തിരുവനന്തപുരം | അതിശക്തമായ വേനല്‍ചൂടില്‍ വെന്തുരുകി കേരളം. ഏഴ് ജില്ലകളില്‍ കാലാവസ്ഥാ നിരീക്ഷണ കേന്ദ്രം ഇന്ന് മുന്നറിയിപ്പ് പുറപ്പെടുവിച്ചു.
പാലക്കാട്, കണ്ണൂര്‍, കോഴിക്കോട്, തൃശൂര്‍, കോട്ടയം, ആലപ്പുഴ, കൊല്ലം ജില്ലകളിലാണ് മുന്നറിയിപ്പ്. ഈ ജില്ലകളില്‍ പകല്‍ 11 മുതല്‍ മൂന്ന് വരെ പുറത്തിറങ്ങുന്നവര്‍ ജാഗ്രത പാലിക്കണമെന്ന് മുന്നറിയിപ്പില്‍ പറയുന്നു. ചൂട് ശക്തമാകുമ്ബോള്‍ സംസ്ഥാനത്ത് വേനല്‍ മഴയില്‍ വലിയ കുറവാണ് രേഖപ്പെടുത്തുന്നത്. പതിവിനേക്കാള്‍ 38 ശതമാനം കുറവാണ് വേനല്‍ മഴയിലുണ്ടായത്.
മാര്‍ച്ച്‌ ഒന്നിന് വേനല്‍ തുടങ്ങിയ ശേഷമുള്ള ഒന്നരമാസത്തെ കണക്കാണിത്. വടക്കന്‍ കേരളത്തിലാണ് കൂടുതലായും മഴക്കുറവ് അനുഭവപ്പെട്ടത്. കണ്ണൂരിലാണ് ഏറ്റവും കുറവ് മഴ പെയതത്. തീരെ മഴ കിട്ടാതിരുന്ന കണ്ണൂരില്‍ 100 ശതമാനം മഴക്കുറവാണ് രേഖപ്പെടുത്തിയത്. മലപ്പുറത്ത് 95 ശതമാനം മഴക്കുറവും രേഖപ്പെടുത്തി. കാസര്‍കോട്, കോഴിക്കോട് ജില്ലകളില്‍ 94 ശതമാനവും തൃശൂരില്‍ 82 ശതമാനവും മഴക്കുറവ് രേഖപ്പെടുത്തിയിട്ടുണ്ട്.
സാധാരണയേക്കാള്‍ കൂടുതല്‍ മഴ കിട്ടിയത് പത്തനംതിട്ടയിലാണ്. 27 ശതമാനം അധിക മഴയാണ് ഇത്തവണ ലഭിച്ചത്. ഇടുക്കി, കോട്ടയം, വയനാട് ജില്ലകളില്‍ പതിവ് പോലെയാണ് മഴ പെയ്തത്. ഈ മാസം ആറ് മുതല്‍ 12 വരെയുള്ള ദിവസങ്ങളില്‍ 60 ശതമാനം മഴക്കുറവാണ് കേരളത്തിലുണ്ടായത്. മഴ കുറഞ്ഞതും ഉത്തരേന്ത്യയില്‍ നിന്നുള്ള ചൂട് കാറ്റും കാറ്റിന്റെ ഗതിയിലുണ്ടായ മാറ്റവുമാണ് കഴിഞ്ഞയാഴ്ച്ച കേരളത്തില്‍ വന്‍ ചൂട് അനുഭവപ്പെടാന്‍ ഇടയാക്കിയതെന്നാണ് കാലാവസ്ഥാ നിരീക്ഷകരുടെ നിഗമനം.
എന്നാല്‍, കാറ്റിന്റെ ഗതിയിലുണ്ടാകുന്ന മാറ്റവും ഒറ്റപ്പെട്ട മഴയും കാരണമായി ഇനിയുള്ള ദിവസങ്ങളില്‍ ചൂടിന് അല്‍പം ശമനമുണ്ടാകും. ഈര്‍പ്പമേറിയ കാറ്റ് കടന്നുവരാനുള്ള അന്തരീക്ഷമാണ് ഇനിയുള്ള ദിവസങ്ങളിലുള്ളതെന്നും കാലാവസ്ഥാ നിരീക്ഷകര്‍ പ്രവചിക്കുന്നു.
