തനിക്കെതിരെയുള്ളഗൗതം ഗംഭീറിൻ്റെ ‘ഫിക്‌സർ’ പരാമർശത്തിനെതിരെ മറുപടിയുമായി മുൻ ഇന്ത്യൻ പേസർ എസ് ശ്രീശാന്ത് . സമൂഹമാധ്യമങ്ങളിലൂടെയാണ് ഗംഭീറിനെതിരെ ശ്രീശാന്ത് രംഗത്തെത്തിയത്. ലെജൻഡ്‌സ് ലീഗ് ക്രിക്കറ്റ് മത്സരത്തിനിടെ (legends league cricket) ഗംഭീർ തന്നോടും അമ്പയർമാരോടും മോശമായി സംസാരിച്ചുവെന്ന് ശ്രീശാന്ത് നേരത്തെ ഇൻസ്റ്റാഗ്രാം ലൈവിലൂടെ (Instagram Live) വ്യക്തമാക്കി രംഗത്തെത്തിയിരുന്നു.
ഇന്ത്യാ ക്യാപ്പിറ്റല്‍സും ഗുജറാത്ത് ജയന്റ്‌സും തമ്മിലുള്ള കളിക്കിടെ ഗംഭീറും ശ്രീശാന്തും വാക്‌പോരില്‍ ഏര്‍പ്പെടുകയായിരുന്നു. ക്യാപ്പിറ്റല്‍സ് ടീമിന്റെ നായകനായ ഗംഭീര്‍ ബാറ്റ് ചെയ്യുന്നതിനിടെയായിരുന്നു സംഭവം. സഹതാരങ്ങളും അംപയറും ഇടപെട്ടാണ് ശ്രീയെ പിടിച്ചുമാറ്റിയത്. തുടർന്ന് ഗംഭീറിനെ പരിഹസിച്ച് ശ്രീശാന്തിൻ്റെ ഭാര്യ ഇൻസ്റ്റാഗ്രാമിൽ പോസ്റ്റിട്ടിരുന്നു. മല്‍സരശേഷം എന്താണ് സംഭവിച്ചതെന്നു വിശദീകരിച്ച് ശ്രീശാന്ത് സോഷ്യല്‍ മീഡിയയില്‍ വീഡിയോ പങ്കുവയ്ക്കുകയും ചെയ്തു.
ഗ്രൗണ്ടിൽ വച്ചുള്ള ഗംഭീറിൻ്റെ പെരുമാറ്റത്തിൽ താൻ ഞെട്ടിപ്പോയെന്ന് ശ്രീശാന്ത് പറഞ്ഞിരുന്നു.സഹതാരങ്ങളെപ്പോലും ബഹുമാനിക്കാത്ത ക്രിക്കറ്ററാണ് ഗംഭീറെന്നും എല്ലാവരുമായും പ്രശ്‌നങ്ങളുണ്ടാക്കുകയെന്നത് ശീലമാണെന്നും ശ്രീ ആരോപിച്ചിരുന്നു. പക്ഷെ ഗംഭീര്‍ എന്താണ് തന്നോടു പറഞ്ഞതെന്നു അദ്ദേഹം വെളിപ്പെടുത്തിയിരുന്നില്ല. മണിക്കൂറുകള്‍ക്കു ഇന്‍സ്റ്റഗ്രാം ലൈവില്‍ വന്നതിനു ശേഷമാണ് ഗംഭീര്‍ തന്നെ എന്തു പറഞ്ഞാണ് അധിക്ഷേപിച്ചതെന്നു ശ്രീ തുറന്നു പറഞ്ഞത്.
ഒത്തുകളിക്കാരനെന്നു പലതവണ ഗംഭീര്‍ അധിക്ഷേപിച്ചുവെന്നും പക്ഷെ താന്‍ മോശമായി ഒന്നും പ്രതികരിച്ചിട്ടില്ലെന്നുമായിരുന്നു ശ്രീ വ്യക്തമാക്കിയത്. അതിനു പിന്നാലെയാണ് ഗംഭീര്‍ സോഷ്യല്‍ മീഡിയയിലൂടെ ഇവയോടു പ്രതികരിച്ചത്. ശ്രദ്ധയാകര്‍ഷിക്കാനുള്ള ശ്രമങ്ങളാണ് ഇതൊക്കെയശന്നായിരുന്നു ചിരിക്കുന്ന ഫോട്ടോയ്‌ക്കൊപ്പം ഗംഭീർ വ്യക്തമാക്കിയത്. നിങ്ങള്‍ അഹങ്കാരിയും യാതൊരു തരത്തിലുള്ള നിലവാരവുമില്ലാത്ത വ്യക്തിയുമാണ്. നിങ്ങളെ പിന്തുണച്ചവരോടു പോലും യാതൊരു ബഹുമാനവും കാണിക്കാത്തയാളാണ്. ഇന്നലെ വരെ നിങ്ങളോടും കുടംബത്തോടും എല്ലായ്‌പ്പോഴും എനിക്കു ബഹുമാനമായിരുന്നു.
ഒത്തുകളിക്കാരനെന്ന വാക്ക് നിങ്ങള്‍ ഒരു തവണയല്ല ഏഴോ, എട്ടോ തവണയാണ് ഉപയോഗിച്ചത്. അംപയര്‍ക്കെതിരേയും നിങ്ങള്‍ അശ്ലീല വാക്കുകള്‍ പ്രയോഗിച്ചു- ശ്രീശാന്ത് മറുപടിയിൽ പറയുന്നു.
എനിക്കുണ്ടായതു പോലെയുള്ള അനുഭവം നേരിട്ടിട്ടുള്ളവര്‍ ഒരിക്കലും നിങ്ങളോടു ക്ഷമിക്കില്ലെന്നും ശ്രീശാന്ത് ചൂണ്ടിക്കാട്ടുന്നു. നിങ്ങള്‍ എന്താണ് പറഞ്ഞതെന്നും അതു തെറ്റായിരുന്നുവെന്നും നിങ്ങള്‍ക്കറിയാം. ദൈവം നിങ്ങളോടു പൊറുക്കില്ലെന്നു എനിക്കുറപ്പാണെന്നും ശ്രീശാന്ത് വ്യക്തമാക്കുന്നു. അതിനു ശേഷം നിങ്ങള്‍ ഫീല്‍ഡിലേക്കു പോലും വന്നിട്ടില്ല. ദൈവം എല്ലാം കാണുന്നുണ്ട്- വളരെ വെെകാരികപരമായിരുന്നു ശ്രീശാന്തിൻ്റെ കുറിപ്പ്.
