വിനായകനെ ഇനി മലയാളികൾക്ക് കിട്ടില്ലെന്നും തെലുങ്ക്, തമിഴ് സിനിമാപ്രവർത്തകർ അദ്ദേഹത്തെ വിട്ടു തരില്ലെന്നും നടി മിർണ മേനോൻ. ‘ജയിലർ’ സിനിമ കണ്ടിട്ട് തന്നെ വിളിക്കുന്നവർക്കെല്ലാം വിനായകൻ എന്ന നടന്റെ കാര്യമാണ് ചോദിക്കാനുള്ളതെന്നും മിർണ പറയുന്നു. ‘ജയിലർ’ സിനിമയിൽ രജനികാന്തിന്റെ മരുമകളുടെ വേഷത്തിലാണ് മിർണ എത്തിയത്.
‘‘രജനി സാറിന്റെ സിനിമ എന്ന രീതിയിൽ അല്ല, നമ്മൾ ഇവിടെ നിന്ന് അങ്ങോട്ട് കൊണ്ടുപോയ സിനിമ പോലെയാണ് അവർ ഈ സിനിമയെ കാണുന്നത്. നമ്മുടെ സൂപ്പർ താരങ്ങളെ അവർ എന്ത് സന്തോഷമായിട്ടാണ് ആഘോഷിക്കുന്നത്. രജനി സാറിനു കിട്ടിയ അതെ സ്വീകാര്യത ലാലേട്ടനും അവിടെ ഉണ്ടായി. വിനായകനെ ഇനി നമുക്ക് ഇവിടെ കിട്ടുമെന്ന് തോന്നുന്നില്ല. അത്രയ്ക്ക് ആരാധകരാണ് അവിടെ. ഞാൻ രണ്ടു തെലുങ്ക് സിനിമകൾ ചെയ്തിട്ടുണ്ട്. അവിടെ എന്നെ അറിയുന്നവർ ഒക്കെ ‘‘വിനായകേട്ടനെ അറിയുമോ’’ എന്ന് ചോദിക്കുന്നുണ്ട്. അദ്ദേഹത്തിന് ഡേറ്റ് ഉണ്ടോ? ഇപ്പോൾ ഏതെങ്കിലും പടം ചെയ്യുന്നുണ്ടോ എന്നൊക്കെയാണ് ചോദിക്കുന്നത്. അത്രയും സ്വീകാര്യത വിനായകൻ ചേട്ടന്റെ കഥാപാത്രത്തിന് ഉണ്ടായി. അഭിമുഖങ്ങളിൽ എല്ലാം ആ കഥാപാത്രത്തെപ്പറ്റി പറയാതെ പോകില്ല. വിനായകൻ സീരിയസ് കഥാപാത്രങ്ങൾ മാത്രമല്ല ചെയ്യുന്നത് പുള്ളിയുടെ കോമഡി കാണണമെങ്കിൽ ഇവിടെ വന്നു മലയാളം സിനിമ കാണൂ എന്ന് വിളിച്ച് അന്വേഷിക്കുന്നവരോട് ഞാൻ പറയും.
എല്ലാ കഥാപാത്രങ്ങളും ചെയ്യാൻ കഴിയുന്ന ആളാണ് വിനായകൻ. നെൽസൺ സർ സിനിമ എടുക്കുന്നത് ആറു മുതൽ അറുപതു വയസ്സുവരെയുള്ള ആളുകൾക്ക് വേണ്ടിയാണ്. ഈ സിനിമയിലൂടെ അത് സാധിച്ചു എന്നാണു തോന്നുന്നത്. രജനി സർ, ലാലേട്ടൻ എന്നിവരോടൊപ്പം ഒരുമിച്ച് അഭിനയിച്ചു എന്ന് പറയുന്നത് സ്വപ്നം പോലെയാണ് തോന്നുന്നത്. ഈ സിനിമയിൽ എല്ലാ താരങ്ങളുടെയും കഥാപാത്രം വളരെ നന്നായി വന്നിട്ടുണ്ട്. തമിഴ്നാട്ടിൽ കാവാല പാട്ടുമായി തിയറ്ററിന്റെ മുന്നിൽ ഡാൻസ് ചെയ്യുന്നവർ ഉണ്ടായിരുന്നു. അവർ സിനിമ കാണുന്നത് വേറൊരു രീതിയിലാണ്. വളരെ ശാന്തമായി മെഡിറ്റേഷൻ ഒക്കെ ചെയ്തു ഇരിക്കുന്ന ആളാണ് രജനി സർ. നന്നായി കോമഡി പറയുന്ന ആളാണ്. ജീവിതത്തിൽ വലിയൊരു ഭാഗ്യം തന്നെയാണ് ഈ സിനിമ.’’–മിർണ മേനോൻ മനസ് തുറന്നു.
