തിരുവനന്തപുരം: ജൂൺ ഒന്നുമുതൽ വൈദ്യുത ലൈനുകളിലേക്ക് മരച്ചില്ലകൾ ചാഞ്ഞുനിൽക്കുന്നതു കണ്ടാൽ ബന്ധപ്പെട്ട സെക്ഷൻ ഓഫീസർമാർക്ക് പിഴചുമത്താൻ വൈദ്യുതിബോർഡ് തീരുമാനിച്ചു. വൈദ്യുത ലൈൻ, പോസ്റ്റ്, ട്രാൻസ്ഫോർമർ എന്നിവയ്ക്കുമീതെ ചെടിപ്പടർപ്പുകളും മരച്ചില്ലകളും ചാഞ്ഞുനിൽക്കുന്നത് ജനത്തിന് ഫോട്ടോയെടുത്ത് വീഴ്ചവരുത്തിയ ഓഫീസർമാരെ ചൂണ്ടിക്കാട്ടി വാട്സാപ്പിൽ അയക്കാം.
കാലവർഷത്തിനുമുമ്പായി ലൈനുകൾക്ക് ഭീഷണിയായ ചെടിപ്പടർപ്പുകളും മരച്ചില്ലകളും ബോർഡ് വെട്ടിമാറ്റാറുണ്ട്. വർഷംതോറും 65 കോടിരൂപയാണ് ഇതിനുചെലവ്. ഇത്തവണ ഏപ്രിൽ 22-നു നടത്തിയ അവലോകനത്തിൽ ഈ ജോലികളുടെ 79 ശതമാനം മാത്രമാണ് പൂർത്തിയായതെന്നു വിലയിരുത്തി. ജോലികൾ മേയ് 31-നകം തീർക്കാൻ നിർദേശം നൽകി.
ജൂൺ ഒന്നിനുശേഷം ഇത്തരം തടസ്സങ്ങൾ മാറ്റാൻ കെഎസ്.ഇ.ബി. ചെലവിടുന്ന തുക ഈ ഉദ്യോഗസ്ഥരിൽനിന്ന് തുല്യതോതിൽ ഈടാക്കും.
ജനങ്ങൾക്ക് ഫോട്ടോയെടുത്ത് അയക്കാവുന്ന വാട്സാപ്പ് നന്പർ- 9496001912. കെ.എസ്.ഇ.ബി.യുടെ ഔദ്യോഗിക ഫെയ്സ്ബുക്ക് പേജിലേക്കും അയക്കാം. പത്ത് ചിത്രങ്ങൾക്ക് ബോർഡ് സമ്മാനം നൽകും.
