ശരീരത്തിലേയ്ക്ക് വിറ്റമിന്‍ ഡി പ്രധാനമായും ലഭിക്കുന്നത് സൂര്യപ്രകാശത്തിലൂടെയാണ്. എന്നാല്‍, ഈ വേനലില്‍ കടുത്ത ചൂടില്‍, പലര്‍ക്കും പുറത്തിറങ്ങാന്‍ പോലും മടിയായിരിക്കും. ഈ വെയില്‍ കൊണ്ടാല്‍ ചര്‍മ്മപ്രശ്‌നങ്ങള്‍ മുതല്‍ പലതും നമ്മളെ വേട്ടയാടാന്‍ സാധ്യത കൂടുതലാണ്. എങ്കില്‍ വെയില്‍ കൊള്ളാതെ തന്നെ എങ്ങിനെ വിറ്റമിന്‍ ഡി ലഭിക്കും എന്ന് ചിന്തിച്ചിട്ടുണ്ടോ? കിട്ടും. അതിന് നമ്മള്‍ ഈ കാര്യങ്ങള്‍ ചെയ്താല്‍ മതി.
വെള്ളം വെയിലത്ത് വെച്ച് അത് കുടിച്ചാല്‍ വിറ്റമിന്‍ ഡി വര്‍ദ്ധിക്കും എന്ന് നിങ്ങള്‍ കേട്ടിട്ടുണ്ടാകും. സംഭവം സത്യമാണ്. ഇത്തരത്തില്‍ തയ്യാറാക്കുന്ന വെള്ളത്തിന് നിരവധി ഗുണങ്ങളും ഉണ്ട്. ഇവയില്‍ ആന്റി ഫംഗല്‍ പ്രോപര്‍ട്ടി, ആന്റി ബാക്ടീരിയല്‍ പ്രോപര്‍ട്ടി എന്നിവ കാണാന്‍ സാധിക്കുന്നതാണ്.
ആയുര്‍വേദ പ്രകാരം ഈ വെള്ളം കുടിച്ചാല്‍ ദഹനപ്രശ്‌നങ്ങള്‍ വരാതിരിക്കാനും നെഞ്ചെരിച്ചില്‍ ഇല്ലാതാക്കാനും ആമാശത്തിന്റെ ആരോഗ്യം സംരക്ഷിക്കാന്‍ സഹായിക്കുന്നതായും പറയുന്നു.
ഇത് തയ്യാറാക്കുന്നതിനായി ഒരു കുപ്പിയില്‍ ഒരു ഗ്ലാസ്സ് വെള്ളം എടുക്കുക. ഇതിനായി ഒരിക്കലും പ്ലാസ്റ്റിക്ക് കുപ്പി തിരഞ്ഞെടുക്കാതിരിക്കുക. ഈ വെള്ളം മൂടിവെച്ച് നല്ല വെയിലത്ത് 8 മണിക്കൂര്‍വെക്കണം.
ഇത്തരത്തില്‍ അടുപ്പിച്ച് മൂന്ന് ദിവസം വീത് എട്ട് മണിക്കൂര്‍ വെക്കുക. ഇത് ശരീരത്തിലേയ്ക്ക് വിറ്റമിന്‍ ഡി എത്തിക്കുന്നതിന് സഹായിക്കുന്നുണ്ട്.
പാല്‍ ഉല്‍പന്നങ്ങള്‍
പശുവിന്‍ പാല്‍, ബദാം പാല്‍, എന്നിവയും പാല്‍ ഉല്‍പന്നങ്ങളും വിറ്റമിന്‍ ഡിയുടെ ഒരു കലവറ തന്നെയാണ്. ഇവ നിങ്ങളുടെ ഡയറ്റില്‍ ചേര്‍ത്ത് കഴിക്കുന്നത് വിറ്റമിന്‍ ഡി ശരീരത്തില്‍ കൃത്യമായി എത്തുന്നതിന് സഹായിക്കുന്നുണ്ട്. കൂടാതെ, പാല്‍ ഉല്‍പന്നങ്ങള്‍ കഴിക്കുന്നത് കൊണ്ട് കൃത്യമായ അളവില്‍ കാല്‍സ്യം ശരീരത്തില്‍ എത്തുന്നതിനും സഹായിക്കുന്നു.
പാല്‍ കുടിക്കുമ്പോള്‍ അതില്‍ പഞ്ചസ്സാര ചേര്‍ക്കാതെ ഒരു ഗ്ലാസ്സ് വീതം ദിവസേന കുടിക്കുന്നതാണ് നല്ലത്. ഇത് ആരോഗ്യത്തിന് ഗുണം ചെയ്യും. അതുപോലെ, ശരീരത്തിലേയ്ക്ക് പ്രോട്ടീന്‍ എത്തിക്കുന്നതിനും ഇത് സഹായിക്കുന്നതിനാല്‍ പേശികള്‍ക്ക് നല്ല ബലം ലഭിക്കുന്നതിനും സഹായിക്കുന്നു.
