യുവാക്കളിലെ പ്രമേഹം അകറ്റിനിര്‍ത്താം.

പാൻക്രിയാസില്‍ ഉല്‍പാദിപ്പിക്കുന്ന ഇൻസുലിൻ എന്ന ഹോര്‍മോണാണ് ഗ്ലൂക്കോസിന്റെ അളവ് നിയന്ത്രിക്കുന്നത്. ഇൻസുലിന്റെ അളവ് കുറയുന്നതാണ് പ്രമേഹത്തിന് കാരണമാകുന്നത്.

അവഗണിച്ചാല്‍ അപകടം വരുത്തിവെക്കുന്ന രോഗമാണിത്. ശരീരത്തിലെ ഏതാണ്ട് എല്ലാ അവയവങ്ങളുടെയും പ്രവര്‍ത്തനം താറുമാറാക്കാൻ പ്രമേഹത്തിനാകും. ഹൃദ്രോഗം, സ്ട്രോക്ക്, വൃക്കരോഗങ്ങള്‍, കാഴ്ചപ്രശ്നങ്ങള്‍ തുടങ്ങി പല രോഗങ്ങള്‍ക്ക് പിന്നിലും ഒളിഞ്ഞിരിക്കുന്നു ഈ വില്ലൻ.

ലക്ഷണങ്ങള്‍

നിരന്തരമായി മൂത്രം ഒഴിക്കാൻ തോന്നുക, ദാഹം, വിശപ്പ്, ക്ഷീണം, ശരീരഭാരം ക്രമാതീതമായി കുറയുക, ശരീരത്തില്‍ ചൊറിച്ചില്‍, കാഴ്ചയില്‍ മങ്ങല്‍, കൈകളിലോ കാലുകളിലോ അനുഭവപ്പെടുന്ന തരിപ്പ് അല്ലെങ്കില്‍ മരവിപ്പ്, മുറിവുകള്‍ പതുക്കെ ഉണങ്ങുക, ശരീരത്തിലെ ചുളിവുകളുടെ ഭാഗങ്ങളില്‍ ചര്‍മം കറുപ്പാകുന്നു (അകാന്തോസിസ് നൈഗ്രിക്കൻസ്) എന്നിവയെല്ലാം പ്രമേഹത്തിന്റെ പ്രധാന ലക്ഷണങ്ങളാണ്. പ്രമേഹം സ്ഥിരീകരിക്കാനുള്ള ഏറ്റവും ഫലപ്രദമായ മാര്‍ഗം രക്തപരിശോധനയാണ്. രോഗം സ്ഥിരീകരിച്ചാല്‍ ഡോക്ടറെ സന്ദര്‍ശിച്ച്‌ കൃത്യമായി ചികിത്സ തേടുകയും വേണം.

യുവാക്കളിലെ പ്രമേഹ സാധ്യത

അനാരോഗ്യകരമായ ജീവിതരീതിയും ഭക്ഷണക്രമവും തന്നെയാണ് പ്രധാന പ്രശ്നം. ഫാസ്റ്റ് ഫുഡ്, മധുര പലഹാരങ്ങള്‍, സോഫ്റ്റ് ഡ്രിങ്ക്സ് എന്നിവയുടെ അനിയന്ത്രിത ഉപയോഗം, വ്യായാമം ഇല്ലാത്തത്, ഇരുന്ന് ജോലി ചെയ്യുന്ന പ്രവണത എന്നിവയും യുവാക്കളിലെ പ്രമേഹസാധ്യത വര്‍ധിപ്പിക്കുന്ന കാര്യങ്ങളാണ്. പുകവലിയും മദ്യപാനവുമാണ് മറ്റൊരു ഘടകം. 30-40 ശതമാനം പുകവലിക്കാര്‍ക്കും ടൈപ്പ് രണ്ട് ഡയബറ്റിസ് സാധ്യത കൂടുതലാണ്. അമിതമായ മദ്യപാനം രക്തത്തിലെ ഗ്ലൂക്കോസിന്റെ നില ഉയര്‍ത്തുമെന്നും കണ്ടെത്തിയിട്ടുണ്ട്.

പ്രമേഹവുമായി ബന്ധപ്പെട്ട സങ്കീര്‍ണതകള്‍

രക്തത്തിലെ പ്രമേഹനില ഉയര്‍ന്നു നില്‍ക്കുന്ന അവസ്ഥയാണ് ഹൈപ്പര്‍ ഗ്ലൈസീമിയ. ഇത് നിയന്ത്രണമില്ലാതെ തുടര്‍ന്നാല്‍ 10-15 വര്‍ഷംകൊണ്ട് വിവിധ അവയവങ്ങളെ തകരാറിലാക്കിയേക്കാം. അനിയന്ത്രിത പ്രമേഹം കാഴ്ചയെ പലതരത്തില്‍ തകരാറിലാക്കും. റെറ്റിനോപ്പതി, ഗ്ലൂക്കോമ, തിമിരം, റെറ്റിനല്‍ ഡിറ്റാച്ച്‌മെന്റ്, ഡയബറ്റിക് മാക്യുലോപ്പതി തുടങ്ങിയ കാഴ്ച പ്രശ്നങ്ങള്‍ക്ക് പ്രമേഹം കാരണമാകും. അനിയന്ത്രിതമായ പ്രമേഹമുള്ളവരില്‍ ഹൃദ്രോഗസാധ്യത മൂന്നുമുതല്‍ നാലുമടങ്ങ് കൂടുതലാണെന്ന് പഠനങ്ങള്‍ പറയുന്നു. പ്രമേഹം ഹൃദയരക്തക്കുഴലുകളെയും ഹൃദയ പ്രവര്‍ത്തനങ്ങളെ നിയന്ത്രിക്കുന്ന നാഡികളെയും ബാധിക്കുമ്ബോഴാണ് ഹൃദ്രോഗങ്ങള്‍ക്ക് കാരണമാകുന്നത്.

