കണ്ണൂർ: റബ്ബറിന് 250 രൂപയാക്കിയാൽ എൽഡിഎഫിന് വോട്ട് നൽകുമെന്ന് തലശേരി ആർച്ച് ബിഷപ്പ് മാർ ജോസഫ് പാംപ്ലാനി. നവകേരള സദസ്സിൽ വില ഉയർത്തൽ പ്രഖ്യാപിക്കണം. കർഷകന് നൽകിയ വാഗ്ദാനം പാലിച്ചാൽ യാത്ര ഐതിഹാസികമെന്ന് പറയാം. ഇല്ലെങ്കിൽ നവകേരള സദസ്സ് കൊണ്ട് ഒരു ചുക്കും സംഭവിക്കാൻ പോകുന്നില്ല.
ഒരു ചങ്കോ രണ്ട് ചങ്കോ ഉണ്ടായിക്കോട്ടെ, വാഗ്ദാനം പാലിക്കണമെന്നും മാർ ജോസഫ് പാപ്ലാംനി പറഞ്ഞു. കണ്ണൂർ ഇരട്ടിയിൽ നടന്ന കർഷക അതിജീവനയാത്ര ഉദ്ഘാടനം ചെയ്യുകയായിരുന്നു അദ്ദേഹം.”റബ്ബറിന് 300 രൂപ വേണമെന്ന് ഞാൻ പറഞ്ഞപ്പോൾ വലിയ വിഷമമായി പോയല്ലോ. വേണ്ട, 50 കുറയ്ക്കാം. നിങ്ങള് പറഞ്ഞ 250 തന്നാൽ മതി. തരുമെങ്കിൽ നിങ്ങളുടെ ഈ യാത്ര ഐതിഹാസിക യാത്രയാണ്. അല്ലെങ്കിൽ ഈ യാത്രകൊണ്ട് ഒരു ചുക്കും സംഭവിക്കാൻ പോകുന്നില്ല.
അതുകൊണ്ട് മുഖ്യമന്ത്രിയോട് എനിക്ക് പറയാനുള്ളത്, തിരുവനന്തപുരത്ത് അങ്ങയുടെ യാത്ര എത്തുന്നതിനു മുൻപ് അങ്ങ് എവിടെവെച്ചു പ്രഖ്യാപിച്ചാലും കുഴപ്പമില്ല. ഒരു പ്രഖ്യാപനം ഞങ്ങൾ കാതോർത്തിരിക്കുകയാണ്. ഒരു ചങ്കോ രണ്ട് ചങ്കോ ഉണ്ടായിക്കോട്ടെ, മുഖ്യമന്ത്രി നെഞ്ചിൽ കൈവെച്ച് പറയണം, അല്ലയോ കർഷകരെ നിങ്ങൾക്ക് ഞാനാണ് വാഗ്ദാനം ചെയ്തത്, റബ്ബറിന് 250 രൂപ വിലതരുമെന്ന്, നിങ്ങൾക്കും ഞങ്ങൾ വോട്ടുതരാൻ തയ്യാറാണ്”- മാർ ജോസഫ് പാംപ്ലാനി പറഞ്ഞു.
അതേസമയം വയനാട്ടിൽ കടുവയുടെ ആക്രമണത്തിൽ കർഷകൻ കൊല്ലപ്പെട്ട സംഭവത്തിൽ ഡിഎഫ്ഐക്കെതിരെ കൊലക്കുറ്റം ചുമത്തി കേസെടുക്കണമെന്ന് മാർ ജോസഫ് പാംപ്ലാനി ആവശ്യപ്പെട്ടു. ലോറിയിടിച്ചാൽ ലോറി ഡ്രൈവറെ ഉത്തരവാദിയാക്കി കേസെടുക്കും. കടുവ തിന്നാൽ ആരാണ് ഉത്തരവാദി?. വയനാട് ഡിഎഫ്ഒക്കെതിരെ കൊലക്കുറ്റത്തിന് കേസെടുത്ത് അദ്ദേഹത്തെ നിയമത്തിൻ്റെ വഴികളിലൂടെ തുറുങ്കിലടക്കണം.
എങ്കിൽ മാത്രമേ കർഷകന് ഇവിടെ സുരക്ഷ ഉണ്ടാകുകയുള്ളൂ. കർഷകൻ കടന്നുപോകുന്നത് സമാനതകളില്ലാത്ത സങ്കടക്കടലിലൂടെയാണെന്നും ആർച്ച് ബിഷപ്പ് പറഞ്ഞു. നേരത്തെ റബ്ബറിന് 300 രൂപയാക്കിയാൽ തെരഞ്ഞെടുപ്പിൽ ബിജെപിയെ സഹായിക്കാമെന്ന് ആർച്ച് ബിഷപ്പ് പറഞ്ഞത് വ്യാപക വിമർശത്തിന് ഇടയാക്കിയിരുന്നു.
