തമിഴ് നടനും സംവിധായകനുമായ ശരൺ രാജ് വാഹനാപകടത്തിൽ മരിച്ചു. ചെന്നൈയിലെ കെ കെ നഗറിൽ ഇന്നലെ രാത്രി ഉണ്ടായ അപകടത്തിലാണ് മരണം. മറ്റൊരു നടനായ പളനിയപ്പൻറെ കാറും ശരണിൻറെ ബൈക്കും ഇടിച്ചാണ് അപകടമുണ്ടായത്. താമസസ്ഥലത്തേക്ക് പോകുന്നതിനിടെയാണ് അപകടം സംഭവിച്ചത്. അപകടത്തിൽ ഗുരുതരമായ പരിക്കേറ്റ ശരൺ സംഭവസ്ഥലത്തു വച്ചു തന്നെ മരിക്കുകയായിരുന്നുവെന്നാണ് ലഭിക്കുന്ന വിവരം.
അപകടമുണ്ടായ സമയത്ത് മദ്യലഹരിയിലാണ് പളനിയപ്പൻ കാർ ഓടിച്ചതെന്ന റിപ്പോർട്ടുകൾ പുറത്തു വരുന്നുണ്ട്. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചു. വാഹനാപകടത്തിൽ പളനിയപ്പനെ അറസ്റ്റ് ചെയ്തിട്ടുണ്ടെന്നും റിപ്പോർട്ടുകളുണ്ട്. പളനിയപ്പൻറെ വൈദ്യ പരിശോധന റിപ്പോർട്ടടക്കം പരിശോധിച്ച ശേഷമാകും കൂടുതൽ നടപടിയുണ്ടാകുക.
സംവിധായകൻ ശരൺ രാജിന്റെ മൃതദേഹം പോസ്റ്റ്മോർട്ടത്തിനായി അയച്ചു. പ്രശസ്ത സംവിധായകൻ വെട്രിമാരൻറെ അസിസ്റ്റൻറായിരുന്നു മരണപ്പെട്ട ശരൺ. വെട്രിമാരൻറെ ഹിറ്റ് ചിത്രം വട ചെന്നൈയിൽ ശരൺ സഹസംവിധായകനായി പ്രവർത്തിച്ചിരുന്നു. വട ചെന്നൈയിലും അസുരനിലുമടക്കം ശരൺ അഭിനയിക്കുകയും ചെയ്തിട്ടുണ്ട്.