അനിയന്ത്രിതമായ പ്രമേഹം മൂലമുണ്ടാകുന്ന സങ്കീര്‍ണതകളില്‍ പ്രധാനമാണ് ഡയബറ്റിക് ഫൂട്ട് അഥവാ പാദ സംബന്ധമായുണ്ടാകുന്ന പ്രശ്നങ്ങള്‍. കാലില്‍ വരുന്ന ചെറിയ വ്രണങ്ങള്‍ മുതല്‍ കാലിലേക്കുള്ള രക്തയോട്ടം നിലക്കുന്നതിനെ തുടര്‍ന്ന് കാല്‍ മുറിച്ചുമാറ്റേണ്ട സാഹചര്യം വരെയുള്ള പ്രശ്നങ്ങളെല്ലാം ഡയബറ്റിക് ഫൂട്ടില്‍ പെടുന്നു. വൃക്കരോഗങ്ങളുടെ പ്രധാന കാരണങ്ങളിലൊന്നായി അനിയന്ത്രിതമായ പ്രമേഹത്തെ കണക്കാക്കുന്നുണ്ട്. പ്രമേഹം കൂടുന്നതുമൂലം വൃക്കയിലെ അതിസൂക്ഷ്മമായ രക്തക്കുഴലുകള്‍ തകരാറിലാവുകയും വൃക്കയുടെ പ്രവര്‍ത്തനം തടസ്സപ്പെടുകയും ചെയ്യുന്ന അവസ്ഥ ഉണ്ടാകാം. ഡയബറ്റിക് നെഫ്രോപ്പതി എന്നാണ് ഇത് അറിയപ്പെടുന്നത്.

അനിയന്ത്രിതമായ പ്രമേഹംമൂലം രക്തക്കുഴലുകള്‍ക്ക് ക്ഷതം സംഭവിക്കുമ്ബോള്‍ ശ്വാസകോശത്തിലേക്ക് ആവശ്യത്തിന് ഓക്സിജൻ എത്താതെ വരും. ഇത് അണുബാധയുടെ സാധ്യത കൂട്ടും. ക്ഷയം, ന്യൂമോണിയ തുടങ്ങിയവ ബാധിക്കാൻ ഇത് ഇടയാക്കാം. ദീര്‍ഘകാലം പ്രമേഹനില ഉയര്‍ന്നുനില്‍ക്കുന്നതുകാരണം മസ്തിഷ്കത്തിലേക്കുള്ള രക്തക്കുഴലുകളില്‍ ഉണ്ടാകുന്ന തകരാറുകളാണ് സ്ട്രോക്കിലേക്ക് നയിക്കുന്നത്. രക്തക്കുഴലിലെ തടസ്സം കാരണമുണ്ടാകുന്ന ഇസ്കീമിക് സ്ട്രോക്കിനും രക്തക്കുഴല്‍ പൊട്ടിയുണ്ടാകുന്ന ഹെമറാജിക് സ്ട്രോക്കിനും പ്രമേഹം ഇടയാക്കുന്നുണ്ട്. ഇവക്കുപുറമെ ലൈംഗിക പ്രശ്നങ്ങള്‍, നാഡീ തകരാറുകള്‍, മോണരോഗങ്ങള്‍, ഗര്‍ഭകാല സങ്കീര്‍ണതകള്‍ തുടങ്ങിയവക്കും അനിയന്ത്രിതമായ പ്രമേഹം കാരണമാകുന്നു.

പ്രമേഹത്തെ അകറ്റിനിര്‍ത്താം

ജീവിതശൈലിയില്‍ കൊണ്ടുവരുന്ന മാറ്റങ്ങളിലൂടെ പ്രമേഹ സാധ്യത ഒഴിവാക്കാനും, രോഗം ബാധിച്ചവര്‍ക്ക് നിയന്ത്രിച്ച്‌ കൊണ്ടുപോകാനും കഴിയും. പതിവായുള്ള വ്യായാമം, ശരീരഭാരം നിയന്ത്രിക്കുക, ആരോഗ്യകരമായ ആഹാരക്രമം പാലിക്കുക എന്നിവയെല്ലാം സുപ്രധാനമാണ്. ആഴ്ചയില്‍ അഞ്ചു ദിവസമെങ്കിലും കുറഞ്ഞത് 30 മിനിറ്റ് വീതം വ്യായാമം ചെയ്യണം. നന്നായി വ്യായാമം ചെയ്യുന്നവര്‍ക്ക് പ്രമേഹസാധ്യത കുറവായിരിക്കുമെന്ന് പഠനങ്ങള്‍ സൂചിപ്പിക്കുന്നു. ഭക്ഷണത്തില്‍ പച്ചക്കറികളും ഇലവര്‍ഗങ്ങളും ധാരാളമായി ഉപയോഗിക്കുക. മധുരവും കാര്‍ബോഹൈഡ്രേറ്റും അടങ്ങിയ ആഹാരം കുറക്കുന്നത് പ്രമേഹത്തെ തടയും. പ്രോട്ടീന്‍, ഫൈബര്‍ എന്നിവ അടങ്ങിയ ബാലന്‍സ് ഡയറ്റ് ശീലിക്കുന്നതും നല്ലതാണ്.