കൽപ്പറ്റ: തന്റെ ഓഫീസ് തകർത്ത വിദ്യാർഥി സംഘടനയോട് ദേഷ്യംവെച്ചുപുലർത്തുന്നില്ലെന്ന് കോൺഗ്രസ് എംപി രാഹുൽ ഗാന്ധി. അക്രമമല്ല, സമാധാനത്തിന്റെ മാർഗത്തിലൂടെ ജനങ്ങളെ ഒരുമിപ്പിച്ച് നിർത്താനാണ് കോൺഗ്രസ് ശ്രമിക്കുന്നതെന്നും അദ്ദേഹം പറഞ്ഞു. കൽപറ്റയിൽ തകർക്കപ്പെട്ട തന്റെ ഓഫീസ് സന്ദർശിച്ച ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.
ദൗർഭാഗ്യകരമായ സംഭവമാണ് നടന്നത്. എന്റെ ഓഫീസ് എന്നതിലുപരി വയനാട്ടുകാരുടെ ശബ്ദം ഉയർന്നു കേൾക്കുന്നതിനുള്ള ഓഫീസ് ആണിത്. അക്രമം പ്രശ്നങ്ങൾക്ക് പരിഹാരമുണ്ടാക്കില്ല. കുട്ടികളാണ് ഇത് ചെയ്തതെന്നാണ് മനസ്സിലാക്കുന്നത്. ഉത്തരവാദരഹിതമായാണ് അവർ ഇത്തരമൊരു ആക്രമണം നടത്തിയത്. അതിൽ എനിക്ക് അവരോട് ദേഷ്യമൊന്നുമില്ല. അവർ അതിന്റെ അനന്തരഫലങ്ങൾ ചിന്തിക്കാതെയായിരിക്കാം അവർ അക്രമം നടത്തിയതെന്നും രാഹുൽ ഗാന്ധി പറഞ്ഞു.
