മെർലിൻ ബ്ലാക്ക്മോർ എന്ന യുവാവ് സോഷ്യൽ മീഡിയയിലൂടെ തന്‍റെ 149 സഹോദരന്മാരെക്കുറിച്ച് സംസാരിച്ച് ശ്രദ്ധ നേടിയത് ആരും മറന്നിട്ടുണ്ടാവില്ല. ‘കാനഡയിലെ ഏറ്റവും വലിയ’ പോളിഗമിസ്റ്റ് കുടുംബത്തിൽ നിന്നുള്ള മെർലിൻ, അച്ഛന്‍റെ 27 ഭാര്യമാരെക്കുറിച്ചും തങ്ങളുടെ കുടുംബത്തെക്കുറിച്ചും പറഞ്ഞതെല്ലാം അന്താരാഷ്ട്ര മാധ്യമങ്ങളിൽ ചർച്ചയായിരുന്നു. 149 സഹോദരങ്ങളുടെയും പേര് മറക്കാതിരിക്കാൻ കുടുംബം സ്വീകരിച്ച പൊടിക്കൈയെക്കുറിച്ചു യുവാവ് വിവരിക്കുന്നുണ്ട് .
ടിക് ടോക്കിലൂടെ ശ്രദ്ധേയരായ ബ്ലാക്ക്മോർ കുടുംബത്തിന്‍റെ തലവൻ വിൻസ്റ്റൺ ബ്ലാക്ക്മോറിന് 64 വയസാണ് പ്രായം. കാനഡയിലെ ബ്രിട്ടീഷ് കൊളംബിയിലാണ് ഈ പോളിഗമസ് കുടുംബം കഴിയുന്നത്. കാനഡയിലെ ഏറ്റവും വലിയ ബഹുഭാര്യാ കുടുംബം എന്നാണ് അന്താരാഷ്ട്ര മാധ്യമങ്ങൾ ഈ കുടുംബത്തെ വിശേഷിപ്പിക്കുന്നത്. സഹോദരങ്ങളുടെയെല്ലാവരുടെയും പേര് പെട്ടെന്ന് തന്നെ ഓർമ്മവരാൻ കുടുംബം 150 മക്കൾക്കും പ്രത്യേക രീതിയിലാണ് പേരിട്ടിരിക്കുന്നതെന്നാണ് മുറേ ബ്ലാക്ക്മോർ പറയുന്നതെന്ന് ഇംഗ്ലീഷ് വാർത്താ ചാനലായ ടൈംസ് നൗവാണ് റിപ്പോർട്ട് ചെയ്തത്.
വിൻസ്റ്റൺ ബ്ലാക്ക്മോറിന്‍റെ അറുപത്തിയേഴാമത്തെ മകനാണ് ടിക് ടോക് വീഡിയോയിലൂടെ ശ്രദ്ധേയനായ മുറേ ബ്ലാക്ക്മോർ. തന്‍റെ കുടുംബത്തെക്കുറിച്ചും വീട്ടിലെ വീശേഷങ്ങളെക്കുറിച്ചും പതിവായി വീഡിയോ ചെയ്യുന്ന യുവാവ് സോഷ്യൽ മീഡിയ ഉപയോക്താക്കൾക്ക് സുപരിചിതനാണ്. സഹോദരങ്ങളുടെ എല്ലാവരുടെയും പേരുകൾ എളുപ്പത്തിൽ ഓർമ്മിക്കുന്നതിന് വേണ്ടി മാതാപിതാക്കൾ ബുദ്ധിപൂർവമാണ് തങ്ങൾക്ക് പേരിട്ടിരിക്കുന്നതെന്നാണ് യുവാവ് പറയുന്നത്.
ഒരേ വർഷം ജനിക്കുന്നവരുടെ പേരുകൾ ഒരേ അക്ഷരത്തിൽ തുടങ്ങുന്നു
വിൻസ്റ്റൺ ബ്ലാക്ക്മോറിന് വിവിധ ഭാര്യമാരിലായി ഒരേ വർഷം ജനിക്കുന്ന കുട്ടികൾക്കെല്ലാം ഒരേ അക്ഷരം ഉപയോഗിച്ചാണ് പേരിടുന്നതെന്നാണ് മുറേ പറയുന്നത്. ഉദാഹരണത്തിന് 2001ൽ ജനിച്ച കുട്ടികളുടെയെല്ലാം പേര് ‘M’ എന്ന അക്ഷരത്തിലാണ് തുടങ്ങുന്നത്. “ഞങ്ങൾ ഒരു വർഷം 12 പേരാണ് ജനിച്ചത്. മൂന്ന് ആൺകുട്ടികളും 9 പെൺകുട്ടികളും. എല്ലാവരുടെയും പേര് ആരംഭിക്കുന്നത് M എന്ന അക്ഷരത്തിലാണ്” മുറേ പറയുന്നു. പേര് ഓർക്കാൻ ഇത് സഹായിക്കുമെന്നും യുവാവ് പറയുന്നു.
