രാജ്യത്ത് അണ്‍ലോക്ക് അഞ്ചിന്റെ ഭാഗമായി കൂടുതല്‍ ഇളവുകള്‍ നാളെ മുതല്‍ നിലവില്‍ വരും. സ്‌കൂളുകള്‍, സിനിമാ തിയേറ്ററുകള്‍, വിനോദ പാര്‍ക്കുകള്‍ തുടങ്ങിയവയ്ക്കാണ് നാളെ മുതല്‍ തുറന്ന് പ്രവര്‍ത്തിക്കാന്‍ അനുമതിയുള്ളത്. കണ്ടെയ്ന്‍മെന്റ് സോണിന് പുറത്തുള്ളവയ്ക്കാണ് പ്രവര്‍ത്തനാനുമതി.
അതേ സമയം സ്‌കൂളുകളുടെ കാര്യത്തില്‍ സംസ്ഥാന സര്‍ക്കാരുകളാണ് അന്തിമ തീരുമാനം എടുക്കേണ്ടത്.ഘട്ടം ഘട്ടമായിട്ട് സ്‌കൂളുകള്‍ തുറക്കാനാണ് അനുമതി നല്‍കിയിരിക്കുന്നത്. കേരളം, ഡല്‍ഹി, മഹാരാഷ്ട്ര തുടങ്ങിയ സംസ്ഥാനങ്ങള്‍ ഇപ്പോള്‍ സ്‌കൂള്‍ തുറക്കേണ്ടതില്ലെന്ന് തീരുമാനിച്ചിട്ടുണ്ട്. എന്നാല്‍ പഞ്ചാബ്, ഉത്തര്‍പ്രദേശ് തുടങ്ങിയ സംസ്ഥാനങ്ങള്‍ സ്‌കൂള്‍ തുറക്കാനും തീരുമാനിച്ച്‌ കഴിഞ്ഞു.പഞ്ചാബില്‍ നാളെ മുതല്‍ സ്‌കൂളുകള്‍ തുറക്കുമ്ബോള്‍, യു.പിയില്‍ ഒക്ടോബര്‍ 19നാണ് സ്‌കൂള്‍ തുറക്കുന്നത്.
50 ശതമാനം ആളുകളെ മാത്രം പ്രവേശിപ്പിച്ച്‌ കൊണ്ടായിരിക്കും സിനിമാ ഹാളുകളുടെയും മള്‍ട്ടിപ്ലക്‌സുകളുടെയും പ്രവര്‍ത്തനം. സീറ്റുകള്‍ക്കിടയില്‍ സാമൂഹികാകലം പാലിക്കുന്ന രീതിയിലായിരിക്കണം ക്രമീകരണം നടത്തേണ്ടത്. ഡിജിറ്റല്‍ പേയ്‌മെന്റ് രീതിയിലായിരിക്കും ഇവിടങ്ങളില്‍ പണമിടപാടുകള്‍. മാസ്‌കുകള്‍ ധരിക്കുക , തെര്‍മല്‍ സ്‌കാനിംഗ് നിര്‍ബന്ധമാക്കുക , രോഗലക്ഷണങ്ങള്‍ ഇല്ലാത്തവരെ മാത്രം തിയേറ്ററിനകത്തേക്ക് പ്രവേശിപ്പിക്കുക. രണ്ടു സിനിമ പ്രദര്‍ശനങ്ങള്‍ തമ്മില്‍ കൃത്യമായ ഇടവേള ഉണ്ടായിരിക്കണം തുടങ്ങിയ മാര്‍ഗ നിര്‍ദേശങ്ങളാണ് നല്‍കിയിരിക്കുന്നത്.
