നമ്മുടെ അടുക്കളയിലെ ഒരു അവിഭാജ്യ ഘടകമാണല്ലോ വെളുത്തുള്ളി. ഭക്ഷണത്തിന് രുചി കൂട്ടാൻ മാത്രമല്ല, ഔഷധഗുണങ്ങളുടെ കാര്യത്തിലും വെളുത്തുള്ളി മുൻപന്തിയിലാണ്.
പുരാതന കാലം മുതൽക്കേ വെളുത്തുള്ളിയെ ഒരു മികച്ച ഔഷധമായി ആയുർവേദം കണക്കാക്കുന്നു. പ്രത്യേകിച്ചും വെറും വയറ്റിൽ പച്ച വെളുത്തുള്ളി കഴിക്കുന്നത് ശരീരത്തിന് അത്ഭുതകരമായ മാറ്റങ്ങൾ നൽകുമെന്നാണ് വിദഗ്ധർ പറയുന്നത്.
ആയുർവേദ വിദഗ്ധയായ ഡോ. അനു പ്രസാദ് വെളുത്തുള്ളി നൽകുന്ന പ്രധാനപ്പെട്ട മൂന്ന് ഗുണങ്ങളെക്കുറിച്ച് വിശദീകരിക്കുന്നു.
ചീത്ത കൊളസ്ട്രോൾ കുറയ്ക്കുന്നു: ശരീരത്തിലെ ചീത്ത കൊളസ്ട്രോൾ അഥവാ എൽഡിഎൽ കുറയ്ക്കാൻ വെളുത്തുള്ളി ഏറെ സഹായിക്കുന്നു. വെളുത്തുള്ളിയിലെ സൾഫർ സംയുക്തങ്ങൾ രക്തക്കുഴലുകളിൽ കൊഴുപ്പ് അടിഞ്ഞുകൂടുന്നത് തടയുന്നു. ഇത് ധമനികൾ കട്ടപിടിക്കുന്നത് ഒഴിവാക്കാനും ഹൃദയാരോഗ്യം മെച്ചപ്പെടുത്താനും സഹായിക്കുന്നു.
ഉയർന്ന രക്തസമ്മർദം നിയന്ത്രിക്കുന്നു: രക്തസമ്മർദം അഥവാ ഹൈപ്പർടെൻഷൻ ഉള്ളവർക്ക് വെളുത്തുള്ളി ഒരു ഉത്തമ പരിഹാരമാണ്. ഇതിലടങ്ങിയിരിക്കുന്ന അല്ലിസിൻ എന്ന ഘടകം രക്തക്കുഴലുകളെ വികസിപ്പിക്കാനും അതുവഴി രക്തയോട്ടം സുഗമമാക്കാനും സഹായിക്കുന്നു. ഇത് ഹൃദയത്തിന് മേലുള്ള സമ്മർദം കുറയ്ക്കുകയും ചെയ്യുന്നു.
വീക്കം കുറയ്ക്കുന്നു: ശരീരത്തിനുള്ളിലെ വിട്ടുമാറാത്ത വീക്കങ്ങൾ പലപ്പോഴും ഹൃദ്രോഗങ്ങൾക്കും പ്രമേഹത്തിനും കാരണമാകാറുണ്ട്. വെളുത്തുള്ളിയിലടങ്ങിയിരിക്കുന്ന ആന്റിഓക്സിഡന്റുകൾ ശരീരത്തിലെ ഇത്തരം വീക്കങ്ങളെ തടയുകയും കോശങ്ങളെ സംരക്ഷിക്കുകയും ചെയ്യുന്നു.
