താരപുത്രിമാരിൽ നിന്ന് വ്യത്യസ്തമായി കമൽ ഹാസന്റെ മകൾ എന്ന ലേബലിൽ നിന്നും മാറി കരിയറിൽ തന്റേതായ ഇടം നേടിയെടുത്ത നടിയാണ് ശ്രുതി ഹാസൻ. ഹിന്ദി സിനിമയിലൂടെ അരങ്ങേറ്റം കുറിച്ച ശ്രുതി ഇന്ന് തെന്നിന്ത്യയിൽ തിരക്കുള്ള താരമാണ്. തമിഴ്, തെലുങ്ക് സിനിമകളിലെ മുൻ നിര നായിക നടി ആയ ശ്രുതി പ്രതിഫലക്കാര്യത്തിലും മുന്നിലാണ്.
തന്റെ രാഷ്ട്രീയ പ്രവേശനവുമായി ബന്ധപ്പെട്ട ഒരു ചോദ്യത്തിന് ശ്രുതി ഹാസൻ നൽകിയ മറുപടി ശ്രദ്ധനേടുകയാണ്. പുതിയ ചിത്രങ്ങളുടെ തിരക്കിലാണ് താനെന്ന് ശ്രുതി ഹാസൻ മാദ്ധ്യമങ്ങളോട് പറഞ്ഞു. ഈ മേഖലയിൽ തന്നെയാണ് തന്റെ താത്പര്യമെന്നും ശ്രുതി ഹാസൻ പറഞ്ഞുയ നല്ല സിനിമയുടെ ഭാഗമായി കരിയർ കെട്ടിപ്പടുക്കാനാണ് ആഗ്രഹിക്കുന്നത്. രാഷ്ട്രീയത്തിൽ പ്രവേശിക്കാൻ താത്പര്യമില്ലെന്നും ശ്രുതി ഹാസൻ വ്യക്തമാക്കി.
ശ്രുതിയുടെ പിതാവുകൂടിയായ കമൽഹാസൻ ഒരേസമയം സിനിമയിലും അദ്ദേഹം രൂപീകരിച്ച പാർട്ടിയായ മക്കൾ നീതി മയ്യത്തിന്റെ പ്രവർത്തനങ്ങളിലും സജീവമാണ്. വരുന്ന തിരഞ്ഞെടുപ്പുകളുമായി ബന്ധപ്പെട്ട് പിതാവിനൊപ്പം മക്കൾ നീതി മയ്യത്തിന്റെ പ്രചാരണ പരിപാടികളിൽ ശ്രുതി പങ്കെടുക്കുമെന്ന് അഭ്യൂഹങ്ങളുണ്ടായിരുന്നു. ഇത്തരത്തിലുള്ള പ്രചാരണങ്ങൾക്ക് മറുപടി പറയുകയാണ് ശ്രുതി ഹാസൻ.
അതേമയം വമ്പൻ പ്രൊജക്ടുകളാണ് ശ്രുതി ഹാസന്റേതായി അണിയറയിൽ ഒരുങ്ങുന്നത്. ചിരഞ്ജീവി നായകനായ വാൾട്ടയർ വീരയ്യ, ബാലകൃഷ്ണയുടെ വീരസിംഹ റെഡ്ഡി എന്നിവയാണ് ശ്രുതി ഹാസൻ നായികയായെത്തി ഒടുവിൽ തിയേറ്ററുകളിലെത്തിയ ചിത്രങ്ങൾ. പ്രഭാസ് നായകനായെത്തുന്ന സലാറിൽ നായിക ശ്രുതി ഹാസനാണ്.
