എയര്‍ ഇന്ത്യ വിമാനവും നേപ്പാള്‍ എയര്‍ലൈനും കൂട്ടിയിടിക്കാതെ രക്ഷപ്പെട്ടത് തലനാരിഴയ്ക്ക്. വെള്ളിയാഴ്ച രാവിലെയായിരുന്നു സംഭവം.
മലേഷ്യയിലെ ക്വാലാലംപൂരില്‍ നിന്ന് കാഠ്മണ്ഡുവിലേക്ക് വരികയായിരുന്ന നേപ്പാള്‍ എയര്‍ലൈന്‍സിന്റെ എയര്‍ബസ് എ-320 വിമാനവും ഡല്‍ഹിയില്‍ നിന്ന് കാഠ്മണ്ഡുവിലേക്ക് വരികയായിരുന്ന എയര്‍ ഇന്ത്യ വിമാനവും തമ്മിലായിരുന്നു കൂട്ടിയിടിക്കലിന്റെ വക്കിലെത്തിയത്.
എയര്‍ ഇന്ത്യ വിമാനം 19,000 അടിയില്‍ നിന്ന് താഴേക്ക് ഇറങ്ങുമ്ബോള്‍ നേപ്പാള്‍ എയര്‍ലൈന്‍സ് വിമാനം അതേ സ്ഥലത്ത് നിന്ന് 15,000 അടിയില്‍ പറക്കുകയായിരുന്നു. രണ്ട് വിമാനങ്ങളും അടുത്തടുത്താണെന്ന് റഡാറില്‍ തെളിഞ്ഞതോടെ നേപ്പാള്‍ എയര്‍ലൈന്‍സിന്റെ വിമാനം 7,000 അടിയിലേക്ക് താഴുകയായിരുന്നു.
സംഭവത്തെക്കുറിച്ച്‌ അന്വേഷിക്കാന്‍ സിവില്‍ ഏവിയേഷന്‍ അതോറിറ്റി മൂന്നംഗ സമിതിക്ക് രൂപം നല്‍കിയിട്ടുണ്ട്. സംഭവത്തിലെ അശ്രദ്ധ ചൂണ്ടിക്കാട്ടി എയര്‍ ട്രാഫിക് വിഭാഗത്തിലെ മൂന്ന് ജീവനക്കാരെ സസ്‌പെന്റ് ചെയ്തതായി നേപ്പാള്‍ സിവില്‍ ഏവിയേഷന്‍ അതോറിറ്റി അറിയിച്ചു. സംഭവസമയത്ത് കണ്‍ട്രോള്‍ റൂമിന്റെ ചുമതലയുണ്ടായിരുന്ന മൂന്ന് ഉദ്യോഗസ്ഥരെ സസ്‌പെന്റ് ചെയ്തത്.
‘ത്രിഭുവന്‍ അന്താരാഷ്ട്ര വിമാനത്താവളത്തിലെ എയര്‍ ഇന്ത്യയ്ക്കും നേപ്പാള്‍ എയര്‍ലൈന്‍സിനും ഇടയില്‍ 2023 മാര്‍ച്ച്‌ 24-ന് നടന്ന സംഭവത്തിന്റെ അടിസ്ഥാനത്തില്‍ എയര്‍ ട്രാഫിക് കണ്‍ട്രോളര്‍മാരെ ഇനിയൊരു അറിയിപ്പ് ഉണ്ടാകുന്നതുവരെ ചുമതലയില്‍ നിന്നും നീക്കം ചെയ്തിരിക്കുന്നു’- സിവില്‍ ഏവിയേഷന്‍ അതോറിറ്റി പുറത്തിറക്കിയ പ്രസ്താവനയില്‍ പറയുന്നു. എന്നാല്‍ എയര്‍ ഇന്ത്യയുടെ ഭാഗത്തു നിന്നും പ്രതികരണമൊന്നും ഉണ്ടായിട്ടില്ല.
