ഇന്ത്യൻ പ്രീമിയർ ലീഗിന്റെ 2026 സീസൺ ആരംഭിക്കാനിരിക്കെ എല്ലാവരുടേയും ശ്രദ്ധ സഞ്ജു സാംസണിലാണ്. രാജസ്ഥാൻ റോയൽസ് വിട്ട് ചെന്നെെ സൂപ്പർ കിങ്സിലെത്തിയ സഞ്ജു സാംസണ് എത്രത്തോളം മികവ് കാട്ടാൻ സാധിക്കുമെന്നതാണ് എല്ലാവരും ഉറ്റുനോക്കുന്നത്. ടി20 ലോകകപ്പിൽ ഇന്ത്യയെ കിരീടത്തിലേക്കെത്തിക്കുന്നതിൽ സഞ്ജുവിന്റെ ബാറ്റിങ് മികവാണ് നിർണ്ണായകമായത്.
അവസാന മൂന്ന് മത്സരത്തിലും തകർപ്പൻ അർധ സെഞ്ചുറി നേടിയ സഞ്ജു സാംസൺ സിഎസ്കെയ്ക്കൊപ്പവും ഇതേ മികവ് ആവർത്തിക്കുമെന്നാണ് ആരാധകർ പ്രതീക്ഷിക്കുന്നത്. സഞ്ജുവിനെ ധോണിയുടെ പിൻഗാമിയായാണ് സിഎസ്കെ കാണുന്നതെന്ന് നിസംശയം പറയാം. വമ്പൻ പ്രകടനത്തോടെ സിഎസ്കെ ടീമിലെത്തിച്ച സഞ്ജു ഇത്തവണ പരമാവധി സിക്സുകൾ നേടുമെന്ന് ആരാധകർക്ക് വാക്കും നൽകിക്കഴിഞ്ഞു.
സഞ്ജു സാംസൺ സിഎസ്കെയ്ക്കൊപ്പം അരങ്ങേറുന്ന സീസണിൽത്തന്നെ എംഎസ് ധോണിയുടെ ചില വമ്പൻ റെക്കോഡുകൾ തകർക്കാൻ സാധ്യതയുണ്ട്. ഇത് എന്തൊക്കെയാണെന്ന് പരിശോധിക്കാം. ഐപിഎല്ലിൽ ഇതുവരെ സെഞ്ചുറി നേടാൻ ധോണിക്ക് സാധിച്ചിട്ടില്ല. എന്നാൽ സഞ്ജു സാംസണിന്റെ പേരിൽ മൂന്ന് ഐപിഎൽ സെഞ്ചുറികൾ ഇതിനോടകമുണ്ട്.
ഇത്തവണ സിഎസ്കെയ്ക്കൊപ്പം സെഞ്ചുറി പ്രകടനം നടത്താനായാൽ സിഎസ്കെയ്ക്കായി സെഞ്ചുറി നേടുന്ന സിഎസ്കെയുടെ ആദ്യ വിക്കറ്റ് കീപ്പറായി മാറാൻ സഞ്ജുവിന് സാധിക്കും. സഞ്ജുവിന്റെ സമീപകാലത്തെ പ്രകടനങ്ങൾ നോക്കുമ്പോൾ പ്രതീക്ഷ വാനോളമാണ്. ടി20 ലോകകപ്പിലെ ഇതേ മികവ് തുടർന്നാൽ സഞ്ജുവിന് സിഎസ്കെ ജഴ്സിയിൽ സെഞ്ചുറി പ്രയാസമാവില്ല. ടി20 ലോകകപ്പിൽ ചെന്നെെയിൽ നടന്ന മത്സരത്തിൽ സഞ്ജു ഭേദപ്പെട്ട പ്രകടനമാണ് കാഴ്ചവെച്ചത്.
ഐപിഎല്ലിൽ സിഎസ്കെ വിക്കറ്റ് കീപ്പറുടെ ഉയർന്ന വ്യക്തിഗത സ്കോർ എന്ന റെക്കോഡ് തിരുത്താനുള്ള അവസരവും സഞ്ജുവിന് മുന്നിലുണ്ട്. പുറത്താവാതെ 84 റൺസ് നേടിയതാണ് സിഎസ്കെ ജഴ്സിയിലെ ധോണിയുടെ ഉയർന്ന വ്യക്തിഗത പ്രകടനം. ഇതിനെ മറികടക്കാൻ സഞ്ജുവിന് സാധിക്കുമെന്ന് തന്നെ കരുതാം. തുടർച്ചയായി അർധ സെഞ്ചുറി പ്രകടനങ്ങൾ നടത്തുന്ന സഞ്ജു അവസാന മൂന്ന് മത്സരത്തിലും 80ന് മുകളിൽ സ്കോർ നേടി.
മികച്ച തുടക്കം ലഭിച്ചാൽ വലിയ സ്കോറിലേക്കുയരാൻ സഞ്ജുവിന് ശേഷിയുണ്ട്. മധ്യ ഓവറുകളിൽ സ്പിന്നർമാരെയടക്കം കടന്നാക്രമിച്ച് കളിക്കാൻ സഞ്ജുവിന് സാധിക്കും. അതുകൊണ്ടുതന്നെ ധോണിയുടെ ഈ റെക്കോഡിനെ ആദ്യ സീസണിലൂടെത്തന്നെ സഞ്ജു മറികടക്കാനുള്ള സാധ്യത കൂടുതലാണെന്ന് തന്നെ പറയാം.
ധോണി ഒരു ഐപിഎൽ ഇന്നിങ്സിൽ നേടിയ കൂടുതൽ സിക്സർ ഏഴാണ്. സഞ്ജു ഈ റെക്കോഡിനേയും അനായാസം മറികടന്നേക്കും. സഞ്ജു സിക്സുകൾ നേടാൻ ഇഷ്ടപ്പെടുന്ന താരമാണ്. തന്റെ കെെക്കരുത്തിനെ നന്നായി പ്രയോജനപ്പെടുത്തുന്ന സഞ്ജുവിന് ചെപ്പോക്കിൽ നിരവധി സിക്സുകൾ നേടാൻ സാധിക്കുമെന്ന് തന്നെ കരുതാം. ധോണിയുടെ ഈ സിക്സർ റെക്കോഡിനെ സഞ്ജു മറികടക്കാനുള്ള സാധ്യത കൂടുതലാണെന്ന് നിസംശയം പറയാം.
എന്നാൽ ധോണിയുടെ വിക്കറ്റ് കീപ്പർ റെക്കോഡുകളെ മറികടക്കുക സഞ്ജുവിന് എളുപ്പമാവില്ല. ഈ സീസണിൽ ധോണി തന്നെ വിക്കറ്റ് കീപ്പറായി തുടരാനാണ് സാധ്യത. ഈ സീസണോടെ ധോണി വിരമിച്ചാൽ സഞ്ജുവാകും പിന്നീട് സിഎസ്കെയുടെ പ്രധാന വിക്കറ്റ് കീപ്പർ. എന്തായാലും സഞ്ജുവിൽ വലിയ പ്രതീക്ഷയാണ് ഇത്തവണ എല്ലാവർക്കുമുള്ളത്. പ്രകടനം എങ്ങനെയാവുമെന്നതാണ് കാത്തിരുന്ന് കാണേണ്ടത്.
