ഇന്ത്യയുടെ സ്‌റ്റാർട്ടപ്പ് ഇക്കോസിസ്‌റ്റത്തിലെ സമീപകാല മാന്ദ്യം താൽക്കാലികമായതിനാൽ ആശങ്കപ്പെടേണ്ടതില്ലെന്നും, ലോകം മുഴുവൻ സാമ്പത്തിക മാന്ദ്യത്തിലൂടെയാണ് കടന്നുപോകുന്നതെന്നും ഇൻഫോസിസ് സഹസ്ഥാപകൻ ക്രിസ് ഗോപാലകൃഷ്‌ണൻ. ഇന്ത്യാ ടുഡേ കോൺക്ലേവ് സൗത്ത് 2023-ൽ ‘ഇന്ത്യയുടെ സ്‌റ്റാർട്ട്-അപ്പ് ഇക്കോസിസ്‌റ്റം: വിജയവും വെല്ലുവിളികളും’ എന്ന സെഷനിൽ സംസാരിക്കുകയായിരുന്നു അദ്ദേഹം.
ഇടത്തരം മുതൽ ദീർഘകാലത്തേക്ക് ഇന്ത്യയുടെ സ്‌റ്റാർട്ടപ്പ് ഇക്കോസിസ്‌റ്റത്തിൽ താൻ ആത്മ വിശ്വാസത്തോടെ തുടരുന്നുവെന്നും ഗോപാലകൃഷ്‌ണൻ കൂട്ടിച്ചേർത്തു. “എന്നെ സംബന്ധിച്ചിടത്തോളം ഇത് താൽക്കാലികമാണ്. ഇടത്തരം മുതൽ ദീർഘകാലത്തേക്ക് ഇന്ത്യയുടെ സ്‌റ്റാർട്ടപ്പ് ഇക്കോസിസ്‌റ്റത്തിൽ ഞാൻ വളരെ ആത്മ വിശ്വാസത്തിലാണ്. ഒരു പുതിയ ബിസിനസിനുള്ള ഏറ്റവും മികച്ച ഇടമാണ് ഇന്ത്യ, കാരണം ഇത് ലോകത്തിലെ ഏറ്റവും വേഗത്തിൽ വളരുന്ന സമ്പദ്‌വ്യവസ്ഥയാണ്” അദ്ദേഹം പറഞ്ഞു.
AI, ചാറ്റ് ജിപിറ്റി എന്നിവയെ കുറിച്ചുള്ള ചോദ്യങ്ങളോടും അദ്ദേഹം പ്രതികരിച്ചു. “ചാറ്റ്ജിപിടി കേവലം ഒരു ടൂൾ മാത്രമാണ്, കമ്പ്യൂട്ടർ, മൊബൈൽ ഫോൺ, കാർ എന്നിവ പോലെ.”
ഇന്ത്യയിലും ലോകമെമ്പാടുമുള്ള പുതിയ ടെക് കമ്പനികളെ സ്വാധീനിച്ച പിരിച്ചുവിടലുകളെ കുറിച്ച് ചോദിച്ചപ്പോൾ അദ്ദേഹം പറഞ്ഞു, “ഭാഗ്യവശാൽ, ഐടി സേവന വ്യവസായത്തിൽ പിരിച്ചുവിടലുകൾ ഉണ്ടായിട്ടില്ല, മതിയായ പ്രകടനം നടത്താത്ത ചില ആളുകൾക്ക് ഒഴികെ.”
“10-ൽ 9 സ്‌റ്റാർട്ടപ്പുകളും പരാജയപ്പെടുമെന്ന് പ്രതീക്ഷിക്കുന്നുവെങ്കിൽ, പരാജയപ്പെടുന്ന 9ൽ നിങ്ങൾ ചേരുകയാണെങ്കിൽ, ജോലി അവിടെ ഉണ്ടാകുമെന്ന് എങ്ങനെ പ്രതീക്ഷിക്കാം?” അദ്ദേഹം ചോദിച്ചു. 90കളുടെ മധ്യത്തിൽ ഇന്ത്യൻ സ്‌റ്റാർട്ടപ്പുകളുടെ പ്രാരംഭ തരംഗത്തിൽ പരാജയങ്ങളൊന്നും ഉണ്ടായില്ലേ എന്ന് ചോദിച്ചപ്പോൾ, വീഴ്‌ചകൾ ഉണ്ടായതായി അദ്ദേഹം സമ്മതിച്ചു.
“നമ്മൾ 3.5 ട്രില്യൺ ഡോളറിൽ നിന്ന് 20 ട്രില്യൺ ഡോളറിലേക്ക് മാറും, ഒരുപക്ഷേ 40 ട്രില്യൺ ഡോളർ പോലും, അതായത് ധാരാളം പുതിയ ബിസിനസുകൾ നമ്മൾ സൃഷ്‌ടിക്കേണ്ടതുണ്ട്” ക്രിസ് ഗോപാലകൃഷ്‌ണൻ കൂട്ടിച്ചേർത്തു.
