കർണാടകയിൽ “ശക്തി യോജന” പദ്ധതിക്ക് കീഴിൽ ഓടുന്ന ബസുകളിൽ ഇനി സ്ത്രീകൾക്ക് സൗജന്യ യാത്ര. മുഖ്യമന്ത്രി സിദ്ധരാമയ്യയും ഉപമുഖ്യമന്ത്രി ഡികെ ശിവകുമാറും ചേർന്ന് പിങ്ക് സ്മാർട്ട് കാർഡ് വിതരണം ചെയ്തു. പദ്ധതി ഞായറാഴ്ച ആരംഭിച്ചു. കുറവുള്ള സ്ഥലങ്ങളിൽ ബസ് സർവീസ് വർധിപ്പിക്കുമെന്ന് ഗതാഗത മന്ത്രി ഉറപ്പുനൽകി. സ്മാർട്ട് കാർഡ് വിതരണത്തിന് പ്രതീകാത്മകമായി തുടക്കം കുറിക്കുന്നതിനായി സ്‌കീം ലോഞ്ചിൽ അഞ്ച് സ്ത്രീകൾക്ക് പിങ്ക് സ്മാർട്ട് കാർഡുകൾ വിതരണം ചെയ്തു.
“കഴിഞ്ഞ കാലങ്ങളിൽ സംസ്ഥാനത്ത് സ്ത്രീകൾ നിരവധി അതിക്രമത്തിന് ഇരയാകാറുണ്ട്. അവരെ ശാക്തീകരിക്കുന്നതിനും അവരെ സ്വയം പര്യാപ്തരാക്കുന്നതിനുമാണ് ഞങ്ങൾ ഇന്ന് ഈ പദ്ധതി ആരംഭിച്ചത്. മുൻകാലങ്ങളിൽ അവസരങ്ങൾ നഷ്ടപ്പെട്ടതിനാൽ സ്ത്രീകളെയും ദളിതരെയും ശാക്തീകരിക്കേണ്ടതുണ്ട്,” സിദ്ധരാമയ്യ പറഞ്ഞു.
ബെംഗളൂരുവിലെ വിധാന സൗധയിൽ നിന്ന് കലബുർഗി, ഹാസൻ, ധർമസ്ഥല എന്നിവിടങ്ങളിലേക്കുള്ള മൂന്ന് ഇൻട്രാ സിറ്റി ബസുകൾ ഫ്ലാഗ് ഓഫ് ചെയ്തു. പദ്ധതി ആരംഭിച്ചതിന് ശേഷം സിദ്ധരാമയ്യയും ശിവകുമാറും മജസ്റ്റിക് ബസ് സ്റ്റാൻഡിലേക്ക് സവാരി നടത്തി. കർണാടക നിയമസഭാ തെരഞ്ഞെടുപ്പിന് മുന്നോടിയായി കോൺഗ്രസ് നൽകിയ അഞ്ച് തിരഞ്ഞെടുപ്പ് വാഗ്ദാനങ്ങളിലൊന്നായിരുന്നു സ്ത്രീകൾക്ക് സൗജന്യ ബസ് സർവീസ്. കർണാടകയിലെ സ്ത്രീകൾക്ക് ഞായറാഴ്ച (ജൂൺ 11) മുതൽ ഉച്ചയ്ക്ക് 1 മണി മുതൽ സൗജന്യ ബസ് സർവീസ് ലഭിക്കും.
പദ്ധതി ആരംഭിക്കുന്നതിന് മുന്നോടിയായി കർണാടക ഗതാഗത മന്ത്രി രാമലിംഗ റെഡ്ഡി മാധ്യമങ്ങളോട് സംസാരിക്കവെ, സർക്കാർ ബസ് സർവീസുകൾ വർദ്ധിപ്പിക്കുമെന്ന് ഉറപ്പുനൽകി. “സ്മാർട്ട് പാസുകൾക്ക് അപേക്ഷിക്കാൻ മൂന്ന് മാസം ഉണ്ടാകും. സ്മാർട്ട് പാസുകൾ ഒരു സ്വകാര്യതയും ലംഘിക്കില്ല. സ്ത്രീകൾക്ക് യാത്രാ സൗകര്യമാണ് ഞങ്ങളുടെ മുൻഗണന,” റെഡ്ഡി പറഞ്ഞു.
