ഐസിഎസ്ഇ പത്താം ക്ലാസ്, ഐഎസ്സി പന്ത്രണ്ടാം ക്ലാസ് പരീക്ഷാ ഫലം ഇന്ന് പ്രഖ്യാപിക്കും. രാവിലെ 11 മണിക്കാണ് ഫല പ്രഖ്യാപനം. cisce.org, results.cisce.org എന്നീ സൈറ്റുകളിൽ നിന്ന് ഫലം അറിയാൻ കഴിയും. ഇത് കൂടാതെ ഡിജിലോക്കർ മൊബൈൽ ആപ്ലിക്കേഷനിലൂടെയും വിദ്യാർഥികൾക്ക് ഫലം അറിയാൻ കഴിയും.
ദി കൗണ്‍സിൽ ഫോർ ഇന്ത്യൻ സ്കൂള്‍ സർട്ടിഫിക്കറ്റ് എക്സാമിനേഷൻസ് (സിഐഎസ്‍സിഇ) യാണ് 10 ,12 ക്ലാസ് ഫലം പ്രഖ്യാപിക്കുക. പത്താംക്ലാസിൽ 2.5 ലക്ഷം പേരാണ് പരീക്ഷ എഴുതിയത്. കഴിഞ്ഞവർഷം 98.94 ശതമാനമായിരുന്നു പത്താം ക്ലാസ് വിജയം. ഐഎസ്സി 12ാം ക്ലാസിൽ 96.93 ശതമാനമായിരുന്നു വിജയം.
ഫലപ്രഖ്യാപനത്തിന് ശേഷം ഉത്തരകടലാസുകൾ പുനപരിശോധിക്കണമെങ്കിൽ ഐസിഎസ്ഇ വിഭാഗത്തിൽ 1000 രൂപയും ഐഎസ്സി വിഭാഗത്തിൽ 1500 രൂപയും അടയ്ക്കണം. ഫലം അറിയുന്ന സൈറ്റുകളിൽ കൂടെ തന്നെ വിദ്യാർഥികൾക്ക് പുനഃപരിശോധനക്ക് അപേക്ഷിക്കാൻ കഴിയും.
മാർക്കോ ഗ്രേഡോ മെച്ചപ്പെടുത്താൻ ആഗ്രഹിക്കുന്ന വിദ്യാർഥികൾക്ക് രണ്ട് വിഷയങ്ങളിൽ ഇംപ്രൂവ്മെന്റ് പരീക്ഷ എഴുതാം. ഇംപ്രൂവ്മെന്റ് പരീക്ഷകൾ ജൂലൈയിലാണ് നടക്കുക.