മുട്ടയുടെ മഞ്ഞ
മുട്ട കഴിക്കാന്‍ ഇഷ്ടമാണെങ്കിലും പലരും മുട്ടയുടെ മഞ്ഞ കഴിക്കാറില്ല. കാരണം, ഇത് തടി കൂടാന്‍ കാരണമാകും എന്ന വിശ്വാസം ഉള്ളതിനാലാണ്. എന്നാല്‍, വിറ്റമിന്‍ ഡിയാല്‍ സമ്പന്നമാണ് ഈ മുട്ടയുടെ മഞ്ഞക്കരു. ഇത് കുട്ടികള്‍ക്കായാലും മുതിര്‍ന്നവര്‍ക്കായാലും നല്‍കുന്നത് ആരോഗ്യത്തിന് നല്ലതാണ്.
മുട്ട നന്നായി പുഴുങ്ങി കഴിക്കുന്നത്, അല്ലെങ്കില്‍ ബുള്‍സൈ അടിച്ച് കഴിക്കുന്നത് നല്ലതാണ്. മുട്ട ഓംലറ്റ് ഉണ്ടാക്കുകയാണെങ്കില്‍ അതില്‍ ഒലീവ് ഓയില്‍ ഒഴിച്ച് തയ്യാറാക്കാന്‍ ശ്രമിക്കുക.
അതുപോലെ, മുട്ട പുഴുങ്ങി എടുക്കുമ്പോള്‍ 9 മിനിറ്റില്‍ കൂടുതല്‍ പുഴുങ്ങാതിരിക്കാന്‍ ശ്രദ്ധിക്കുക. അമിതമായി വേവിക്കുന്നത് മുട്ടയിലെ പോഷക ശോഷണത്തിന് കാരണമാണ്.
കൂണ്‍
മുട്ടയും പാലും പോലെ തന്നെ കൂണ്‍ കഴിക്കുന്നതും വിറ്റമിന്‍ ഡി ശരീരത്തില്‍ എത്താന്‍ സഹായിക്കുന്നുണ്ട്. മുന്‍പ് വെള്ളം വെയിലത്ത് വെക്കുന്നത് പോലെ തന്നെ, കൂണ്‍ നന്നായി വൃത്തിയാക്കി എടുത്തതിന് ശേഷം വെയില്‍ കൊള്ളിച്ച് പാചകത്തിന് എടുക്കുന്നത് ഇതിലെ വിറ്റമിന്‍ ഡിയുടെ അളവ് കൂട്ടാന്‍ സഹായിക്കുന്നു.
അതിനാല്‍, നിങ്ങള്‍ക്ക് ഇത് കറി തയ്യാറാക്കിയോ, അല്ലെങ്കില്‍ നല്ല സാലഡ് തയ്യാറാക്കുമ്പോഴെല്ലാം തന്നെ ചേര്‍ത്ത് കഴിക്കാവുന്നതാണ്. വിറ്റമിന്‍ ഡിയാല്‍ മാത്രമല്ല, കൊളസ്‌ട്രോള്‍ ലെവല്‍ കുറയ്ക്കാനും രോഗപ്രതിരോധശേഷി വര്‍ദ്ധിപ്പിക്കാനും ഇത് സഹായിക്കുന്നുണ്ട്.
നല്ല മത്തി
മത്തി അല്ലെങ്കില്‍ ചാള എന്നെല്ലാം പറയുന്ന ഈ മീന്‍ നിരവധി പോഷകങ്ങളാല്‍ സമ്പന്നമാണ്. ഇതില്‍ ഒമേഗ- 3 ഫാറ്റി ആസിഡ് അടങ്ങിയിരിക്കുന്നു. അതുപോലെ തന്നെ, കാല്‍സ്യം വിറ്റമിന്‍ ഡി എന്നിവയാല്‍ സമ്പന്നമാണ് മത്തി.
ഒട്ടുമിക്ക ആളുകളും കഴിക്കാന്‍ ഇഷ്ടപ്പെടുന്ന ഈ മീന്‍ നല്ലപോലെ കറിവെച്ച് കഴിക്കുന്നതും ഇതിന്റെ മുള്ള് കഴിക്കുന്നതുമെല്ലാം തന്നെ ശരീരത്തിലേയ്ക്ക് വിറ്റമിന്‍ ഡി എത്തുന്നതിന് സഹായിക്കുന്നു.
