ഉത്തർപ്രദേശിലെ ലഖ്‌നൗ ജില്ലയിൽ ഒന്നാം ക്ലാസ് മുതൽ എട്ടാം ക്ലാസ് വരെയുള്ള എല്ലാ സ്‌കൂളുകളും ജനുവരി 6 വരെ അവധി പ്രഖ്യാപിച്ച് ഭരണകൂടം. ജനുവരി 6 വരെ ലഖ്‌നൗ ജില്ലയിലെ എല്ലാ സ്‌കൂളുകളിലും ശൈത്യകാല അവധി പ്രഖ്യാപിച്ചതായി ജില്ലാ വിദ്യാഭ്യാസ ഓഫീസർ പുറപ്പെടുവിച്ച ഉത്തരവിൽ പറയുന്നു.
“9 മുതൽ 12 വരെ ക്ലാസുകൾ നടക്കുന്നുണ്ടെങ്കിൽ, അവരുടെ സമയം രാവിലെ 10:00 മുതൽ 03:00 വരെ മാത്രമാകും,” ജില്ലാ വിദ്യാഭ്യാസ ഓഫീസറെ ഉദ്ധരിച്ച് വാർത്താ ഏജൻസി എഎൻഐ റിപ്പോർട്ട് ചെയ്തു.”മേൽപ്പറഞ്ഞവ കർശനമായി പാലിക്കുന്നുണ്ടെന്ന് ഉറപ്പാക്കണം.
മുകളിൽ പറഞ്ഞവ പാലിക്കുന്നില്ലെന്ന് കണ്ടെത്തുന്ന സ്‌കൂളിനെതിരെ കർശനമായ നടപടി സ്വീകരിക്കും,” ഉത്തരവിൽ കൂട്ടിച്ചേർത്തു. കനത്ത മൂടൽ മഞ്ഞിനെത്തുടർന്ന് ഐഎംഡി ഉത്തർപ്രദേശിൽ ഓറഞ്ച് അലേർട്ട് പുറപ്പെടുവിച്ചു. വരും ദിവസങ്ങളിൽ ഉത്തർപ്രദേശിന്റെ ചില ഭാഗങ്ങളിൽ ശീത തരംഗ സാധ്യത കണക്കിലെടുത്ത് ഇന്ത്യൻ കാലാവസ്ഥാ വകുപ്പിന്റെ (ഐഎംഡി) ഓറഞ്ച് അലർട്ട് പ്രഖ്യാപിച്ചിട്ടുണ്ടെന്ന് അധികൃതർ അറിയിച്ചു.
സംസ്ഥാനത്തിന്റെ വിവിധ ഭാഗങ്ങളിൽ യെല്ലോ അലർട്ട് പ്രഖ്യാപിച്ചിട്ടുണ്ട്.ജനുവരി 3, 4 തീയതികളിൽ തെക്കൻ ഉത്തർപ്രദേശിന്റെ ചില ഭാഗങ്ങളിൽ ഒറ്റപ്പെട്ട മഴയ്ക്കും സാധ്യതയുള്ളതായി കാലാവസ്ഥാ വകുപ്പ് പ്രവചിക്കുന്നു.
ജനുവരി അഞ്ച് മുതൽ സംസ്ഥാനത്തിന്റെ ചില ഭാഗങ്ങളിൽ താപനില കുറയുമെന്നും പ്രവചനമുണ്ട്. ഝാൻസി, ബന്ദ, ഒറായ്, ചിത്രകൂട്, കൗശാമ്പി, മിർസാപൂർ, സോൻഭദ്ര, വാരണാസി, ചന്ദൗലി തുടങ്ങിയ ജില്ലകളിലും സമീപ പ്രദേശങ്ങളിലും അടുത്ത 48 മണിക്കൂറിനുള്ളിൽ മഴ പെയ്യാൻ സാധ്യതയുണ്ടെന്ന് ലഖ്‌നൗവിലെ ഐഎംഡി ഓഫീസിന്റെ ചുമതലയുള്ള ഉദ്യോഗസ്ഥൻ പറഞ്ഞു. ചൊവ്വാഴ്ച സംസ്ഥാനത്ത് കനത്ത മൂടൽമഞ്ഞാണ് അനുഭവപ്പെട്ടത്.
