ആര്യനാട്: നടൻ മമ്മൂട്ടി നേതൃത്വം നല്‍കുന്ന ജീവകാരുണ്യ സംഘടനയായ കെയര്‍ ആൻഡ് ഷെയര്‍ ഇന്റര്‍നാഷണല്‍ ഫൗണ്ടേഷനും ആലുവ രാജഗിരി ആശുപത്രിയും സംയുക്താഭിമുഖ്യത്തില്‍ പ്രവര്‍ത്തിക്കുന്ന ആശ്വാസം പദ്ധതിയിലൂടെ തിരുവനന്തപുരം ജില്ലയില്‍ എം.ജി.എം ഗ്രൂപ്പിന്റെ ആഭിമുഖ്യത്തില്‍ ഓക്സിജൻ കോണ്സെൻട്രേറ്ററിന്റെ വിതരണം കേരള മൃഗസംരക്ഷണ, ക്ഷീരവികസന വകുപ്പ് മന്ത്രി ജെ.ചിഞ്ചു റാണി നിര്‍വഹിച്ചു.
ആശ്വാസം പദ്ധതിയിലൂടെ മമ്മൂട്ടിയുടെ നേതൃത്വത്തില്‍ ഓക്സിജൻ കോണ്‍സെൻട്രേറ്റര്‍ വിതരണം ചെയ്യുന്നത് സമൂഹത്തിന് വളരെയേറെ പ്രയോജനം ചെയ്യുന്നുണ്ടെന്നും ശ്വാസത്തിന്റെ വില നമ്മെ ഓരോരുത്തരെയും എത്രമേല്‍ വലുതാണെന്നു മനസ്സിലാക്കി തരുന്നതാണെന്നും മന്ത്രി ചിഞ്ചു റാണി പറഞ്ഞു.
മമ്മൂട്ടി, അദ്ദേഹത്തിന്റെ നേതൃത്വത്തില്‍ കെയര്‍ ആൻഡ് ഷെയര്‍ ഇന്റര്‍നാഷണല്‍ ഫൗണ്ടേഷൻ ചെയ്യുന്ന ഓരോ ജീവകാരുണ്യ പ്രവര്‍ത്തനങ്ങളും വളരെയേറെ സമൂഹത്തിന് നീതിപുലര്‍ത്തുന്ന തരത്തില്‍ ആണെന്നും ഒരുപാട് കാരുണ്യ പ്രവര്‍ത്തനങ്ങള്‍ ചെയ്യാൻ മമ്മൂട്ടിയുടെ നേതൃത്വത്തില്‍ പ്രവര്‍ത്തിക്കുന്ന കെയര്‍ ആൻഡ് ഷെയറിന് കഴിയട്ടെ എന്നും മന്ത്രി ചടങ്ങില്‍ കൂട്ടിച്ചേര്‍ത്തു.
അരുവിക്കര എം.എല്‍.എ അഡ്വ. ജി. സ്റ്റീഫൻ ചടങ്ങില്‍ അധ്യക്ഷത വഹിച്ചു. കെയര്‍ ആൻഡ് ഷെയര്‍ ഇന്റര്‍നാഷണല്‍ ഫൗണ്ടേഷൻ വൈസ് ചെയര്‍മാനും എംജിഎം ഗ്രൂപ്പ് ഓഫ് ഇൻസ്റ്റിറ്റ്യൂഷൻസ് ചെയര്‍മാനുമായ ഡോ. ഗീവര്‍ഗീസ് യോഹന്നാൻ ചടങ്ങില്‍ ആമുഖപ്രഭാഷണം നടത്തി. ആശ്വാസം പദ്ധതി വഴി കിടപ്പിലായ രോഗികള്‍ക്ക് ഓക്സിജൻ കോണ്‍സെൻട്രേറ്റര്‍ നല്‍കുന്നതുവഴി വളരെയേറെ പ്രയോജനകരമാണെന്നും അദ്ദേഹം ചടങ്ങില്‍ പറഞ്ഞു.
