മണിപ്പൂരിലെ വിമത ഗ്രൂപ്പായ യുണൈറ്റഡ് നാഷണല്‍ ലിബറേഷന്‍ ഫ്രണ്ട് (യുഎന്‍എല്‍എഫ്) കേന്ദ്ര സര്‍ക്കാരുമായി സമാധാന കരാറില്‍ ഒപ്പുവച്ചതായി കേന്ദ്ര ആഭ്യന്തര മന്ത്രി അമിത് ഷാ. സമാധാന ഉടമ്പടിയില്‍ ഒപ്പുവെച്ചതിന് ശേഷം യുഎന്‍എല്‍എഫ്(UNLF) പ്രവർത്തകർ ആയുധങ്ങള്‍ വെച്ച് കീഴടങ്ങുന്നതിന്റെ വീഡിയോയും അദ്ദേഹം എക്സില്‍ പങ്കുവച്ചു. മെയ് 3 ന് സംസ്ഥാനത്ത് ആരംഭിച്ച വംശീയ കലാപത്തിന് ശേഷം ഇതാദ്യമായാണ് താഴ്‌വരയിലെ ഒരു നിരോധിത സംഘടന സര്‍ക്കാരുമായി സമാധാന ചര്‍ച്ചകളില്‍ ഏര്‍പ്പെടുന്നത്.
‘മണിപ്പൂരിലെ ഏറ്റവും പഴയ സായുധ ഗ്രൂപ്പായ യുഎന്‍എല്‍എഫ് അക്രമം ഉപേക്ഷിച്ച് മുഖ്യധാരയില്‍ ചേരാന്‍ സമ്മതിച്ചു. ജനാധിപത്യ പ്രക്രിയകളിലേക്ക് ഞാന്‍ അവരെ സ്വാഗതം ചെയ്യുന്നു, സമാധാനത്തിന്റെയും പുരോഗതിയുടെയും പാതയിലേക്കുള്ള അവരുടെ യാത്രയില്‍ എല്ലാ ആശംസകളും നേരുന്നു.’, സമാധാന ഉടമ്പടി പ്രഖ്യാപിച്ചുകൊണ്ട് അമിത് ഷാ എക്സില്‍ എഴുതി,നവംബര്‍ 13 ന് നിയമവിരുദ്ധ പ്രവര്‍ത്തനങ്ങള്‍ തടയല്‍ നിയമത്തിന് (UAPA) കീഴില്‍ എട്ട് ‘മെയ്തേയ് തീവ്രവാദ സംഘടനകളുടെ’ നിലവിലുള്ള നിരോധനം കേന്ദ്ര ആഭ്യന്തര മന്ത്രാലയം നീട്ടി. ഈ നിരോധിത ഗ്രൂപ്പുകളില്‍ യുഎന്‍എല്‍എഫും ഉള്‍പ്പെട്ടിരുന്നു.
നവംബര്‍ 26 ന് സംസ്ഥാന സര്‍ക്കാര്‍ യുഎന്‍എല്‍എഫുമായി ഒരു ചരിത്രപരമായ സമാധാന കരാറില്‍ ഒപ്പുവെക്കുന്നതിന്റെ വക്കിലാണ് എന്ന് മണിപ്പൂര്‍ മുഖ്യമന്ത്രി ബിരേന്‍ സിംഗ് പ്രഖ്യാപിച്ചു.ഇതിനിടെ മണിപ്പൂരിലെ മെയ്തേയ് തീവ്രവാദ ഗ്രൂപ്പുകള്‍ക്ക് നിരോധനം ഏര്‍പ്പെടുത്താന്‍ മതിയായ കാരണമുണ്ടോ എന്നും നിയന്ത്രണങ്ങള്‍ തുടരണമോ എന്നും തീരുമാനിക്കാന്‍ ഒരു ട്രൈബ്യൂണല്‍ രൂപീകരിച്ചതായി ആഭ്യന്തര മന്ത്രാലയം അറിയിച്ചു. ഗുവാഹത്തി ഹൈക്കോടതിയില്‍ നിന്നുള്ള ജസ്റ്റിസ് സഞ്ജയ് കുമാര്‍ മേധി ഉള്‍പ്പെടുന്ന ട്രൈബ്യൂണലാണ് ഈ സംഘടനകളെ നിരോധിക്കാന്‍ മതിയായ കാരണമുണ്ടോയെന്ന് പരിശോധിക്കുക.
നിയമവിരുദ്ധ സംഘടനകൾ
പീപ്പിൾസ് ലിബറേഷൻ ആർമി (PLA), അതിന്റെ രാഷ്ട്രീയ വിഭാഗമായ റെവല്യൂഷണറി പീപ്പിൾസ് ഫ്രണ്ട് (RPF), യുണൈറ്റഡ് നാഷണൽ ലിബറേഷൻ ഫ്രണ്ട് (UNLF), അതിന്റെ സായുധ വിഭാഗമായ മണിപ്പൂർ പീപ്പിൾസ് ആർമി (MPA), പീപ്പിൾസ് റെവല്യൂഷണറി പാർട്ടി ഓഫ് കാംഗ്ലീപാക് (PREPAK), അതിന്റെ സായുധ വിഭാഗമായ ‘റെഡ് ആർമി’, കംഗ്ലീപാക് കമ്മ്യൂണിസ്റ്റ് പാർട്ടി (കെസിപി) അതിന്റെ സായുധ വിഭാഗമായ ‘റെഡ് ആർമി’, കംഗ്ലേയ് യോൾ കൻബ ലുപ് (കെവൈകെഎൽ), കോർഡിനേഷൻ കമ്മിറ്റി (കോർകോം), അലയൻസ് ഓഫ് സോഷ്യലിസ്റ്റ് യൂണിറ്റി കംഗ്ലീപാക്ക് (ASUK) അവരുടെ മുന്നണി സംഘടനകൾ എന്നിവയെയാണ് നിയമവിരുദ്ധ സംഘടനകളായി പ്രഖ്യാപിച്ചത്. അഞ്ച് വർഷത്തേക്ക് നിയമവിരുദ്ധ പ്രവർത്തനങ്ങൾ തടയൽ നിയമത്തിന് (യുഎപിഎ) കീഴിലാണ് ഇവയെ നിരോധിച്ചിരുന്നത്.
