ബോളിവുഡ് നടൻ മിഥുൻ ചക്രവർത്തിയെ ആശുപത്രിയിൽ പ്രവേശിപ്പിച്ചു.

0
58

നടനും രാഷ്ട്രീയ നേതാവുമായ മിഥുൻ ചക്രവർത്തിയെ (Mithun Chakraborty) ആശുപത്രിയിൽ പ്രവേശിപ്പിച്ചതായി റിപ്പോർട്ടുകൾ.  നെഞ്ചുവേദന അനുഭവപ്പെടുകയും അസ്വസ്ഥത അനുഭവപ്പെടുകയും ചെയ്തതിനെ തുടർന്ന്  മിഥുനെ കൊൽക്കത്തയിലെ (Kolkata) സ്വകാര്യ ആശുപത്രിയിലാണ് പ്രവേശിപ്പിച്ചിരിക്കുന്നത്. മിഥുൻ ചക്രവർത്തിയെ ആശുപത്രിയിൽ പ്രവേശിപ്പിച്ച വിവരമറിഞ്ഞ് അദ്ദേഹത്തിൻ്റെ ആരാധകർ (Fans) ആശുപത്രി പരിസരത്തേക്ക് എത്തിത്തുടങ്ങിയിട്ടുണ്ട്.

73 വയസ്സായ മിഥുൻ ചക്രവർത്തിക്ക് ഇന്ന് രാവിലെ നെഞ്ചിൽ വേദന അനുഭവപ്പെടുകയായിരുന്നു എന്നാണ് റിപ്പോർട്ടുകൾ. ചെറിയ രീതിയിൽ അസ്വസ്ഥതയും അനുഭവപ്പെട്ടതോടെ അദ്ദേഹത്തെ ഉടൻ തന്നെ ആശുപത്രിയിൽ പ്രവേശിപ്പിക്കുകയായിരുന്നു. നിലവിൽ ആശുപത്രിയിലെ തീവ്ര പരിചരണ വിഭാഗത്തിലാണ് അദ്ദേഹം. അതേസമയം അദ്ദേഹത്തിൻ്റെ ആരോഗ്യനില സംബന്ധിച്ചുള്ള കൂടുതൽ വിവരങ്ങളൊന്നും പുറത്തുവിട്ടിട്ടില്ല.

അടുത്തിടെയാണ് മിഥുൻ ചക്രവർത്തിക്ക് പത്മഭൂഷൺ പുരസ്‌കാരം ലഭിച്ചത്. പത്മഭൂഷൺ ലഭിച്ചതിൽ ശേഷം സന്തോഷം പ്രകടിപ്പിച്ച് അദ്ദേഹം രംഗത്തെത്തിയിരുന്നു. ഈ അവാർഡ് ലഭിച്ചതിൽ സന്തോഷമുണ്ടെന്നും എല്ലാവരോടും പൂർണ്ണഹൃദയത്തോടെ നന്ദി പറയാൻ ഞാൻ ആഗ്രഹിക്കുന്നുവെന്നും മിഥുൻ ചക്രവർത്തി വ്യക്തമാക്കിയിരുന്നു. എനിക്ക് വേണ്ടി ഞാൻ ആരോടും ഒന്നും ചോദിച്ചിട്ടില്ല. ചോദിക്കാതെ എന്തെങ്കിലും കിട്ടിയതിൽ അതിയായ സന്തോഷം തോന്നുന്നുവെന്നും അദ്ദേഹം ചൂണ്ടിക്കാട്ടിയിരുന്നു.

‘ഇത്രയും സ്നേഹവും ബഹുമാനവും നൽകിയതിന് എല്ലാവർക്കും നന്ദി. ഈ അവാർഡ് ഞാൻ എൻ്റെ ആരാധകർക്ക് സമർപ്പിക്കുന്നു. എനിക്ക് നിസ്വാർത്ഥ സ്നേഹം നൽകിയ ലോകമെമ്പാടുമുള്ള എൻ്റെ ആരാധകർക്കുള്ളതാണ് ഈ അവാർഡ്. എൻ്റെ ഈ അവാർഡ് എല്ലാ അഭ്യുദയകാംക്ഷികൾക്കും സമർപ്പിക്കുന്നു´´- മിഥുൻ ചക്രവർത്തി വ്യക്തമാക്കി.

2023-ൽ, സുമൻ ഘോഷിൻ്റെ സൂപ്പർഹിറ്റ് ബംഗാളി ചിത്രമായ കാബൂളിവാലയിൽ അദ്ദേഹം അഭിനയിച്ചിരുന്നു. 2022-ൽ വിവേക് ​​അഗ്നിഹോത്രിയുടെ ‘ദ കശ്മീർ ഫയൽസ്’ എന്ന സിനിമയിൽ അദ്ദേഹം ഒരു പ്രധാന വേഷം ചെയ്യുകയുണ്ടായി.മികച്ച സഹനടനുള്ള ‘ഫിലിംഫെയർ അവാർഡും’ അദ്ദേഹത്തെ തേടിയെത്തിയിരുന്നു.

ഇന്ത്യൻ സിനിമയിലെ `ഡിസ്ക്കോ ഡാൻസർ´ എന്നറിയപ്പെടുന്ന മിഥുൻ ചക്രവർത്തി ഒരു കാലത്ത് യുവാക്കളുടെ വികാരമായിരുന്നു. തൻ്റെ അഭിനയ ജീവിതത്തിൽ ‘പരിവാർ’, ‘മേരാ യാർ മേരാ ദുഷ്മാൻ’, ‘ബാത് ബാൻ ജായേ’, ‘ദീവാന തേരേ നാം’ തുടങ്ങി 350-ഓളം ചിത്രങ്ങളിൽ അദ്ദേഹം അഭിനയിച്ചു. മികച്ച സിനിമകൾക്ക് പുറമെ നിരവധി ടെലിവിഷൻ പരമ്പരകളുടെയും നൃത്ത പരിപാടികളുടെയും വിധികർത്താവായി അദ്ദേഹം എത്തിയിരുന്നു.

മിഥുൻ ചക്രവർത്തിയെ ആശുപത്രിയിൽ പ്രവേശിപ്പിച്ച വിവരം അറിഞ്ഞതോടെ അദ്ദേഹത്തിൻ്റെ ആരാധക വൃന്ദം പ്രാർത്ഥനയിലാണ്. നിങ്ങളുടെ പ്രിയപ്പെട്ട താരം എത്രയും വേഗം സുഖം പ്രാപിച്ചു തങ്ങളുടെ മുന്നിൽ എത്തുമെന്ന് വിശ്വാസത്തിലാണ് ഏവരും.

LEAVE A REPLY

Please enter your comment!
Please enter your name here