ് 14 ന് ജനിച്ച വിജേന്ദർ ഗുപ്ത ശ്രീറാം കോളേജ് ഓഫ് കൊമേഴ്‌സിൽ നിന്ന് ബിരുദം നേടി. 1980 ൽ ജനത വിദ്യാർത്ഥി മോർച്ചയിലൂടെയാണ് അദ്ദേഹം രാഷ്ട്രീയത്തിൽ പ്രവേശിച്ചത്, പിന്നീട് 1995 ൽ ബിജെപിയുടെ യുവജന വിഭാഗത്തിന്റെ പ്രസിഡന്റായി.
1997-ൽ ഡൽഹി മുനിസിപ്പൽ കോർപ്പറേഷനിൽ (എംസിഡി) കൗൺസിലറായപ്പോഴാണ് ഗുപ്ത ആദ്യമായി തിരഞ്ഞെടുപ്പ് വിജയം രുചിച്ചത്.
എന്നിരുന്നാലും, ആദ്യ ലോക്‌സഭാ മത്സരത്തിൽ തന്നെ അദ്ദേഹം പരാജയപ്പെട്ടു, 2009-ൽ ചാന്ദ്‌നി ചൗക്കിൽ നിന്ന് കോൺഗ്രസിന്റെ കപിൽ സിബലിനോട് പരാജയപ്പെട്ടു. നാല് വർഷത്തിന് ശേഷം, 2013-ലെ ഡൽഹി നിയമസഭാ തിരഞ്ഞെടുപ്പിൽ അരവിന്ദ് കെജ്‌രിവാളിനോട് അദ്ദേഹം പരാജയപ്പെട്ടു.
എന്നിരുന്നാലും, വ്യാപാരി സമൂഹത്തിൽ സ്വാധീനമുള്ള ഗുപ്ത 2015 ൽ രോഹിണി സീറ്റ് നേടി തിരിച്ചുവന്നു. ആ വർഷം, ബിജെപിയുടെ വിജയിച്ച മൂന്ന് സ്ഥാനാർത്ഥികളിൽ ഒരാൾ മാത്രമായിരുന്നു അദ്ദേഹം. 2020 ലും 2025 ലും അദ്ദേഹം സീറ്റ് നിലനിർത്തി, ഇപ്പോൾ നിയമസഭാ സ്പീക്കറായി തൻ്റെ രാഷ്ട്രീയ ജീവിതത്തിൽ മറ്റൊരു യാത്ര ആരംഭിക്കാൻ ഒരുങ്ങുകയാണ്.
