ഉരുൾ കവർന്ന വയനാടിൻ്റെ പുനരധിവാസത്തിനായി മുസ്ലീം ലീഗ് 39 കോടി രൂപ സമാഹരിച്ചതായി സംസ്ഥാന അധ്യക്ഷൻ പാണക്കാട് സാദിഖലി ശിഹാബ് തങ്ങൾ. 36,08,11,688 രൂപയാണ് സമാഹരിച്ചത്. ഇതിന് പുറമേ 22 വീടുകൾ നി‍ർമിക്കാായി മൂന്നു കോടി 30 ലക്ഷം രൂപ സംഭാവനയായി ലഭിച്ചു. രണ്ട് ഏക്കർ 10 സെന്റ് ഭൂമിയും സംഭാവനയായി ലഭിച്ചിട്ടുണ്ട്. ക്രൗഡ് ഫണ്ടിങ് വഴി ഒരു മാസം നീണ്ടുനിന്ന തുക സമാഹരണം ഓഗസ്റ്റ് 31ന് സമാപിച്ചു.
ഇതുവരെ ഫണ്ടിൽ 1,40,68,860 രൂപ ചെലവഴിച്ചതായും സാദിഖലി ശിഹാബ് തങ്ങൾ അറിയിച്ചു.പ്രത്യേകം തയ്യാറാക്കിയ ആപ്പ് വഴിയാണ് ഫണ്ട് സമാഹരണം നടന്നത്. മുണ്ടക്കൈ – ചൂരൽമല ഉരുൾപൊട്ടലിൽ സകലതും നഷ്ടമായവർക്ക് വേണ്ടിയുള്ള പുനരധിവാസ പദ്ധതികൾ ഫണ്ട് സമാഹരണത്തോടൊപ്പം തന്നെ മുസ്ലീം ലീഗ് നടപ്പാക്കി വരികയാണ്. ഇതിന്റെ ഭാഗമായി 691 കുടുംബങ്ങൾക്ക് 15,000 രൂപ വീതവും 57 വ്യാപാരികൾക്ക് അര ലക്ഷം രൂപ വീതവും അടിയന്തര സഹായം വിതരണം ചെയ്തു.
വാഹനങ്ങൾ നഷ്ടമായവർക്ക് നാല് ജീപ്പുകളും മൂന്ന് ഓട്ടോറിക്ഷകളും രണ്ട് സ്‌കൂട്ടറുകളും കൈമാറിയതായി അദ്ദേഹം അറിയിച്ചു.100 വീടുകൾ ഉൾപ്പെടെ സമഗ്രമായ പുനരധിവാസ പാക്കേജാണ് മുസ്ലീം ലീഗ് നടപ്പാക്കുന്നത്. വയനാടിന് വേണ്ടി ചെലവഴിക്കുന്ന തുക ആപ്പിൽ പ്രദർശിപ്പിക്കുന്നത് ക്യാമ്പയിൻ അവസാനിച്ച ശേഷവും തുടരും.
പുനരധിവാസത്തിന് വേണ്ടി രൂപീകരിച്ച പ്രത്യേക ഉപസമിതി അതാത് സമയങ്ങളിൽ യോഗം ചേർന്ന് ദുരിതാശ്വാസ പ്രവർത്തനങ്ങൾ ഏകോപിപ്പിക്കും. ഫണ്ട് സമാഹരണം വിജയിപ്പിക്കാൻ അഹോരാത്രം അധ്വാനിച്ച പാർട്ടി ഘടകങ്ങൾക്കും പ്രവർത്തകർക്കും സയ്യിദ് സാദിഖലി ശിഹാബ് തങ്ങൾ നന്ദി അറിയിച്ചു.