മമ്മൂട്ടിയുടെ നേതൃത്വത്തില്‍ കെയര്‍ ആൻഡ് ഷെയര്‍ ഇന്റര്‍നാഷണല്‍ ഫൗണ്ടേഷൻ നടത്തുന്ന നിരവധി ജീവകാരുണ്യ പ്രവര്‍ത്തനങ്ങളില്‍ ഒന്നാണ് ആശ്വാസം പദ്ധതി എന്നും അവയെ കൂടാതെ കെയര്‍ ആൻഡ് ഷെയര്‍ നടത്തുന്ന നിരവധി ജീവകാരുണ്യ പ്രവര്‍ത്തനങ്ങളെ പറ്റി കെയര്‍ ആൻഡ് ഷെയര്‍ ഇന്റര്‍നാഷണല്‍ ഫൗണ്ടേഷൻ മാനേജിംഗ് ഡയറക്ടര്‍ ഫാ. തോമസ് കുര്യൻ മരോട്ടിപ്പുഴ മുഖ്യപ്രഭാഷണം നടത്തി.
ആശ്വാസം പദ്ധതി വഴി കേരളത്തിലെ എല്ലാ ജില്ലകളിലും ഓക്സിജൻ കോണ്‍സെൻട്രേറ്റര്‍ നല്‍കാൻ സാധിച്ചിട്ടുണ്ടെന്നും അവയെല്ലാം വളരെ കൃത്യതയോടെ പ്രവര്‍ത്തിക്കുന്നുണ്ടെന്നും അദ്ദേഹം കൂട്ടിച്ചേര്‍ത്തു. ഓക്സിജൻ കോണ്സെൻട്രേറ്ററിന്റെ വിതരണത്തോടൊപ്പം സ്വിമ്മിംഗ് പൂളിന്റെ ഉദ്ഘാടനവും മന്ത്രി ജെ. ചിഞ്ചു റാണി നിര്‍വഹിച്ചു.
തൊളിക്കോട് ഗ്രാമപഞ്ചായത്ത് പ്രസിഡന്റ് അഡ്വ. വി.ജി സുരേഷ്, വിതുര ഗ്രാമപഞ്ചായത്ത് പ്രസിഡന്റ് മഞ്ജുഷ ആനന്ദ്, എംജിഎം പൊന്മുടി വാലി പബ്ലിക് സ്കൂള്‍ മാനേജര്‍ അഡ്വ. എല്‍. ബീന, എംജിഎം ഗ്രൂപ്പ് ഓഫ് ഇൻസ്റ്റിറ്റ്യൂഷൻസ് അഡ്മിനിസ്ട്രേറ്റീവ് മാനേജര്‍ സുനില്‍കുമാര്‍, എംജിഎം പൊന്മുടി വാലി പബ്ലിക് സ്കൂള്‍ പ്രിൻസിപ്പല്‍ ദീപാ. സി. നായര്‍, മുൻ ദേവസ്വം ബോര്‍ഡ് മെമ്ബര്‍ ചാരുപാറ രവി, ഡോ. ജി. എസ് സുനിത്ര, നിധിൻ ചിറത്തിലാട്ട്, എന്നിവര്‍ ചടങ്ങില്‍ പ്രസംഗിച്ചു.
കേരള സര്‍ക്കാരിനെ കീഴിലുള്ള മീഡിയ അക്കാദമിയുടെ മികച്ച അന്വേഷണാത്മക പരമ്ബരയ്ക്കുള്ള സംസ്ഥാന അവാര്‍ഡ് ജേതാവായ തെന്നൂര്‍ ബി. അശോക്, പത്രപ്രവര്‍ത്തനരംഗത്ത് 25 വര്‍ഷത്തെ സേവനം പൂര്‍ത്തിയാക്കി കെ. മണിലാല്‍ എന്നിവരെ ചടങ്ങില്‍ ആദരിച്ചു .