മുറേയുടെ അമ്മയ്ക്ക് വിൻസ്റ്റണിൽ പത്ത് മക്കളാണ് ആകെ ഉള്ളത്. ഈ ഒമ്പത് സഹോദരങ്ങൾക്ക് പുറമേയാണ് മുറേയ്ക്ക് 140 അർധ സഹോദരങ്ങൾ ഉള്ളത്. ഏറ്റവും മുതിർന്ന സഹോദരന് പ്രായം 44 . ഏറ്റവും ഇളയ ആൾക്കാകട്ടെ വെറും ഒരു വയസും. അച്ഛന്‍റെ ഭാര്യമാരിൽ ഒരാൾ ഗർഭിണിയാണെന്നും തങ്ങളുടെ കുടുംബത്തിലേക്ക് പുതിയ ഒരാൾ കൂടി എത്താൻ പോവുകയാണെന്നും യുവാവ് പറഞ്ഞു. സഹോദരങ്ങളുടെ എണ്ണം 151 ആയി ഉയരാൻ പോകുന്നു. ഇത് അവസാനത്തെ ആളാണോയെന്ന് തനിക്ക് പറയാനാവില്ലെന്നും അദ്ദേഹം കൂട്ടിച്ചേർത്തു.
നിലവിൽ വിൻസ്റ്റണൊപ്പം 16 ഭാര്യമാർ
നേരത്തെ തങ്ങളുടെ കുടുംബത്തെക്കുറിച്ച് സംസാരിച്ച മുറേയുടെ സഹോദരൻ മെർലിൻ എല്ലാ കുട്ടികളും അമ്മമാരെ അഭിസംബോധന ചെയ്യുന്നതിനെക്കുറിച്ചും മനസ് തുറന്നിരുന്നു. അമ്മമാർ സ്വന്തം മക്കളെ ‘അമ്മ’ എന്ന് വിളിപ്പിച്ച് ശീലിപ്പിച്ചപ്പോൾ മറ്റുള്ള അമ്മമാരെ അവരുടെ പേരിനൊപ്പം അമ്മ എന്ന് ചേർത്ത് വിളിക്കാനാണ് പഠിപ്പിച്ചത്. 27 ഭാര്യമാരിൽ 22 പേർക്ക് മാത്രമാണ് വിൻസ്റ്റണുമായുള്ള ബന്ധത്തിൽ കുട്ടികളുള്ളത്. അതിൽ 16 പേർ മാത്രമാണ് നിലവിൽ വിൻസ്റ്റണുമായി വിവാഹജീവിതം തുടരുന്നതെന്നും മെർലിൻ പറഞ്ഞിരുന്നു.
ഇത്രയധികം കുടുംബാംഗങ്ങൾക്ക് ഒരുവീട്ടിൽ കഴിയുക എന്നത് പ്രായോഗികമല്ലാത്തതിനാൽ അടുത്തടുത്തുള്ള വീടുകളിലായാണ് ഇവർ താമസിക്കുന്നത്. ‘ഓരോ വീട്ടിലും വിൻസ്റ്റണിന്റെ രണ്ട് ഭാര്യമാരും അവരുടെ ചെറിയ കുട്ടികളും ഉണ്ടാകും. ഒരു ഭാര്യയും മക്കളും മുകളിലത്തെ നിലയിലും മറ്റൊരു ഭാര്യയും കുട്ടികളും താഴത്തെ നിലയിലും കഴിയും’. എല്ലാവർക്കും വേണ്ട ഭക്ഷണ സാധനങ്ങൾ കുടുംബം സ്വന്തമായി കൃഷി ചെയ്യുകയാണ് പതിവ്. കുടുംബത്തിലെ ജോലികളെല്ലാം എല്ലാവരും തുല്യമായി വീതിച്ചാണ് ചെയ്യുന്നത്. കൃഷിയിടത്തിലെ ജോലികളും കുട്ടികൾക്കെല്ലാം നൽകും. ബഹുഭാര്യത്വത്തിന്‍റെ പേരിൽ 2017ൽ ഇദ്ദേഹത്തിന് നിയമനടപടി നേരിടേണ്ടി വന്നിട്ടുണ്ട്. ഇത്രയധികം ഭാര്യമാരും കുട്ടികളുമായി താമസിക്കുന്ന വിൻസ്റ്റണിനെ ആറുമാസം വീട്ടുതടങ്കലിലാക്കുകയായിരുന്നു സർക്കാർ ചെയ്തത്.
