തോട്ടപ്പള്ളി പാലത്തില്‍നിന്നു കനാലിലേക്കു ചാടിയ യുവാവിന്റെ മൃതദേഹം കണ്ടെത്തി. കൊല്ലംകരുനാഗപ്പള്ളി സ്വദേശി അഖിലാണ് (30) മരിച്ചത്. പിതാവിനൊപ്പം കാറില്‍ ആശുപത്രിയിലേക്കു പോകുമ്പോള്‍ ഇയാള്‍ ഡോര്‍ തുറന്നു ചാടുകയായിരുന്നു. നാട്ടുകാരും തീരദേശ പൊലീസും അഗ്‌നിരക്ഷാ സേനയും ചേര്‍ന്ന് നടത്തിയ തിരച്ചിലിലാണ് മൃതദേഹം കണ്ടെത്തിയത്.
പാന്‍ക്രിയാസ് രോഗബാധിതനായിരുന്ന അഖില്‍ കരുനാഗപ്പള്ളി ഗവ. ആശുപത്രിയില്‍ ചികിത്സയിലായിരുന്നു. രാവിലെ 11.30ഓടെ രോഗം മൂര്‍ച്ഛിച്ചതിനെ തുടര്‍ന്ന് വണ്ടാനം മെഡിക്കല്‍ കോളേജിലേക്ക് കാറില്‍ കൊണ്ടുപോവുകയായിരുന്നു. തോട്ടപ്പള്ളി സ്പില്‍വേ പാലത്തിലെത്തിയപ്പോള്‍ അഖില്‍ കാറിന്റെ ഡോര്‍ തുറന്ന് കായലിലേക്ക് ചാടുകയായിരുന്നു. പിന്നാലെ പൊലീസിനേയും അഗ്‌നിശമന സേനയേയും വിവരമറിയിച്ചു. ഉച്ചക്ക് 1.45 മണിയോടെയാണ് അഗ്‌നിശമന സേനയുടെ സ്‌കൂബാ സംഘം മൃതദേഹം കണ്ടെത്തിയത്.
